૯. સસઙ્ખારસુત્તવણ્ણના

૧૬૯. નવમે સસઙ્ખારેન દુક્ખેન કસિરેન અધિમત્તપયોગં કત્વાવ કિલેસપરિનિબ્બાનધમ્મોતિ સસઙ્ખારપરિનિબ્બાયી. અસઙ્ખારેન અપ્પયોગેન અધિમત્તપયોગં અકત્વાવ કિલેસપરિનિબ્બાનધમ્મોતિ અસઙ્ખારપરિનિબ્બાયી. ધમ્માનુસારી પુગ્ગલો હિ આગમનમ્હિ કિલેસે વિક્ખમ્ભેન્તો અપ્પદુક્ખેન અકસિરેન અકિલમન્તોવ વિક્ખમ્ભેતું સક્કોતિ. સદ્ધાનુસારી પુગ્ગલો પન દુક્ખેન કસિરેન કિલમન્તો હુત્વા વિક્ખમ્ભેતું, તસ્મા ધમ્માનુસારિસ્સ પુબ્બભાગમગ્ગક્ખણે કિલેસચ્છેદકં ઞાણં અદન્ધં તિખિણં સૂરં હુત્વા વહતિ. યથા નામ તિખિણેન અસિના કદલિં છિન્દન્તસ્સ છિન્નટ્ઠાનં મટ્ઠં હોતિ, અતિસીઘં વહતિ, સદ્દો ન સુય્યતિ, બલવવાયામકિચ્ચં ન હોતિ, એવરૂપા ધમ્માનુસારિનો પુબ્બભાગભાવના હોતિ. સદ્ધાનુસારિનો પન પુબ્બભાગક્ખણે કિલેસચ્છેદકં ઞાણં દન્ધં અતિખિણં અસૂરં હુત્વા વહતિ. યથા નામ કુણ્ઠેન અસિના કદલિં છિન્દન્તસ્સ છિન્નટ્ઠાનં ન મટ્ઠં હોતિ, અતિસીઘં ન વહતિ, સદ્દો સુય્યતિ, બલવવાયામકિચ્ચં ઇચ્છિતબ્બં હોતિ, એવરૂપા સદ્ધાનુસારિનો પુબ્બભાગભાવના હોતિ. એવં સન્તેપિ નેસં કિલેસક્ખયે નાનત્તં નત્થિ, અનવસેસાવ કિલેસા ખીયન્તિ.

સસઙ્ખારસુત્તવણ્ણના નિટ્ઠિતા.