૫. ભૂમિપુગ્ગલકથા

૧૮૦. ઇતો પરં પવક્ખામિ, ભૂમિપુગ્ગલભેદતો;

ચિત્તાનં પન સબ્બેસં, કમતો સઙ્ગહં કથં.

૧૮૧. નિરયઞ્ચ તિરચ્છાનયોનિ પેતાસુરા તથા;

ચતુરાપાયભૂમીતિ, કામે દુગ્ગતિયો મતા.

૧૮૨. ચાતુમહારાજિકા ચ, તાવતિંસા ચ યામકા;

તુસિતા ચેવ નિમ્માનરતિનો વસવત્તિનો.

૧૮૩. છળેતે દેવલોકા ચ, માનવાતિ ચ સત્તધા;

કામસુગતિયો ચેકાદસધા કામભૂમિયો.

૧૮૪. બ્રહ્માનં પારિસજ્જા ચ, તથા બ્રહ્મપુરોહિતા;

મહાબ્રહ્મા ચ તિવિધા, પઠમજ્ઝાનભૂમિયો.

૧૮૫. પરિત્તાભાપ્પમાણાભા, તથેવાભસ્સરાતિ ચ;

દુતિયજ્ઝાનભૂમિ ચ, તિવિધાવ પકાસિતા.

૧૮૬. પરિત્તસુભાપ્પમાણાસુભા ચ સુભકિણ્હકા;

તિવિધાપિ પવુચ્ચન્તિ, તતિયજ્ઝાનભૂમિયો.

૧૮૭. વેહપ્ફલા અસઞ્ઞી ચ, સુદ્ધાવાસા ચ પઞ્ચધા;

ઇચ્ચેતા પન સત્તાપિ, ચતુત્થજ્ઝાનભૂમિયો.

૧૮૮. અવિહા ચ અતપ્પા ચ, સુદસ્સા ચ સુદસ્સિનો;

અકનિટ્ઠાતિ પઞ્ચેતે, સુદ્ધાવાસા પકાસિતા.

૧૮૯. ઇતિ સોળસધા ભિન્ના, બ્રહ્મલોકા પવુચ્ચરે;

રૂપિબ્રહ્માનમાવાસા, રૂપાવચરભૂમિયો.

૧૯૦. આકાસાનઞ્ચાયતનનામાદીહિ પકાસિતા;

અરૂપિબ્રહ્મલોકા ચ, ચતુધારૂપભૂમિયો.

૧૯૧. સોતાપન્નાદિભેદેન, ચતુધાનુત્તરા મતા;

પઞ્ચતિંસ પનિચ્ચેવં, સબ્બથાપિ ચ ભૂમિયો.

૧૯૨. જાયન્તિ ચતુરાપાયે, પાપપાકાય સન્ધિયા;

કામાવચરદેવેસુ, મહાપાકેહિ જાયરે.

૧૯૩. અહેતુકા પુઞ્ઞપાકાહેતુકેન તુ જાયરે;

ભુમ્મદેવમનુસ્સેસુ, મહાપાકેહિ ચેતરે.

૧૯૪. વિપાકં પઠમજ્ઝાનં, પઠમજ્ઝાનભૂમિયં;

દુતિયં તતિયઞ્ચેવ, દુતિયજ્ઝાનભૂમિયં.

૧૯૫. તતિયમ્હિ ચતુત્થં તુ, ચતુત્થમ્હિ ચ પઞ્ચમં;

આરુપ્પા ચ કમેનેવ, આરુપ્પે હોન્તિ સન્ધિયો.

૧૯૬. કાયવાચામનોદ્વારે, કમ્મં પાણવધાદિકં;

કત્વા પાપકચિત્તેહિ, જાયન્તાપાયભૂમિયં.

૧૯૭. કાયવાચામનોદ્વારે, દાનં સીલઞ્ચ ભાવનં;

કામપુઞ્ઞેહિ કત્વાન, કામસુગતિયં સિયું.

૧૯૮. પરિત્તં મજ્ઝિમં ઝાનં, પણીતઞ્ચ યથાક્કમં;

ભાવેત્વા તિવિધા હોન્તિ, તીસુ ભૂમીસુ યોગિનો.

૧૯૯. વેહપ્ફલેસુ જાયન્તિ, ભાવેત્વા પઞ્ચમં તથા;

સઞ્ઞાવિરાગતઞ્ચેવ, ભાવેત્વાસઞ્ઞિભૂમિયં.

૨૦૦. સુદ્ધાવાસેસુ જાયન્તિ, અનાગામિકપુગ્ગલા;

આરુપ્પાનિ ચ ભાવેત્વા, અરૂપેસુ યથાક્કમં.

૨૦૧. લોકુત્તરં તુ ભાવેત્વા, યથાસકમનન્તરં;

સમાપત્તિક્ખણે ચેવ, અપ્પેતિ ફલમાનસં.

૨૦૨. અપાયમ્હા ચુતા સત્તા, કામધાતુમ્હિ જાયરે;

સબ્બટ્ઠાનેસુ જાયન્તિ, કામસુગતિતો ચુતા.

૨૦૩. ચુતા જાયન્તિ રૂપમ્હા, સબ્બત્થાપાયવજ્જિતે;

કામસુગતિયં હોન્તિ, અરૂપાસઞ્ઞતો ચુતા.

૨૦૪. તથારૂપચુતા હોન્તિ, તત્થેવોપરિમેવ ચ;

વટ્ટમૂલસમુચ્છેદા, નિબ્બાયન્તિ અનાસવા.

૨૦૫. સુદ્ધાવાસેસ્વનાગામિ-પુગ્ગલાવોપપજ્જરે;

કામધાતુમ્હિ જાયન્તિ, અનાગામિવિવજ્જિતા.

૨૦૬. હેટ્ઠુપપત્તિબ્રહ્માનં, અરિયાનં ન કત્થચિ;

અસઞ્ઞસત્તાપાયેસુ, નત્થેવારિયપુગ્ગલા.

૨૦૭. વેહપ્ફલે અકનિટ્ઠે, ભવગ્ગે ચ પતિટ્ઠિતા;

ન પુનાઞ્ઞત્થ જાયન્તિ, સબ્બે અરિયપુગ્ગલા.

૨૦૮. છસુ દેવેસ્વનાગામી, વીતરાગા ન તિટ્ઠરે;

ન ચિરટ્ઠાયિનો તત્થ, લોકિયાપિ ચ યોગિનો.

૨૦૯. ગિહિલિઙ્ગે ન તિટ્ઠન્તિ, મનુસ્સેસુ અનાસવા;

પબ્બજ્જાયઞ્ચ ભુમ્મે ચ, બ્રહ્મત્તેપિ ચ તિટ્ઠરે.

૨૧૦. યાનિ પઞ્ઞાસ વસ્સાનિ,

મનુસ્સાનં સ પિણ્ડિતો;

એકો રત્તિદિવો તેન,

માસેકો તિંસ રત્તિયો.

૨૧૧. દ્વાદસમાસિયો વસ્સો, તેન પઞ્ચસતં ભવે;

ચાતુમહારાજિકાનં, પમાણમિદમાયુનો.

૨૧૨. તં નવુતિવસ્સસત-સહસ્સં પન પિણ્ડિતં;

ગણનાય મનુસ્સાનં, ચતુભાગૂપરૂપરિ.

૨૧૩. યં મનુસ્સવસ્સસતં, તદેકો દિવસો કતો;

તેન વસ્સસહસ્સાયુ, તાવતિંસેસુ દેસિતો.

૨૧૪. કોટિત્તયં સટ્ઠિસતસહસ્સઞ્ચાધિકં ભવે;

ગણનાય મનુસ્સાનં, તાવતિંસેસુ પિણ્ડિતં.

૨૧૫. આયુપ્પમાણમિચ્ચેવં, દેવાનમુપરૂપરિ;

દ્વિક્ખત્તું દ્વિગુણં કત્વા, ચતુભાગમુદાહટં.

૨૧૬. ગણનાય મનુસ્સાનં, તત્થ ચુદ્દસ કોટિયો;

ચત્તાલીસસતસહસ્સાધિકા યામભૂમિયં.

૨૧૭. તુસિતાનં પકાસેન્તિ, સત્તપઞ્ઞાસ કોટિયો;

સટ્ઠિસતસહસ્સાનિ, વસ્સાનિ અધિકાનિ ચ.

૨૧૮. નિમ્માનરતિદેવાનં, દ્વિસતં તિંસ કોટિયો;

ચત્તાલીસવસ્સસતસહસ્સાનિ ચ સબ્બથા.

૨૧૯. નવકોટિસતઞ્ચેકવીસતિવસ્સકોટિયો;

સટ્ઠિવસ્સસતસહસ્સાધિકા વસવત્તિસુ.

૨૨૦. કપ્પસ્સ તતિયો ભાગો, ઉપડ્ઢઞ્ચ યથાક્કમં;

કપ્પેકો દ્વે ચ ચત્તારો, અટ્ઠ કપ્પા ચ સોળસ.

૨૨૧. દ્વત્તિંસ ચતુસટ્ઠી ચ, નવસુ બ્રહ્મભૂમિસુ;

વેહપ્ફલા અસઞ્ઞી ચ, પઞ્ચકપ્પસતાયુકા.

૨૨૨. કપ્પસહસ્સં દ્વે ચત્તારિ, અટ્ઠ સોળસ ચક્કમા;

સહસ્સાનિ ચ કપ્પાનં, સુદ્ધાવાસાનમુદ્દિસે.

૨૨૩. વીસકપ્પસહસ્સાનિ, ચત્તાલીસઞ્ચ સટ્ઠિ ચ;

ચતુરાસીતિસહસ્સા, કપ્પા ચારુપ્પકે કમા.

૨૨૪. આયુપ્પમાણનિયમો, નત્થિ ભુમ્મે ચ માનવે;

વસ્સાનં ગણના નત્થિ, ચતુરાપાયભૂમિયં.

૨૨૫. પુથુજ્જનારિયા ચેતિ, દુવિધા હોન્તિ પુગ્ગલા;

તિહેતુકાદિભેદેન, તિવિધા ચ પુથુજ્જના.

૨૨૬. મગ્ગટ્ઠા ચ ફલટ્ઠા ચ,

અટ્ઠેવારિયપુગ્ગલા;

આદિતો સત્ત સેક્ખા ચ,

અસેક્ખો ચારહાપરો.

૨૨૭. અહેતુકાવ લબ્ભન્તિ, સત્તા દુગ્ગતિયં પન;

તિહેતુકાવ લબ્ભન્તિ, રૂપારૂપે સચિત્તકા.

૨૨૮. કામાવચરદેવેસુ, અહેતુકવિવજ્જિતા;

વિનિપાતાસુરે ચેવ, માનવે ચ તયોપિ ચ.

૨૨૯. અરિયા નામ લબ્ભન્તિ, અસઞ્ઞાપાયવજ્જિતે;

પુથુજ્જના તુ લબ્ભન્તિ, સુદ્ધાવાસવિવજ્જિતે.

૨૩૦. સુદ્ધાવાસમપાયઞ્ચ, હિત્વાસઞ્ઞિભવં તિધા;

સોતાપન્નાદયો દ્વેપિ, સેસટ્ઠાનેસુ લબ્ભરે.

૨૩૧. ઇતિ સબ્બપ્પભેદેન, ભૂમિપુગ્ગલસઙ્ગહં;

ઞત્વા વિઞ્ઞૂ વિભાવેય્ય, તત્થ ચિત્તાનિ સમ્ભવાતિ.

ઇતિ ચિત્તવિભાગે ભૂમિપુગ્ગલકથા નિટ્ઠિતા.

પઞ્ચમો પરિચ્છેદો.