૨. દુતિયો પરિચ્છેદો

ખન્ધત્તયસઙ્ખેપો

૭૩. વેદનાનુભવો તેધા, સુખદુક્ખમુપેક્ખયા;

ઇટ્ઠાનિટ્ઠાનુભવનમજ્ઝાનુભવલક્ખણા.

૭૪. કાયિકં માનસં દુક્ખં, સુખોપેક્ખા ચ વેદના;

એકં માનસમેવેતિ, પઞ્ચધિન્દ્રિયભેદતો.

૭૫. યથા તથા વા સઞ્ઞાણં, સઞ્ઞા સતિનિબન્ધનં;

છધા છદ્વારસમ્ભૂતફસ્સજાનં વસેન સા.

૭૬. સઙ્ખારા ચેતના ફસ્સો,

મનક્કારાયુ સણ્ઠિતિ;

તક્કો ચારો ચ વાયામો,

પીતિ છન્દોધિમોક્ખકો.

૭૭. સદ્ધા સતિ હિરોત્તપ્પં, ચાગો મેત્તા મતિ પુન;

મજ્ઝત્તતા ચ પસ્સદ્ધી, કાયચિત્તવસા દુવે.

૭૮. લહુતા મુદુકમ્મઞ્ઞપાગુઞ્ઞમુજુતા તથા;

દયા મુદા મિચ્છાવાચા, કમ્મન્તાજીવસંવરો.

૭૯. લોભો દોસો ચ મોહો ચ, દિટ્ઠિ ઉદ્ધચ્ચમેવ ચ;

અહિરીકં અનોત્તપ્પં, વિચિકિચ્છિતમેવ ચ.

૮૦. માનો ઇસ્સા ચ મચ્છેરં, કુક્કુચ્ચં થિનમિદ્ધકં;

ઇતિ એતેવ પઞ્ઞાસ, સઙ્ખારક્ખન્ધસઞ્ઞિતા.

૮૧. બ્યાપારો ચેતના ફસ્સો, ફુસનં સરણં તહિં;

મનક્કારો પાલનાયુ, સમાધિ અવિસારતા.

૮૨. આરોપનાનુમજ્જટ્ઠા, તક્કચારા પનીહના;

વીરિયં પીનના પીતિ, છન્દો તુ કત્તુકામતા.

૮૩. અધિમોક્ખો નિચ્છયો સદ્ધા,

પસાદો સરણં સતિ;

હિરી પાપજિગુચ્છા હિ,

ઓત્તપ્પં તસ્સ ભીરુતા.

૮૪. અલગ્ગો ચ અચણ્ડિક્કં, ચાગો મેત્તા મતિ પન;

યાથાવબોધો મજ્ઝત્તં, સમવાહિતલક્ખણં.

૮૫. છ યુગાનિ કાયચિત્તદરગારવથદ્ધતા-

અકમ્મઞ્ઞત્તગેલઞ્ઞકુટિલાનં વિનોદના.

૮૬. તાનુદ્ધતાદિથિનાદિદિટ્ઠાદીનં યથાક્કમં;

સેસકાદિઅસદ્ધાદિમાયાદીનં વિપક્ખિનો.

૮૭. દુક્ખાપનયનકામા, દયા મોદા પમોદના;

વચીદુચ્ચરિતાદીનં, વિરામો વિરતિત્તયં.

૮૮. લોભો દોસો ચ મોહો ચ,

ગેધચણ્ડમનન્ધના;

કમેન દિટ્ઠિ દુગ્ગાહો,

ઉદ્ધચ્ચં ભન્તતં મતં.

૮૯. અહિરીકમલજ્જત્તં, અનોત્તપ્પમતાસતા;

સંસયો વિચિકિચ્છા હિ, માનો ઉન્નતિલક્ખણો.

૯૦. પરસ્સકસમ્પત્તીનં,

ઉસૂયા ચ નિગૂહના;

ઇસ્સામચ્છેરકા તાપો,

કતાકતસ્સ સોચના.

૯૧. થિનં ચિત્તસ્સ સઙ્કોચો, અકમ્મઞ્ઞત્તતા પન;

મિદ્ધમિચ્ચેવમેતેસં, લક્ખણઞ્ચ નયે બુધો.

૯૨. વેદનાદિસમાધન્તા, સત્ત સબ્બગસઞ્ઞિતા;

તક્કાદિઅધિમોક્ખન્તા, છ પકિણ્ણકનામકા.

૯૩. સદ્ધાદયો વિરમન્તા, અરણા પઞ્ચવીસતિ;

લોભાદિમિદ્ધકન્તાનિ, સરણાનિ ચતુદ્દસ.

૯૪. ઇસ્સામચ્છેરકુક્કુચ્ચદોસા કામે દયા મુદા;

કામે રૂપે ચ સેસા છ-ચત્તાલીસ તિધાતુજા.

૯૫. છન્દનિચ્છયમજ્ઝત્તમનક્કારા સઉદ્ધવા;

દયાદી પઞ્ચ માનાદી, છ યેવાપન સોળસ.

૯૬. છન્દાદી પઞ્ચ નિયતા, તત્થેકાદસ નેતરા;

અહિરીકમનોત્તપ્પં, લોકનાસનકં દ્વયં.

૯૭. એતે દ્વે મોહુદ્ધચ્ચાતિ, ચત્તારો પાપસબ્બગા;

લોકપાલદુકં વુત્તં, હિરિઓત્તપ્પનામકં.

૯૮. આરમ્મણૂપનિજ્ઝાના, ઝાનઙ્ગા તક્કચારકા;

પીતિ એકગ્ગતા ચેતિ, સત્ત વિત્તિત્તયેન વે.

૯૯. સદ્ધા સતિ મતેકગ્ગ-ધિતિ લોકવિનાસકા;

પાલકા નવ ચેતાનિ, બલાનિ અવિકમ્પતો.

૧૦૦. એત્થ સદ્ધાદિપઞ્ચાયુ, કત્વાત્ર ચતુધા મતિં;

વેદનાહિ દ્વિસત્તેતે, ઇન્દ્રિયાનાધિપચ્ચતો.

૧૦૧. મનરૂપિન્દ્રિયેહેતે, સબ્બે ઇન્દ્રિયનામકા;

બાવીસતિ ભવન્તાયુદ્વયં કત્વેકસઙ્ગહં.

૧૦૨. દિટ્ઠીહેકગ્ગતાતક્કસતીવિરતિયો પથા;

અટ્ઠ નિય્યાનતો આદિચતુરો ભિત્વાન દ્વાદસ.

૧૦૩. ફસ્સો ચ ચેતના ચેવ,

દ્વેવેત્થાહારણત્તતો;

આહારા મનવોજાહિ,

ભવન્તિ ચતુરોથવા.

૧૦૪. હેતુ મૂલટ્ઠતો પાપે,

લોભાદિત્તયમીરિતં;

કુસલાબ્યાકતે ચાપિ,

અલોભાદિત્તયં તથા.

૧૦૫. દિટ્ઠિલોભદુસા કમ્મપથાપાયસ્સ મગ્ગતો;

તબ્બિપક્ખા સુગતિયા, તયોતિ છ પથીરિતા.

૧૦૬. પસ્સદ્ધાદિયુગાનિ છ, વગ્ગત્તા યુગળાનિ તુ;

ઉપકારા સતિ ધી ચ, બહૂપકારભાવતો.

૧૦૭. ઓઘાહરણતો યોગા,

યોજનેનાભવગ્ગતો;

સવનેનાસવા દિટ્ઠિ-

મોહેજેત્થ દુધા લુભો.

૧૦૮. દળ્હગ્ગાહેન દિટ્ઠેજા, ઉપાદાનં તિધા તહિં;

દિટ્ઠિ દોસેન તે ગન્થા, ગન્થતો દિટ્ઠિહ દ્વિધા.

૧૦૯. પઞ્ચાવરણતો કામ-કઙ્ખાદોસુદ્ધવં તપો;

થિનમિદ્ધઞ્ચ મોહેન, છ વા નીવરણાનિથ.

૧૧૦. કત્વા તાપુદ્ધવં એકં, થિનમિદ્ધઞ્ચ વુચ્ચતિ;

કિચ્ચસ્સાહારતો ચેવ, વિપક્ખસ્સ ચ લેસતો.

૧૧૧. દિટ્ઠેજુદ્ધવદોસન્ધ-

કઙ્ખાથિનુણ્ણતી દસ;

લોકનાસયુગેનેતે,

કિલેસા ચિત્તક્લેસતો.

૧૧૨. લોભદોસમૂહમાન-દિટ્ઠિકઙ્ખિસ્સમચ્છરા;

સંયોજનાનિ દિટ્ઠેજા, ભિત્વા બન્ધનતો દુધા.

૧૧૩. તાનિ મોહુદ્ધવંમાનકઙ્ખાદોસેજદિટ્ઠિયો;

દુધાદિટ્ઠિ તિધા લોભં, ભિત્વા સુત્તે દસીરિતા.

૧૧૪. દિટ્ઠિલોભમૂહમાનદોસકઙ્ખા તહિં દુધા;

કત્વા લોભમિમે સત્તાનુસયા સમુદીરિતા.

૧૧૫. દિટ્ઠિ એવ પરામાસો, ઞેય્યો એવં સમાસતો;

અત્થો સઙ્ખારક્ખન્ધસ્સ, વુત્તો વુત્તાનુસારતો.

ઇતિ સચ્ચસઙ્ખેપે ખન્ધત્તયસઙ્ખેપો નામ

દુતિયો પરિચ્છેદો.