૨. ફગ્ગુનસુત્તવણ્ણના

૫૬. દુતિયે સમધોસીતિ સમન્તતો અધોસિ. સબ્બભાગેન પરિફન્દનચલનાકારેન અપચિતિં દસ્સેતિ. વત્તં કિરેતં બાળ્હગિલાનેનપિ વુડ્ઢતરં દિસ્વા ઉટ્ઠિતાકારેન અપચિતિ દસ્સેતબ્બા. તેન પન ‘‘મા ચલિ મા ચલી’’તિ વત્તબ્બો, તં પન ચલનં ઉટ્ઠાનાકારદસ્સનં હોતીતિ આહ ‘‘ઉટ્ઠાનાકારં દસ્સેતી’’તિ. સન્તિમાનિ આસનાનીતિ પઠમમેવ પઞ્ઞત્થાસનં સન્ધાય વદતિ. બુદ્ધકાલસ્મિઞ્હિ એકસ્સપિ ભિક્ખુનો વસનટ્ઠાને – ‘‘સચે સત્થા આગચ્છિસ્સતિ, આસનં પઞ્ઞત્તમેવ હોતૂ’’તિ અન્તમસો ફલકમત્તમ્પિ પણ્ણસન્થારમત્તમ્પિ પઞ્ઞત્તમેવ. ખમનીયં યાપનીયન્તિ કચ્ચિ દુક્ખં ખમિતું, ઇરિયાપથં વા યાપેતું સક્કાતિ પુચ્છતિ. સીસવેદનાતિ કુતોચિ નિક્ખમિતું અલભમાનેહિ વાતેહિ સમુટ્ઠાપિતા બલવતિયો સીસવેદના હોન્તિ.

ફગ્ગુનસુત્તવણ્ણના નિટ્ઠિતા.