૬. દુતિયપવારણસિક્ખાપદં

૨૪૨. છટ્ઠે ન આચરિતબ્બોતિ અનાચારોતિ વુત્તે પણ્ણત્તિવીતિક્કમોતિ આહ ‘‘પણ્ણત્તિવીતિક્કમ’’ન્તિ. ‘‘કરોતી’’તિઇમિના ‘‘અત્તાનમાચરતી’’તિઆદીસુ વિય ચરસદ્દો કરસદ્દત્થોતિ દસ્સેતિ. ઉપનન્ધીતિ એત્થ ઉપસદ્દો ઉપનાહત્થો, નહધાતુ બન્ધનત્થોતિ દસ્સેન્તો આહ ‘‘ઉપનાહ’’ન્તિઆદિ. જનિતો ઉપનાહો યેનાતિ જનિતઉપનાહો. ઇમિના ‘‘ઉપનન્ધો’’તિ પદસ્સ ઉપનહતીતિ ઉપનન્ધોતિ કત્થુત્થં દસ્સેતિ.

૨૪૩. અભિહટ્ઠુન્તિ એત્થ તુંપચ્ચયો ત્વાપચ્ચયત્થોતિ આહ ‘‘અભિહરિત્વા’’તિ. પદભાજને પન વુત્તન્તિ સમ્બન્ધો. સાધારણમેવ અત્થન્તિ યોજના. અસ્સાતિ ભિક્ખુસ્સ. તીહાકારેહીતિ સામં જાનનેન ચ અઞ્ઞેસમારોચનેન ચ તસ્સારોચનેન ચાતિ તીહિ કારણેહિ. આસાદીયતે મઙ્કું કરીયતે આસાદનં, તં અપેક્ખો આસાદનાપેક્ખોતિ દસ્સેન્તો આહ ‘‘આસાદન’’ન્તિઆદિ.

યસ્સ અત્થાય અભિહટન્તિ સમ્બન્ધો. ઇતરસ્સાતિ અભિહારકતો અઞ્ઞસ્સ ભુત્તસ્સાતિ. છટ્ઠં.