૧. પઠમો પરિચ્છેદો

રૂપસઙ્ખેપો

૩. સચ્ચાનિ પરમત્થઞ્ચ, સમ્મુતિઞ્ચાતિ દ્વે તહિં;

થદ્ધભાવાદિના ઞેય્યં, સચ્ચં તં પરમત્થકં.

૪. સન્નિવેસવિસેસાદિઞેય્યં સમ્મુતિ તં દ્વયં;

ભાવસઙ્કેતસિદ્ધીનં, તથત્તા સચ્ચમીરિતં.

૫. પરમત્થો સનિબ્બાનપઞ્ચક્ખન્ધેત્થ રાસિતો;

ખન્ધત્થો ચ સમાસેત્વા, વુત્તોતીતાદિભેદનં.

૬. વેદનાદીસુપેકસ્મિં, ખન્ધસદ્દો તુ રુળ્હિયા;

સમુદ્દાદેકદેસે તુ, સમુદ્દાદિરવો યથા.

૭. તત્થ સીતાદિરુપ્પત્તા, રૂપં ભ્વાપાનલાનિલં;

ભૂતં કથિનદવતાપચનીરણભાવકં.

૮. ચક્ખુ સોતઞ્ચ ઘાનઞ્ચ, જિવ્હા કાયો પભા રવો;

ગન્ધો રસોજા ઇત્થી ચ, પુમા વત્થુ ચ જીવિતં.

૯. ખં જાતિ જરતા ભઙ્ગો, રૂપસ્સ લહુતા તથા;

મુદુકમ્મઞ્ઞતા કાયવચીવિઞ્ઞત્તિ ભૂતિકં.

૧૦. ચક્ખાદી દટ્ઠુકામાદિહેતુકમ્મજભૂતિકા;

પસાદા રૂપસદ્દાદી, ચક્ખુઞાણાદિગોચરા.

૧૧. ઓજા હિ યાપના ઇત્થિપુમલિઙ્ગાદિહેતુકં;

ભાવદ્વયં તુ કાયંવ, બ્યાપિ નો સહવુત્તિકં.

૧૨. નિસ્સયં વત્થુ ધાતૂનં, દ્વિન્નં કમ્મજપાલનં;

જીવિતં ઉપ્પલાદીનં, ઉદકંવ ઠિતિક્ખણે.

૧૩. ખં રૂપાનં પરિચ્છેદો, જાતિઆદિત્તયં પન;

રૂપનિબ્બત્તિ પાકો ચ, ભેદો ચેવ યથાક્કમં.

૧૪. લહુતાદિત્તયં તં હિ, રૂપાનં કમતો સિયા;

અદન્ધથદ્ધતા ચાપિ, કાયકમ્માનુકૂલતા.

૧૫. અભિક્કમાદિજનકચિત્તજસ્સાનિલસ્સ હિ;

વિકારો કાયવિઞ્ઞત્તિ, રૂપત્થમ્ભાદિકારણં.

૧૬. વચીભેદકચિત્તેન, ભૂતભૂમિવિકારતા;

વચીવિઞ્ઞત્તુપાદિન્નઘટ્ટનસ્સેવ કારણં.

૧૭. રૂપમબ્યાકતં સબ્બં, વિપ્પયુત્તમહેતુકં;

અનાલમ્બં પરિત્તાદિ, ઇતિ એકવિધં નયે.

૧૮. અજ્ઝત્તિકાનિ ચક્ખાદી, પઞ્ચેતેવ પસાદકા;

વત્થુના વત્થુ તાનેવ, દ્વારા વિઞ્ઞત્તિભી સહ.

૧૯. સેસં બાવીસતિ ચેકવીસ વીસતિ બાહિરં;

અપ્પસાદમવત્થું ચ, અદ્વારઞ્ચ યથાક્કમં.

૨૦. પસાદા પઞ્ચ ભાવાયુ, ઇન્દ્રિયનિન્દ્રિયેતરં;

વિનાપં આદિતો યાવ, રસા થૂલં ન ચેતરં.

૨૧. અટ્ઠકં અવિનિબ્ભોગં, વણ્ણગન્ધરસોજકં;

ભૂતં તં તુ વિનિબ્ભોગમિતરન્તિ વિનિદ્દિસે.

૨૨. અટ્ઠારસાદિતો રૂપા, નિપ્ફન્નં તુ ન ચેતરં;

ફોટ્ઠબ્બમાપવજ્જં તુ, ભૂતં કામે ન ચેતરં.

૨૩. સેક્ખસપ્પટિઘાસેક્ખપટિઘં દ્વયવજ્જિતં;

વણ્ણં તદિતરં થૂલં, સુખુમઞ્ચેતિ તં તિધા.

૨૪. કમ્મજાકમ્મજંનેવકમ્માકમ્મજતો તિધા;

ચિત્તોજઉતુજાદીનં, વસેનાપિ તિધા તથા.

૨૫. દિટ્ઠં સુતં મુતઞ્ચાપિ, વિઞ્ઞાતં વત ચેતસા;

એકમેકઞ્ચ પઞ્ચાપિ, વીસતિ ચ કમા સિયું.

૨૬. હદયં વત્થુ વિઞ્ઞત્તિ, દ્વારં ચક્ખાદિપઞ્ચકં;

વત્થુ દ્વારઞ્ચ સેસાનિ, વત્થુ દ્વારઞ્ચ નો સિયા.

૨૭. નિપ્ફન્નં રૂપરૂપં ખં, પરિચ્છેદોથ લક્ખણં;

જાતિઆદિત્તયં રૂપં, વિકારો લહુતાદિકં.

૨૮. યથા સઙ્ખતધમ્માનં, લક્ખણં સઙ્ખતં તથા;

પરિચ્છેદાદિકં રૂપં, તજ્જાતિમનતિક્કમા.

૨૯. કમ્મચિત્તાનલાહારપચ્ચયાનં વસેનિધ;

ઞેય્યા પવત્તિ રૂપસ્સ, પિણ્ડાનઞ્ચ વસા કથં.

૩૦. કમ્મજં સેન્દ્રિયં વત્થુ, વિઞ્ઞત્તિ ચિત્તજા રવો;

ચિત્તગ્ગિજો લહુતાદિત્તયં ચિત્તાનલન્નજં.

૩૧. અટ્ઠકં જાતિ ચાકાસો, ચતુજા જરતા ખયં;

કુતોચિ નેવ જાતં તપ્પાકભેદં હિ તં દ્વયં.

૩૨. જાતિયાપિ ન જાતત્તં, કુતોચિટ્ઠકથાનયા;

લક્ખણાભાવતો તસ્સા, સતિ તસ્મિં ન નિટ્ઠિતિ.

૩૩. કમ્મચિત્તાનલન્નેહિ, પિણ્ડા નવ ચ સત્ત ચ;

ચત્તારો દ્વે ચ વિઞ્ઞેય્યા, સજીવે દ્વે અજીવકે.

૩૪. અટ્ઠકં જીવિતેનાયુનવકં ભાવવત્થુના;

ચક્ખાદી પઞ્ચ દસકા, કલાપા નવ કમ્મજા.

૩૫. સુદ્ધટ્ઠવિઞ્ઞત્તિયુત્તનવકોપિ ચ દસકો;

સુદ્ધસદ્દેન નવકો, લહુતાદિદસેકકો.

૩૬. વિઞ્ઞત્તિલહુતાદીહિ, પુન દ્વાદસ તેરસ;

ચિત્તજા ઇતિ વિઞ્ઞેય્યા, કલાપા સત્ત વા છ વા.

૩૭. સુદ્ધટ્ઠં સદ્દનવકં, લહુતાદિદસેકકં;

સદ્દેનલહુતાદીહિ, ચતુરોતુજકણ્ણિકા.

૩૮. સુદ્ધટ્ઠલહુતાદીહિ, અન્નજા દ્વેતિમે નવ;

સત્ત ચત્તારિ દ્વે ચેતિ, કલાપા વીસતી દ્વિભિ.

૩૯. તયટ્ઠકા ચ ચત્તારો, નવકા દસકા નવ;

તયો દ્વેકો ચ એકેન, દસ દ્વીહિ ચ તીહિ ચ.

૪૦. ચતુન્નમ્પિ ચ ધાતૂનં, અધિકંસવસેનિધ;

રૂપભેદોથ વિઞ્ઞેય્યો, કમ્મચિત્તાનલન્નજો.

૪૧. કેસાદિમત્થલુઙ્ગન્તા, પથવંસાતિ વીસતિ;

પિત્તાદિમુત્તકન્તા તે, જલંસા દ્વાદસીરિતા.

૪૨. યેન સન્તપ્પનં યેન, જીરણં દહનં તથા;

યેનસિતાદિપાકોતિ, ચતુરંસાનલાધિકા.

૪૩. ઉદ્ધાધોગમકુચ્છિટ્ઠા, કોટ્ઠાસેય્યઙ્ગસારિ ચ;

અસ્સાસોતિ ચ વિઞ્ઞેય્યા, છળંસા વાયુનિસ્સિતા.

૪૪. પુબ્બમુત્તકરીસઞ્ચુદરિયં ચતુરોતુજા;

કમ્મા પાચગ્ગિ ચિત્તમ્હા-સ્સાસોતિ છપિ એકજા.

૪૫. સેદસિઙ્ઘાનિકસ્સુ ચ, ખેળો ચિત્તોતુસમ્ભવા;

દ્વિજા દ્વત્તિંસ કોટ્ઠાસા, સેસા એવ ચતુબ્ભવા.

૪૬. એકજેસ્વાદિચતૂસુ, ઉતુજા ચતુરટ્ઠકા;

જીવીતનવકો પાચેસ્સાસે ચિત્તભવટ્ઠકો.

૪૭. દ્વિજેસુ મનતેજેહિ, દ્વે દ્વે હોન્તિ પનટ્ઠકા;

સેસતેજાનિલંસેસુ, એકેકમ્હિ તયો તયો.

૪૮. અટ્ઠકોજમનગ્ગીહિ, હોન્તિ અટ્ઠસુ કમ્મતો;

અટ્ઠાયુનવકા એવં, ઇમે અટ્ઠ ચતુબ્ભવા.

૪૯. ચતુવીસેસુ સેસેસુ, ચતુજેસુટ્ઠકા તયો;

એકેકમ્હિ ચ વિઞ્ઞેય્યા, પિણ્ડા ચિત્તાનલન્નજા.

૫૦. કમ્મજા કાયભાવવ્હા, દસકાપિ સિયું તહિં;

ચતુવીસેસુ અંસેસુ, એકેકમ્હિ દુવે દુવે.

૫૧. પઞ્ચાપિ ચક્ખુસોતાદી, પદેસદસકા પુન;

નવકા સદ્દસઙ્ખાતા, દ્વેતિચ્ચેવં કલાપતો.

૫૨. તેપઞ્ઞાસ દસેકઞ્ચ, નવુત્તરસતાનિ ચ;

દસકા નવકા ચેવ, અટ્ઠકા ચ સિયું કમા.

૫૩. સેકપઞ્ચસતં કાયે, સહસ્સં તં પવત્તતિ;

પરિપુણ્ણિન્દ્રિયે રૂપં, નિપ્ફન્નં ધાતુભેદતો.

૫૪. ચિત્તુપ્પાદે સિયું રૂપ-હેતૂ કમ્માદયો પન;

ઠિતિ ન પાઠે ચિત્તસ્સ, ન ભઙ્ગે રૂપસમ્ભવો.

૫૫. ‘‘અઞ્ઞથત્તં ઠિતસ્સા’’તિ, વુત્તત્તાવ ઠિતિક્ખણં;

અત્થીતિ ચે પબન્ધેન, ઠિતિ તત્થ પવુચ્ચતિ.

૫૬. અથ વા તિક્ખણે કમ્મં, ચિત્તમત્તુદયક્ખણે;

ઉતુઓજાત્તનો ઠાને, રૂપહેતૂ ભવન્તિ હિ.

૫૭. સેય્યસ્સાદિક્ખણે કાય-

ભાવવત્થુવસા તયો;

દસકા હોન્તિભાવિસ્સ,

વિના ભાવં દુવે સિયું.

૫૮. તતો પરઞ્ચ કમ્મગ્ગિચિત્તજા તે ચ પિણ્ડિકા;

અટ્ઠકા ચ દુવે પુબ્બે, વુત્તવુત્તક્ખણે વદે.

૫૯. કાલેનાહારજં હોતિ, ચક્ખાદિદસકાનિ ચ;

ચતુપચ્ચયતો રૂપં, સમ્પિણ્ડેવં પવત્તતિ.

૬૦. તં સત્તરસચિત્તાયુ, વિના વિઞ્ઞત્તિલક્ખણં;

સન્તતામરણા રૂપં, જરાદિફલમાવહં.

૬૧. ભઙ્ગા સત્તરસુપ્પાદે, જાયતે કમ્મજં ન તં;

તદુદ્ધં જાયતે તસ્મા, તક્ખયા મરણં ભવે.

૬૨. આયુકમ્મુભયેસં વા, ખયેન મરણં ભવે;

ઉપક્કમેન વા કેસઞ્ચુપચ્છેદકકમ્મુના.

૬૩. ઓપપાતિકભાવિસ્સ, દસકા સત્ત કમ્મજા;

કામે આદો ભવન્તગ્ગિજાહિ પુબ્બેવ ભૂયતે.

૬૪. આદિકપ્પનરાનઞ્ચ, અપાયે અન્ધકસ્સ ચ;

બધિરસ્સાપિ આદો છ, પુબ્બેવેતરજા સિયું.

૬૫. તત્થેવન્ધબધિરસ્સ, પઞ્ચ હોન્તિ અભાવિનો;

યુત્તિયા ઇધ વિઞ્ઞેય્યા, પઞ્ચ વા ચતુરોપિ વા.

૬૬. ચક્ખાદિત્તયહીનસ્સ, ચતુરોવ ભવન્તિતિ;

વુત્તં ઉપપરિક્ખિત્વા, ગહેતબ્બં વિજાનતા.

૬૭. રૂપે જીવિતછક્કઞ્ચ, ચક્ખાદિસત્તકત્તયં;

પઞ્ચ છ ઉતુચિત્તેહિ, પઞ્ચ છાસઞ્ઞિનં ભવે.

૬૮. પઞ્ચધાત્વાદિનિયમા, પાઠે ગન્ધરસોજનં;

નુપ્પત્તિ તત્થ ભૂતાનં, અફોટ્ઠબ્બપવત્તિનં.

૬૯. થદ્ધુણ્હીરણભાવોવ, નત્થિ ધાત્વાદિકિચ્ચતો;

અઞ્ઞં ગન્ધાદીનં તેસં, તક્કિચ્ચેનોપલદ્ધિતો.

૭૦. રૂપે સપ્પટિઘત્તાદિ, તત્થ રુપ્પનતા વિય;

ઘટ્ટનઞ્ચ રવુપ્પાદસ્સઞ્ઞત્થસ્સેવ હેતુતા.

૭૧. ઇચ્છિતબ્બમિમેકન્તમેવં પાઠાવિરોધતો;

અથ વા તેહિ વિઞ્ઞેય્યં, દસકં નવકટ્ઠકં.

૭૨. સબ્બં કામભવે રૂપં, રૂપે એકૂનવીસતિ;

અસઞ્ઞીનં દસ ગન્ધરસોજાહિ ચ બ્રહ્મુનં.

ઇતિ સચ્ચસઙ્ખેપે રૂપસઙ્ખેપો નામ

પઠમો પરિચ્છેદો.