૬. આરામવગ્ગો

૧-૨. આરામપવિસનાદિસિક્ખાપદવણ્ણના

સીસાનુલોકિકાયાતિ સીસં અનુલોકેન્તિયા. યત્થ વા ભિક્ખુનિયો સન્નિપતિતાતિ યત્થ ભિક્ખુનિયો પઠમતરં સજ્ઝાયનચેતિયવન્દનાદિઅત્થં સન્નિપતિતા. આપદાસૂતિ કેનચિ ઉપદ્દુતા હોતિ, એવરૂપાસુ આપદાસુ પવિસિતું વટ્ટતિ.

દુતિયં ઉત્તાનત્થમેવ.

આરામપવિસનાદિસિક્ખાપદવણ્ણના નિટ્ઠિતા.

૩-૪. ગણપરિભાસનાદિસિક્ખાપદવણ્ણના

સેસન્તિ ‘‘અત્થધમ્મઅનુસાસનિપુરેક્ખારાયા’’તિઆદિકં અવસેસં. તત્થ અનુસાસનિપુરેક્ખારાયાતિ ‘‘ઇદાનિપિ ત્વં બાલા અબ્યત્તા’’તિઆદિના (પાચિ. અટ્ઠ. ૧૦૩૬) નયેન અનુસાસનિપક્ખે ઠત્વા વદન્તિયા અનાપત્તિ.

ચતુત્થં ઉત્તાનત્થમેવ.

ગણપરિભાસનાદિસિક્ખાપદવણ્ણના નિટ્ઠિતા.

૫. કુલમચ્છરિનીસિક્ખાપદવણ્ણના

કુલે મચ્છરો કુલમચ્છરોતિ પુરિમસ્મિં પક્ખે સકત્થે ઇનીપચ્ચયો, તં કુલં અસ્સદ્ધં અપ્પસન્નન્તિ કુલસ્સ અગુણં, અયસં વા ભાસન્તિયાતિ અત્થો. ભિક્ખુનીનં અવણ્ણં ભાસન્તિયાતિ ‘‘ભિક્ખુનિયો દુસ્સીલા પાપધમ્મા’’તિ (પાચિ. અટ્ઠ. ૧૦૪૩) ભિક્ખુનીનં અગુણં, અયસં વા ભાસન્તિયા.

સન્તંયેવ આદીનવન્તિ કુલસ્સ વા ભિક્ખુનીનં વા સન્તંયેવ અગુણં.

કુલમચ્છરિનીસિક્ખાપદવણ્ણના નિટ્ઠિતા.

૬-૮. અભિક્ખુકાવાસાદિસિક્ખાપદવણ્ણના

સમન્તપાસાદિકાયં વુત્તોતિ સમન્તપાસાદિકાય ઓવાદવગ્ગસ્સ પઠમસિક્ખાપદે (પાચિ. અટ્ઠ. ૧૪૪) વુત્તો.

સત્તમટ્ઠમાનિ ઉત્તાનત્થાનેવ.

અભિક્ખુકાવાસાદિસિક્ખાપદવણ્ણના નિટ્ઠિતા.

૯-૧૦. ઓવાદૂપસઙ્કમનાદિસિક્ખાપદવણ્ણના

ઉપોસથસ્સ પુચ્છનં ઉપોસથપુચ્છા, સાવકપચ્ચયં, રસ્સત્તઞ્ચ કત્વા ‘‘ઉપોસથપુચ્છક’’ન્તિ વુત્તાતિ આહ ‘‘ઉપોસથપુચ્છન’’ન્તિ. ઓવાદત્થાયાતિ ઓવાદયાચનત્થાય.

દસમં ઉત્તાનત્થમેવ.

ઓવાદૂપસઙ્કમનાદિસિક્ખાપદવણ્ણના નિટ્ઠિતા.

આરામવગ્ગો છટ્ઠો.