૭. મજ્ઝેસુત્તવણ્ણના

૬૧. સત્તમે મન્તાતિ ય-કારલોપેન નિદ્દેસો, કરણત્થે વા એતં પચ્ચત્તવચનં. તેનાહ ‘‘તાય ઉભો અન્તે વિદિત્વા’’તિ. ફસ્સવસેન નિબ્બત્તત્તાતિ દ્વયદ્વયસમાપત્તિયં અઞ્ઞમઞ્ઞં સમ્ફસ્સવસેન નિબ્બત્તત્તા, ‘‘ફસ્સપચ્ચયા તણ્હા, તણ્હાપચ્ચયા ઉપાદાનં, ઉપાદાનપચ્ચયા ભવો, ભવપચ્ચયા જાતી’’તિ ઇમિના ચાનુક્કમેન ફસ્સસમુટ્ઠાનત્તા ઇમસ્સ કાયસ્સ ફસ્સવસેન નિબ્બત્તત્તાતિ વુત્તં. એકો અન્તોતિ એત્થ અયં અન્ત-સદ્દો અન્તઅબ્ભન્તરમરિયાદલામકઅભાવકોટ્ઠાસપદપૂરણસમીપાદીસુ દિસ્સતિ. ‘‘અન્તપૂરો ઉદરપૂરો’’તિઆદીસુ (સુ. નિ. ૧૯૭) હિ અન્તે અન્તસદ્દો. ‘‘ચરન્તિ લોકે પરિવારછન્ના અન્તો અસુદ્ધા, બહિ સોભમાના’’તિઆદીસુ (સં. નિ. ૧.૧૨૨) અબ્ભન્તરે. ‘‘કાયબન્ધનસ્સ અન્તો જીરતિ (ચૂળવ. ૨૭૮) સા હરિતન્તં વા પન્થન્તં વા સેલન્તં વા ઉદકન્તં વા’’તિઆદીસુ (મ. નિ. ૧.૩૦૪) મરિયાદાયં. ‘‘અન્તમિદં, ભિક્ખવે, જીવિકાન’’ન્તિઆદીસુ (સં. નિ. ૩.૮૦; ઇતિવુ. ૯૧) લામકે. ‘‘એસેવન્તો દુક્ખસ્સા’’તિઆદીસુ (મ. નિ. ૩.૩૯૩; સં. નિ. ૨.૫૧) અભાવે. સબ્બપચ્ચયસઙ્ખયો હિ દુક્ખસ્સ અભાવો કોટીતિપિ વુચ્ચતિ. ‘‘તયો અન્તા’’તિઆદીસુ (દી. નિ. ૩.૩૦૫) કોટ્ઠાસે. ‘‘ઇઙ્ઘ તાવ સુત્તન્તં વા ગાથાયો વા અભિધમ્મં વા પરિયાપુણસ્સુ, સુત્તન્તે ઓકાસં કારાપેત્વા’’તિ (પાચિ. ૪૪૨) ચ આદીસુ પદપૂરણે. ‘‘ગામન્તં વા ઓસટો (પારા. ૪૦૯-૪૧૦; ચૂળવ. ૩૪૩) ગામન્તસેનાસન’’ન્તિઆદીસુ (પારા. અટ્ઠ. ૨.૪૧૦) સમીપે. સ્વાયમિધ કોટ્ઠાસે વત્તતીતિ અયમેકો કોટ્ઠાસોતિ.

સન્તો પરમત્થતો વિજ્જમાનો ધમ્મસમૂહોતિ સક્કાયો, પઞ્ચુપાદાનક્ખન્ધા. તેનાહ ‘‘તેભૂમકવટ્ટ’’ન્તિ. સેસમેત્થ સુવિઞ્ઞેય્યમેવ.

મજ્ઝેસુત્તવણ્ણના નિટ્ઠિતા.