૮. અટ્ઠમસિક્ખાપદં

૮૨૪. અટ્ઠમે નિબ્બિટ્ઠરાજભટોતિ એત્થ ઉત્તરપદસ્સ છટ્ઠીસમાસઞ્ચ પુબ્બપદેન બાહિરત્થસમાસઞ્ચ દસ્સેન્તો આહ ‘‘નિબ્બિટ્ઠો’’તિઆદિ. તત્થ ‘‘રઞ્ઞો ભતી’’તિ ઇમિના રઞ્ઞો ભટો રાજભટોતિ છટ્ઠીસમાસં દસ્સેતિ, ‘‘એતેના’’તિ ઇમિના બાહિરત્થસમાસં. નિબ્બિટ્ઠોતિ નિવિટ્ઠો પતિટ્ઠાપિતોતિ અત્થો. કેણીતિ રઞ્ઞો દાતબ્બસ્સ આયસ્સેતમધિવચનં. એતેનાતિ બ્રાહ્મણેન. તતોતિ ઠાનન્તરતો. ભટસઙ્ખાતાય કેણિયા પથત્તા કારણત્તા ઠાનન્તરં ભટપથન્તિ આહ ‘‘તંયેવ ઠાનન્તર’’ન્તિ.

૮૨૬. ચત્તારિપિ વત્થૂનીતિ ઉચ્ચારાદીનિ. પાટેક્કન્તિ પટિવિસું એકેકમેવ. ઉચ્ચારં વાતિઆદીસુ વાસદ્દેન દન્તકટ્ઠાદયોપિ ગહેતબ્બાતિ આહ ‘‘દન્તકટ્ઠ…પે… પાચિત્તિયમેવા’’તિ. સબ્બત્થાતિ સબ્બેસુ ઉચ્ચારાદીસૂતિ. અટ્ઠમં.