૧૩. તેરસમો પરિચ્છેદો

નિસ્સન્દફલવિભાગો

૧૭૯૨. વિપસ્સનાય નિસ્સન્દમિતિ વુત્તમિતો પરં;

સચ્ચાનં પટિવેધાદિં, પવક્ખામિ યથાક્કમં.

૧૭૯૩. પરિઞ્ઞા ચ પહાનઞ્ચ, સચ્છિકિરિયા ચ ભાવના;

ઇતિ દુક્ખાદિસચ્ચેસુ, કિચ્ચમાહુ ચતુબ્બિધં.

૧૭૯૪. તં સબ્બં મગ્ગકાલમ્હિ, કરિસ્સતિ તતો પરં;

પટિપસ્સદ્ધકિચ્ચત્તા, કતં હોતિ ફલે કથં.

૧૭૯૫. છિન્નતાલો ફલસ્સેવ, છિન્નાનુસયમૂલકા;

ખન્ધા નાલમધિટ્ઠાનં, વિપલ્લાસપવત્તિયા.

૧૭૯૬. અચ્ચન્તપટિપક્ખત્તા, ચતુમગ્ગપવત્તિયા;

પરં ક્લેસા ન જાયન્તિ, દડ્ઢબીજઙ્કુરં યથા.

૧૭૯૭. નિય્યાનટ્ઠવિસેસેન, અઞ્ઞમઞ્ઞસ્સ પચ્ચયો;

મગ્ગોવ મગ્ગં ભાવેતિ, જાયમાનોથ વા પુન.

૧૭૯૮. મગ્ગપ્પવત્તિસન્તાને, ભાવનાતિ પવુચ્ચતિ;

વત્તમાનેન તં કિચ્ચં, નિપ્ફાદિતમસેસતો.

૧૭૯૯. ઇતિ તીણિપિ સચ્ચાનિ, કિચ્ચતો પટિવિજ્ઝતિ;

નિબ્બાનં સચ્છિકુબ્બન્તો, મગ્ગો એકક્ખણે સહ.

૧૮૦૦. કિચ્ચપ્પવત્તિતો ચેત્થ, પટિવેધોતિ વુચ્ચતિ;

તઞ્ચ સાધેતિ મગ્ગોયં, નિય્યન્તો સન્તિગોચરો.

૧૮૦૧. પરિચ્ચજિત્વા સઙ્ખારે, મગ્ગસ્સારબ્ભ નિબ્બુતિં,

નિય્યાનમેવ સચ્ચેસુ, કિચ્ચસાધનમીરિતં.

૧૮૦૨. મગ્ગો એવ હિ નિય્યાતિ, સેસા તસ્સોપકારકા;

અપ્પેન્તા ઝાનધમ્મા ચ, બુજ્ઝન્તા બોધિપક્ખિયા.

૧૮૦૩. તસ્મા તસ્સેવ વુટ્ઠાનં, પકાસેન્તિ વિસેસતો;

ખન્ધેહિ ચ કિલેસેહિ, વિમોક્ખત્તયતો કથં.

૧૮૦૪. કત્વાનાભિનિવેસં તુ, યત્થ તત્થ યથા તથા;

ભૂમિધમ્મં પરિગ્ગય્હ, વિપસ્સિત્વા તતો પરં.

૧૮૦૫. યતો કુતોચિ વુટ્ઠાનં, યદિ હોતિ અનિચ્ચતો;

હુત્વાધિમોક્ખબહુલો, સદ્ધિન્દ્રિયવિસેસતો.

૧૮૦૬. અનિમિત્તવિમોક્ખેન, નિય્યન્તો સત્તપુગ્ગલો;

સદ્ધાનુસારી પઠમે, મજ્ઝે સદ્ધાવિમુત્તકો.

૧૮૦૭. અન્તે પઞ્ઞાવિમુત્તોતિ, તમીરેન્તિ તથાગતા;

સઙ્ખારે દુક્ખતો દિસ્વા, વુટ્ઠહન્તો સ પુગ્ગલો.

૧૮૦૮. પસ્સદ્ધિબહુલો હુત્વા, સમાધિન્દ્રિયલાભતો;

તથેવાપ્પણિહિતેન, નિય્યન્તો તિવિધો ભવે.

૧૮૦૯. અનત્તતો વુટ્ઠહિત્વા, વેદબાહુલ્યયોગતો;

સુઞ્ઞતેનાથ નિય્યન્તો, પઞ્ઞિન્દ્રિયવિસેસતો.

૧૮૧૦. ધમ્માનુસારી પઠમે, દિટ્ઠિપ્પત્તો તતો પરં;

અન્તે પઞ્ઞાવિમુત્તોતિ, તમ્પિ દીપેન્તિ પણ્ડિતા.

૧૮૧૧. આનેઞ્જપાદકજ્ઝાન-નામકાયવિસેસતો;

સચ્છિકત્વાન નિબ્બાનં, મજ્ઝે છ કાયસક્ખિનો.

૧૮૧૨. અરૂપતો ચ મગ્ગેન, આનેઞ્જેન ચ રૂપતો;

વિમુત્તો ઉભતોભાગ-વિમુત્તો અરહા ભવે.

૧૮૧૩. તિવિમોક્ખમુખીભૂતા, ઇતિ વુટ્ઠાનસાધિકા;

સત્તપુગ્ગલભેદઞ્ચ, સમ્પાદેતિ વિપસ્સના.

૧૮૧૪. અધિમુચ્ચતિ સદ્ધા ચ, યથાવત્થુસભાવતો;

ઞેય્યધમ્મેસુ સબ્બત્થ, પઞ્ઞા ચ પટિવિજ્ઝતિ.

૧૮૧૫. તસ્મા સદ્ધા ચ પઞ્ઞા ચ, વત્થુનિચ્છયલક્ખણા;

વત્થુપ્પતિટ્ઠિતા ચાયં, તિલક્ખણવિપસ્સના.

૧૮૧૬. તસ્મા સદ્ધાધુરો યોગી, દિસ્વોળારિકલક્ખણં;

તતો પરમનત્તાતિ, સુખુમે અધિમુચ્ચતિ.

૧૮૧૭. તસ્સેવમધિમુત્તસ્સ, સદ્ધા વા પન કેવલા;

સમાધિન્દ્રિયાધિકા ચ, વુટ્ઠાનઘટિકા ભવે.

૧૮૧૮. થૂલલક્ખણમોહાય, પઞ્ઞાધુરે વિપસ્સતો;

ધમ્મસભાવમાહચ્ચ, સુખુમં પટિવિજ્ઝતિ.

૧૮૧૯. તસ્મા સદ્ધાધુરસ્સેવ, વુટ્ઠાનદ્વયમાદિતો;

અન્તે સદ્ધાનુગતસ્સ, પઞ્ઞા સુપરિપૂરતિ.

૧૮૨૦. પઞ્ઞાધુરસ્સ સેસન્તિ, કેચિ આચરિયા પન;

ધુરસંસન્દનં નામ, વુટ્ઠાનેસુ વિભાવયું.

૧૮૨૧. સત્તક્ખત્તુપરમો ચ,

કોલંકોલો તથાપરો;

એકબીજીતિ તિવિધો,

સોતાપન્નો પવુચ્ચતિ.

૧૮૨૨. સકિંદેવ ઇમં લોકં, આગન્ત્વા પુન પુગ્ગલો;

સકદાગામિનામેન, દુતિયોપિ પકાસિતો.

૧૮૨૩. અન્તરાપરિનિબ્બાયી, ઉપહચ્ચાપરો તથા;

અસઙ્ખારં સસઙ્ખારં, ઉદ્ધંસોતોતિ પઞ્ચધા.

૧૮૨૪. અનાગામી ચ તતિયો, ચતુત્થો અરહાતિ ચ;

ઇત્થં ફલટ્ઠા ચત્તારો, મગ્ગટ્ઠા ચ તતોપરે.

૧૮૨૫. ભાવનાપરિયાયેન, પટિવેધાનુરૂપતો;

ચત્તારો ચ યુગા હોન્તિ, અટ્ઠ ચારિયપુગ્ગલા.

૧૮૨૬. દિટ્ઠિકઙ્ખા પહીયન્તિ, આદિમગ્ગેન સબ્બથા;

અપાયગમનીયમ્પિ, પાપમઞ્ઞં પહીયતિ.

૧૮૨૭. સકદાગામિમગ્ગેન, ખીયન્તોળારિકા તથા;

અનાગામિકમગ્ગેન, કામદોસાવ સબ્બથા.

૧૮૨૮. અરહત્તેન સબ્બેપિ, ક્લેસા ખીયન્તિ સબ્બથા;

ક્લેસહાનિ યથાયોગ-મિતિ ઞેય્યા વિભાવિના.

૧૮૨૯. પટિસમ્ભિદા ચતસ્સો, અત્થે ધમ્મે નિરુત્તિયં;

પટિભાને ચ ભાસન્તિ, ઞાણં ભેદગતં બુધા.

૧૮૩૦. હેતુપ્ફલઞ્ચ નિબ્બાનં, ભાસિતત્થો તથાપરો;

પાકાક્રિયાતિ પઞ્ચેતે, અત્થનામેન ભાસિતા.

૧૮૩૧. હેતુ ચારિયમગ્ગો ચ, ભાસિતઞ્ચ તથાપરં;

કુસલાકુસલઞ્ચેતિ, પઞ્ચ ધમ્મો પકાસિતો.

૧૮૩૨. તત્થેવં દસધા ભેદે, અત્થધમ્મે યથારહં;

યો વોહારો સભાવેન, સા નિરુત્તીતિ સમ્મતા.

૧૮૩૩. તંતંગોચરકિચ્ચાદિ-ભેદભિન્નં તહિં તહિં;

પવત્તમાનં યં ઞાણં, પટિભાનં તમીરિતં.

૧૮૩૪. પુબ્બયોગો બાહુસ્સચ્ચં,

દેસભાસા તથાગમો;

પરિપુચ્છા ચાધિગમો,

નિસ્સયો મિત્તસમ્પદા.

૧૮૩૫. ઇચ્ચૂપનિસ્સયં લદ્ધા, ભિજ્જતિ પટિસમ્ભિદા;

અસેક્ખભૂમિયં વાથ, સેક્ખભૂમિયમેવ વા.

૧૮૩૬. સરસ્સતો આગમતો, તથાલમ્બણતોપિ ચ;

નામુપ્પત્તિં પકાસેન્તિ, ફલસ્સ તિવિધં બુધા.

૧૮૩૭. તિધા તતો સમાપત્તિ, સોતાપત્તિફલાદિકા;

સુઞ્ઞતા ચાનિમિત્તા ચ, તથાપ્પણિહિતાતિ ચ.

૧૮૩૮. તઞ્ચ વુત્તનયેનેવ, સમાપજ્જિતુમિચ્છતો;

વિપસ્સન્તસ્સ સઙ્ખારે, ફલમપ્પેતિ અત્તનો.

૧૮૩૯. નિરોધં તુ સમાપત્તિં, રૂપારૂપસ્સ લાભકો;

સમાપજ્જતાનાગામી, અરહા ચ યથા તથા.

૧૮૪૦. રૂપારૂપસમાપત્તિં, સમાપજ્જ યથાક્કમં;

વુટ્ઠહિત્વા વિપસ્સન્તો, તત્થ તત્થેવ સઙ્ખતે.

૧૮૪૧. યુગનન્ધં પવત્તેત્વા, સમથઞ્ચ વિપસ્સનં;

યાવાકિઞ્ચઞ્ઞાયતન-મિત્થં પત્વા તતો પરં.

૧૮૪૨. અધિટ્ઠેય્યમધિટ્ઠાય, કત્વાભોગં યથારહં;

મગ્ગારૂપસમાપત્તિં, સમાપજ્જતિ પણ્ડિતો.

૧૮૪૩. તતો નિરોધં ફુસતિ, ચિત્તુપ્પાદદ્વયા પરં;

તસ્સેવં મનસાભાવો, નિરોધોતિ પવુચ્ચતિ.

૧૮૪૪. ફલચિત્તસમુપ્પાદા, વુટ્ઠાનં તસ્સ દીપિતં;

તતો ભવઙ્ગં છેત્વાન, પચ્ચવેક્ખતિ બુદ્ધિમા.

૧૮૪૫. ઇચ્ચાનેકગુણાધારં, પઞ્ઞાભાવનમુત્તમં;

ભાવેય્ય મતિમા યોગી, પત્થેન્તો હિતમત્તનો.

૧૮૪૬. ઇત્થં સુસમ્પાદિતસીલચિત્ત-

પઞ્ઞાવિસુદ્ધી પટિપાદયન્તા;

પત્વાન સમ્બોધિમપેતસોકા,

પાલેન્તિ સોત્થિં પરમં ચિરાય.

૧૮૪૭. તે પત્તિપત્તા પરમપ્પતીતા,

પક્ખાલિતક્લેસમલા મહેસી;

અચ્ચન્તવોદાતગુણોદિતત્તા,

લોકસ્સ હોન્તુત્તમદક્ખિણેય્યા.

ઇતિ નામરૂપપરિચ્છેદે નિસ્સન્દફલવિભાગો નામ

તેરસમો પરિચ્છેદો.

નિટ્ઠિતો ચ સબ્બથાપિ વિપસ્સનાવિભાગો.

નિગમનકથા

૧૮૪૮. એત્તાવતા પટિઞ્ઞાતો, પવક્ખામીતિ આદિતો;

નામરૂપપરિચ્છેદો, પરિનિટ્ઠાપિતો મયા.

૧૮૪૯. તેરસેવ પરિચ્છેદા, વિભત્તા સત્ત સાધિકા;

નામરૂપપરિચ્છેદે, ભાણવારા પકાસિતા.

૧૮૫૦. અભિધમ્મપરમત્થા, સમથો ચ વિપસ્સના;

વિસું વિસું વિભત્તાતિ, વિભાગેત્થ તિધા મતા.

૧૮૫૧. સોયં વિજ્જાવિમોક્ખા ચ, હદયેસુ વિભાવિનં;

વલ્લભત્તમધિટ્ઠાય, સાસનેત્થ ગવેસિનં.

૧૮૫૨. મનોગતતમુદ્ધંસી, રવિરંસીવ પણ્ડિતો;

દસ્સેતુ ચિરમાલોકં, સદ્ધમ્મરતનાલયે.

૧૮૫૩. પણ્ડિચ્ચં પરમત્થેસુ, પાટવં પટિપત્તિયં;

પત્થયન્તેન ભિક્ખૂન-મિત્થં સુગતસાસને.

૧૮૫૪. નામરૂપપરિચ્છેદ-મસંકિણ્ણમનાકુલં;

કુબ્બતા હિતકામેન, સુકતેન કતેન મે.

૧૮૫૫. મહામેરુનિભં ગેહં, મહાચેતિયભૂસિતં;

મહાવિહારમારુળ્હ-મહાબોધિમહુસ્સવં.

૧૮૫૬. અલઙ્કાતું પહોન્તાલં, ચિરકાલં તપોધના;

લઙ્કાદીપસ્સલઙ્કારં, કલઙ્કાપગતાલયં.

૧૮૫૭. નામરૂપપરિચ્છેદો,

અન્તરાયં વિના યથા;

નિટ્ઠિતોયં તથા લોકે,

નિટ્ઠન્તજ્ઝાસયા સુભા.

ઇતિ અનુરુદ્ધાચરિયેન વિરચિતં

નામરૂપપરિચ્છેદપકરણં નિટ્ઠિતં.