છટ્ઠો પરિચ્છેદો

૬. ભૂમિપુગ્ગલચિત્તપ્પવત્તિકથા

૨૩૨. કામસુગતિયં હોન્તિ, મહાપાકા યથારહં;

મહગ્ગતવિપાકા ચ, યથાસન્ધિવવત્થિતા.

૨૩૩. વોટ્ઠબ્બકામપુઞ્ઞાનિ, વિયુત્તાનિ ચ દિટ્ઠિયા;

ઉદ્ધચ્ચસહિતઞ્ચેતિ, હોન્તિ સબ્બત્થ ચુદ્દસ.

૨૩૪. સન્તીરણમનોધાતુ-ચક્ખુસોતમના પન;

દસ ચિત્તાનિ જાયન્તિ, સબ્બત્થારૂપવજ્જિતે.

૨૩૫. દિટ્ઠિગતસમ્પયુત્તા, વિચિકિચ્છાયુતા તથા;

પઞ્ચ સબ્બત્થ જાયન્તિ, સુદ્ધાવાસવિવજ્જિતે.

૨૩૬. દોસમૂલદ્વયઞ્ચેવ, ઘાનાદિત્તયમાનસા;

અટ્ઠ સબ્બત્થ જાયન્તિ, મહગ્ગતવિવજ્જિતે.

૨૩૭. ચતુત્થારુપ્પજવનં, અનાગામિફલાદયો;

મહાક્રિયા ચ જાયન્તિ, તેરસાપાયવજ્જિતે.

૨૩૮. હેટ્ઠારુપ્પજવા દ્વે દ્વે, છાપાયુપરિવજ્જિતે;

સિતરૂપજવા હોન્તિ, અરૂપાપાયવજ્જિતે.

૨૩૯. સોતાપત્તિફલાદીનિ, સુદ્ધાપાયવિવજ્જિતે;

પઠમાનુત્તરં સુદ્ધા-પાયારૂપવિવજ્જિતે.

૨૪૦. અવત્થાભૂમિભૂતત્તા, ન ગય્હન્તિ અનુત્તરા;

એકવોકારભૂમિ ચ, રૂપમત્તા ન ગય્હતિ.

૨૪૧. સભુમ્મા સબ્બભુમ્મા ચ, એકદ્વિત્તયવજ્જિતા;

તથારૂપસુદ્ધાવાસ-બ્રહ્માપાયવસાતિ ચ.

૨૪૨. માનસા પઞ્ચ કોટ્ઠાસા, સત્તરસ ચતુદ્દસ;

છત્તિંસતેકવીસા ચ, એકઞ્ચેવ યથાક્કમં.

૨૪૩. અટ્ઠારસાપિ હોન્તેતે, નવધાપિ પુનેકધા;

ચતુધા તિવિધા ચેવ, એકધાતિ ચ ભેદતો.

૨૪૪. તેરસાપિ ચ કોટ્ઠાસા, ભવન્તેકતિભૂમકા;

છસત્તેકાદસસત્ત-રસભૂમકમાનસા.

૨૪૫. એકદ્વયતિચતુક્કપઞ્ચકાધિકવીસજા;

છબ્બીસતિંસજા ચેતિ, યથાનુક્કમતો ભવે.

૨૪૬. ચત્તારિ પુન ચત્તારિ, એકમટ્ઠટ્ઠ ચેકકં;

ચત્તારેકાદસ દ્વે દ્વે, સત્ત તેવીસ ચુદ્દસ.

૨૪૭. ક્રિયાજવમહાપાકા, લોકુત્તરમહગ્ગતા;

દ્વેપઞ્ઞાસ ન લબ્ભન્તિ, ચતુરાપાયભૂમિયં.

૨૪૮. કામાવચરદેવેસુ, છસુ ભુમ્મે ચ માનવે;

કામસુગતિયં નત્થિ, નવ પાકા મહગ્ગતા.

૨૪૯. દોસમૂલમહાપાકા, ઘાનાદિત્તયમાનસા;

નત્થારૂપવિપાકા ચ, વીસતી રૂપભૂમિયં.

૨૫૦. કઙ્ખાદિટ્ઠિયુતા પઞ્ચારૂપપાકા ચતુબ્બિધા;

પઞ્ચાદોનુત્તરા ચેવ, સુદ્ધાવાસે ન લબ્ભરે.

૨૫૧. આદાવજ્જનમગ્ગા ચ, પટિઘારૂપમાનસા;

કામપાકા સિતારૂપે, તેચત્તાલીસ નત્થિ તે.

૨૫૨. સત્તતિંસ પરિત્તા ચ, લબ્ભન્તાપાયભૂમિયં;

માનસાસીતિ લબ્ભન્તિ, કામસુગતિયં પન.

૨૫૩. એકૂનસત્તતિ રૂપે, સુદ્ધે પઞ્ઞાસ પઞ્ચ ચ;

છચત્તાલીસ આરુપ્પે, નત્થાસઞ્ઞીસુ કિઞ્ચિપિ.

૨૫૪. ઇત્થમેકદ્વિતિચતુપઞ્ચભુમ્માનિ સોળસ;

દસ પઞ્ચદસેવાથ, ચતુત્તિંસ ચતુદ્દસ.

૨૫૫. અપાયાહેતુકાનં તુ, મહાપાકક્રિયાજવે;

હિત્વા સેસપરિત્તાનિ, ચિત્તાનિ પન લબ્ભરે.

૨૫૬. દ્વિહેતુકાહેતુકાનં, સેસાનં કામમાનસા;

લબ્ભન્તિ પન હિત્વાન, ઞાણપાકક્રિયાજવે.

૨૫૭. તિહેતુકાનં સત્તાનં, તત્થ તત્થૂપપત્તિયં;

તત્થ તત્થૂપપન્નાનં, લબ્ભમાનાનિ લબ્ભરે.

૨૫૮. તિહેતુકાનં સબ્બેપિ, માનસાપાયપાણિનં;

સત્તતિંસાવસેસાનં, એકતાલીસ નિદ્દિસે.

૨૫૯. પુથુજ્જનાન સેક્ખાનં, ન સન્તિ જવનક્રિયા;

ન સન્તિ વીતરાગાનં, પુઞ્ઞાપુઞ્ઞાનિ સબ્બથા.

૨૬૦. કઙ્ખાદિટ્ઠિયુતા પઞ્ચ, સેક્ખાનં નત્થિ માનસા;

દોસમૂલદ્વયઞ્ચાપિ, નત્થાનાગામિનો પન.

૨૬૧. વવત્થિતારિયેસ્વેવ, યથાસકમનુત્તરા;

મગ્ગટ્ઠાનં સકો મગ્ગો, નત્થઞ્ઞં કિઞ્ચિ સબ્બથા.

૨૬૨. પુથુજ્જનાનં દ્વિન્નમ્પિ, ફલટ્ઠાનં યથાક્કમં;

તતિયસ્સ ફલટ્ઠસ્સ, ચતુત્થસ્સ ચ સમ્ભવા.

૨૬૩. તેસટ્ઠિ ચેવ ચિત્તાનિ, લબ્ભન્તેકૂનસટ્ઠિ ચ;

સત્તપઞ્ઞાસ ચિત્તાનિ, તેપઞ્ઞાસ ચ સબ્બથા.

૨૬૪. ચતુપઞ્ઞાસ પઞ્ઞાસ, પઞ્ઞાસદ્વયહીનકા;

કામેસુ તેસં સમ્ભોન્તિ, ચતુતાલીસ ચક્કમા.

૨૬૫. તેચત્તાલીસ ચેકૂનચત્તાલીસ યથાક્કમં;

ભવન્તેકૂનતાલીસ, પઞ્ચત્તિંસ ચ રૂપિસુ.

૨૬૬. સત્તવીસ ચ તેવીસ, તેવીસ ચ યથાક્કમં;

આરુપ્પેસુપિ લબ્ભન્તિ, તેસમટ્ઠારસેવ ચ.

૨૬૭. પુથુજ્જના ચ ચત્તારો, અપાયાહેતુકાદયો;

અરિયા ચેવ અટ્ઠાતિ, દ્વાદસન્નં વસા સિયું.

૨૬૮. છબ્બિધા ચિત્તકોટ્ઠાસા, એકપુગ્ગલિકા તથા;

ચતુપઞ્ચછસત્તટ્ઠ-પુગ્ગલટ્ઠાતિ ચક્કમા.

૨૬૯. છબ્બીસ ચુદ્દસેવાથ, તેરસ દ્વે ચ માનસા;

દસ સત્તાધિકા ચેવ, પુન સત્તાધિકા દસાતિ.

ઇતિ ચિત્તવિભાગે ભૂમિપુગ્ગલચિત્તપ્પવત્તિકથા નિટ્ઠિતા.

છટ્ઠો પરિચ્છેદો.