૮. ચેતસિકસમ્પયોગકથા

૨૮૬. ઇતિ ચિત્તવિધિં ઞત્વા, દ્વેપઞ્ઞાસ વિભાવિના;

ઞેય્યા ચેતસિ સમ્ભૂતા, ધમ્મા ચેતસિકા કથં.

૨૮૭. ફસ્સો ચ વેદના સઞ્ઞા, ચેતનેકગ્ગતા તથા;

જીવિતં મનસિકારો, સત્ત સાધારણા ઇમે.

૨૮૮. વિતક્કો ચ વિચારો ચ, પીતિ ચ વીરિયં તથા;

છન્દો ચ અધિમોક્ખો ચ, છ પકિણ્ણકનામકા.

૨૮૯. પુઞ્ઞાપુઞ્ઞેસુ પાકેસુ, ક્રિયાસુ ચ યથારહં;

માનસેસુ પવત્તન્તિ, વિપ્પકિણ્ણા પકિણ્ણકા.

૨૯૦. સદ્ધા સતિન્દ્રિયઞ્ચેવ, હિરોત્તપ્પબલદ્વયં;

અલોભો ચ અદોસો ચ, પઞ્ઞા મજ્ઝત્તતાપિ ચ.

૨૯૧. અટ્ઠેતે ઉત્તમા નામ, ધમ્મા ઉત્તમસાધના;

નિવજ્જાતિ પવુચ્ચન્તિ, યુગળા છ તતોપરે.

૨૯૨. પસ્સદ્ધિ કાયચિત્તાનં, લહુતા મુદુતા તથા;

કમ્મઞ્ઞતા ચ પાગુઞ્ઞ-તા ચ ઉજુકતાતિ ચ.

૨૯૩. અપ્પમઞ્ઞાદ્વયં નામ, કરુણામુદિતા સિયું;

સમ્માવાચા ચ કમ્મન્તા-જીવા ચ વિરતિત્તયં.

૨૯૪. પઞ્ચવીસ પનિચ્ચેતે, અનવજ્જા યથારહં;

પાપાહેતુકમુત્તેસુ, અનવજ્જેસુ જાયરે.

૨૯૫. લોભો દોસો ચ મોહો ચ,

માનો દિટ્ઠિ ચ સંસયો;

થિનમિદ્ધઞ્ચ ઉદ્ધચ્ચં,

કુક્કુચ્ચઞ્ચ તથા દસ.

૨૯૬. અહિરીકમનોત્તપ્પં, ઇસ્સા મચ્છરિયન્તિ ચ;

હોન્તિ ચુદ્દસ સાવજ્જા, સાવજ્જેસ્વેવ સમ્ભવા.

૨૯૭. દ્વેપઞ્ઞાસ ચતુદ્ધેવં, ધમ્મા ચેતસિકા ઠિતા;

તેસં દાનિ પવક્ખામિ, સમ્પયોગઞ્ચ સઙ્ગહં.

૨૯૮. સત્ત સાધારણા સબ્બ-ચિત્તસાધારણા તતો;

ચિત્તેન સદ્ધિ અટ્ઠન્નં, વિપ્પયોગો ન કત્થચિ.

૨૯૯. વિતક્કો પઞ્ચવિઞ્ઞાણં, દુતિયાદિવિવજ્જિતે;

વિચારોપિ ચ તત્થેવ, તતિયાદિવિવજ્જિતે.

૩૦૦. સોમનસ્સયુતે પીતિ-ચતુત્થજ્ઝાનવજ્જિતે;

વીરિયં પઠમાવજ્જ-વિપાકાહેતુવજ્જિતે.

૩૦૧. છન્દો સમ્ભોતિ સબ્બત્થ, મોમૂહાહેતુવજ્જિતે;

અધિમોક્ખો વિચિકિચ્છા-પઞ્ચવિઞ્ઞાણવજ્જિતે.

૩૦૨. છસટ્ઠિ પઞ્ચપઞ્ઞાસ, સત્તતિ ચેવ સોળસ;

વીસતેકાદસેવાથ, પકિણ્ણકવિવજ્જિતા.

૩૦૩. માનસા પઞ્ચપઞ્ઞાસ, સવિતક્કા છસટ્ઠિ ચ;

સવિચારેકપઞ્ઞાસ, સપ્પીતિકમના તથા.

૩૦૪. તેસત્તતિ સવીરિયા, સછન્દેકૂનસત્તતિ;

સાધિમોક્ખા પવુચ્ચન્તિ, અટ્ઠસત્તતિ માનસા.

૩૦૫. પઞ્ઞાપ્પમઞ્ઞાવિરતી, હિત્વા એકૂનસટ્ઠિસુ;

પાપાહેતુકમુત્તેસુ, સદ્ધાદેકૂનવીસતિ.

૩૦૬. દ્વિહેતુકાહેતુપાપવજ્જિતેસુ સમાસતો;

પઞ્ઞા તુ જાયતે સત્તચત્તાલીસેસુ સબ્બથા.

૩૦૭. મહાક્રિયાકામપુઞ્ઞ-રૂપજ્ઝાનેસુ જાયરે;

અપ્પમઞ્ઞાટ્ઠવીસેસુ, હિત્વા ઝાનં તુ પઞ્ચમં.

૩૦૮. લોકુત્તરેસુ સબ્બત્થ, સહેવ વિરતિત્તયં;

કામપુઞ્ઞેસુ સમ્ભોતિ, યથાસમ્ભવતો વિસું.

૩૦૯. વિરતીઅપ્પમઞ્ઞાસુ, પઞ્ચસ્વપિ યથારહં;

કદાચિદેવ સમ્ભોતિ, એકેકોવ ન ચેકતો.

૩૧૦. અહિરીકમનોત્તપ્પં, મોહઉદ્ધચ્ચમેવ ચ;

પાપસાધારણા નામ, ચત્તારો પાપસમ્ભવા.

૩૧૧. લોભો ચ લોભમૂલેસુ, દિટ્ઠિયુત્તેસુ દિટ્ઠિ ચ;

માનો દિટ્ઠિવિયુત્તેસુ, દિટ્ઠિમાના ન ચેકતો.

૩૧૨. દોસમૂલેસુ દોસો ચ, ઇસ્સા મચ્છરિયં તથા;

કુક્કુચ્ચમિતિ ચત્તારો, વિચિકિચ્છા તુ કઙ્ખિતે.

૩૧૩. સહેવ થિનમિદ્ધં તુ, સસઙ્ખારેસુ પઞ્ચસુ;

ઇતિ ચુદ્દસ સાવજ્જા, સાવજ્જેસ્વેવ નિચ્છિતા.

૩૧૪. માનો ચ થિનમિદ્ધઞ્ચ, સહ વાથ વિસું ન વા;

ઇસ્સામચ્છેરકુક્કુચ્ચા, અઞ્ઞમઞ્ઞં વિસું ન વાતિ.

ઇતિ ચેતસિકવિભાગે ચેતસિકસમ્પયોગકથા નિટ્ઠિતા.

અટ્ઠમો પરિચ્છેદો.