૨. અન્ધકારવગ્ગો

૧. પઠમસિક્ખાપદ-અત્થયોજના

૮૩૯. અન્ધકારવગ્ગસ્સ પઠમે અપ્પદીપેતિ ઉપલક્ખણવસેન વુત્તત્તા અઞ્ઞેપિ આલોકા ગહેતબ્બાતિ દસ્સેન્તો આહ ‘‘પદીપચન્દસૂરિયઅગ્ગીસૂ’’તિઆદિ. અસ્સાતિ ‘‘અપ્પદીપે’’તિપદસ્સ.

૮૪૧. નરહોઅસ્સાદાપેક્ખા હુત્વા ચ રસ્સાદતો અઞ્ઞવિહિતાવ હુત્વા ચાતિ યોજના. ઇમિના ‘‘સન્તિટ્ઠતિ વા સલ્લપતિ વા’’તિ પદે કિરિયાવિસેસનભાવં દસ્સેતિ. દાનેન વા નિમિત્તભૂતેન, પૂજાય વા નિમિત્તભૂતાય મન્તેતીતિ યોજનાતિ. પઠમં.

૨. દુતિયસિક્ખાપદં

૮૪૨. દુતિયે ઇદમેવ પદં નાનન્તિ સમ્બન્ધોતિ. દુતિયં.

૩. તતિયસિક્ખાપદં

૮૪૬. તતિયે ‘‘ઇદમેવા’’તિ પદં અનુવત્તેતબ્બં. તાદિસમેવાતિ પઠમસદિસમેવાતિ અત્થોતિ. તતિયં.

૪. ચતુત્થસિક્ખાપદં

૮૫૦. ચતુત્થે કણ્ણસ્સ સમીપં નિકણ્ણં, તમેવ નિકણ્ણિકન્તિ વુત્તે કણ્ણમૂલન્તિ આહ ‘‘કણ્ણમૂલં વુચ્ચતી’’તિ. ‘‘કણ્ણમૂલે’’તિ ઇમિના ‘‘નિકણ્ણિક’’ન્તિ એત્થ ભુમ્મત્થે ઉપયોગવચનન્તિ દસ્સેતિ. આહરણત્થાયાતિ આહરાપનત્થાયાતિ. ચતુત્થં.

૫. પઞ્ચમસિક્ખાપદં

૮૫૪. પઞ્ચમે તેસન્તિ ઘરસામિકાનં. ઘરમ્પીતિ ન કેવલં આસનમેવ, ઘરમ્પિ સોધેમાતિ અત્થો. તતોતિ પરિવિતક્કનતો, પરન્તિ સમ્બન્ધો.

૮૫૮. ચોરા વા ઉટ્ઠિતા હોન્તીતિ યોજનાતિ. પઞ્ચમં.

૬. છટ્ઠસિક્ખાપદં

૮૬૦. છટ્ઠે અભિનિસીદેય્યાતિ એત્થ અભિસદ્દો ઉપસગ્ગમત્તોવાતિ દસ્સેન્તો આહ ‘‘નિસીદેય્યા’’તિ. એસેવ નયો અભિનિપજ્જેય્યાતિ એત્થાપિ. દ્વે આપત્તિયોતિ સમ્બન્ધોતિ. છટ્ઠં.

૭. સત્તમસિક્ખાપદં

૮૬૪. સત્તમે સબ્બન્તિ સકલં વત્તબ્બવચનન્તિ. સત્તમં.

૮. અટ્ઠમસિક્ખાપદં

૮૬૯. અટ્ઠમે અનુત્તાનવચનં નત્થીતિ. અટ્ઠમં.

૯. નવમસિક્ખાપદં

૮૭૫. નવમે અભિસપેય્યાતિ એત્થ સપધાતુસ્સ અક્કોસનત્થં અન્તોકત્વા કરધાતુયા અત્થં દસ્સેન્તો આહ ‘‘સપથં કરેય્યા’’તિ. નિરયે નિબ્બત્તામ્હીતિ અહં નિરયે નિબ્બત્તા અમ્હીતિ યોજના. નિરયે નિબ્બત્તતૂતિ એસા ભિક્ખુની નિરયે નિબ્બત્તતૂતિ યોજના. ઈદિસા હોતૂતિ મમ સદિસા હોતૂતિ અત્થો. કાણાતિ એકક્ખિકાણા, દ્વક્ખિકાણા વા. કુણીતિ હત્થપાદાદિવઙ્કા.

૮૭૮. એદિસાતિ વિરૂપાદિજાતિકા. વિરમસ્સૂતિ વિરમાહિ. અદ્ધાતિ ધુવન્તિ. નવમં.

૧૦. દસમસિક્ખાપદં

૮૭૯. દસમે અનુત્તાનટ્ઠાનં નત્થીતિ. દસમં.

અન્ધકારવગ્ગો દુતિયો.