૭-૮. મહામોગ્ગલ્લાનસુત્તાદિવણ્ણના

૧૬૭-૧૬૮. સત્તમટ્ઠમેસુ મહામોગ્ગલ્લાનત્થેરસ્સાતિઆદિના મોગ્ગલ્લાનત્થેરસ્સ હેટ્ઠા તિણ્ણં મગ્ગાનં સુખપટિપદદન્ધાભિઞ્ઞભાવો, અરહત્તમગ્ગસ્સ દુક્ખપટિપદખિપ્પાભિઞ્ઞભાવો વુત્તો, સારિપુત્તત્થેરસ્સ પન હેટ્ઠિમાનં તિણ્ણં મગ્ગાનં સુખપટિપદદન્ધાભિઞ્ઞભાવો, અરહત્તમગ્ગસ્સ ચ સુખપટિપદખિપ્પાભિઞ્ઞભાવો દસ્સિતો. યં પન વુત્તં વિસુદ્ધિમગ્ગે (વિસુદ્ધિ. ૨.૮૦૧) ‘‘બુદ્ધાનં પન ચત્તારોપિ મગ્ગા સુખપટિપદખિપ્પાભિઞ્ઞાવ અહેસું, તથા ધમ્મસેનાપતિસ્સ. મહામોગ્ગલ્લાનત્થેરસ્સ પન પઠમમગ્ગો સુખપટિપદખિપ્પાભિઞ્ઞો અહોસિ, ઉપરિ તયો દુક્ખપટિપદદન્ધાભિઞ્ઞા’’તિ. યઞ્ચ વુત્તં અટ્ઠસાલિનિયં (ધ. સ. અટ્ઠ. ૧૪૭૬) ‘‘તથાગતસ્સ હિ સારિપુત્તત્થેરસ્સ ચ ચત્તારોપિ મગ્ગા સુખપટિપદખિપ્પાભિઞ્ઞાવ અહેસું, મહામોગ્ગલ્લાનત્થેરસ્સ પન પઠમમગ્ગો સુખપટિપદખિપ્પાભિઞ્ઞો ઉપરિ તયો દુક્ખપટિપદખિપ્પાભિઞ્ઞા’’તિ, તં સબ્બં અઞ્ઞમઞ્ઞં નાનુલોમેતિ. ઇમાય પાળિયા ઇમાય ચ અટ્ઠકથાય ન સમેતિ, તસ્મા વીમંસિતબ્બમેતં. તંતંભાણકાનં વા મતેન તત્થ તત્થ તથા તથા વુત્તન્તિ ગહેતબ્બં.

મહામોગ્ગલ્લાનસુત્તાદિવણ્ણના નિટ્ઠિતા.