નવમો પરિચ્છેદો

૯. ચેતસિકસઙ્ગહકથા

૩૧૫. સત્ત સાધારણા ચેવ, છ ધમ્મા ચ પકિણ્ણકા;

સદ્ધાદિ પઞ્ચવીસેતિ, અટ્ઠતિંસ સમિસ્સિતા.

૩૧૬. કામાવચરપુઞ્ઞેસુ, લબ્ભન્તિ પઠમદ્વયે;

સત્તતિંસેવ દુતિયે, પઞ્ઞામત્તવિવજ્જિતા.

૩૧૭. તતિયે ચ યથાવુત્તા, પીતિમત્તવિવજ્જિતા;

છત્તિંસેવ ચતુત્થમ્હિ, પઞ્ઞાપીતિદ્વયં વિના.

૩૧૮. મહાક્રિયાસુ યુજ્જન્તિ, હિત્વા વિરતિયો તથા;

પઞ્ચતિંસ ચતુત્તિંસદ્વયં તેત્તિંસકં કમા.

૩૧૯. ઠપેત્વા અપ્પમઞ્ઞા ચ, મહાપાકેસુ યોજિતા;

તેત્તિંસા ચેવ દ્વત્તિંસદ્વયેકત્તિંસકં કમા.

૩૨૦. અપ્પમઞ્ઞા ગહેત્વાન, હિત્વા વિરતિયો તથા;

પઞ્ચતિંસેવ પઠમે, રૂપાવચરમાનસે.

૩૨૧. વિતક્કં દુતિયે હિત્વા, વિચારઞ્ચ તતો પરં;

ચતુત્થે પન પીતિઞ્ચ, અપ્પમઞ્ઞઞ્ચ પઞ્ચમે.

૩૨૨. યથાવુત્તપકારાવ, ચતુત્તિંસ યથાક્કમં;

તેત્તિંસ ચેવ દ્વત્તિંસ, સમતિંસઞ્ચ લબ્ભરે.

૩૨૩. પઞ્ચમેન સમાના ચ, ઠપેત્વારુપ્પમાનસા;

ભૂમારમ્મણભેદઞ્ચ, અઙ્ગાનઞ્ચ પણીતતં.

૩૨૪. અપ્પમઞ્ઞા ઠપેત્વાન, ગહેત્વા વિરતિત્તયં;

છત્તિંસાનુત્તરે હોન્તિ, પઠમજ્ઝાનમાનસે.

૩૨૫. વિતક્કં દુતિયે હિત્વા, વિચારઞ્ચ તતો પરં;

પીતિં હિત્વા ચતુત્થે ચ, પઞ્ચમેપિ ચ સબ્બથા.

૩૨૬. યથાવુત્તપ્પકારાવ, પઞ્ચતિંસ યથાક્કમં;

ચતુત્તિંસઞ્ચ તેત્તિંસ, તથા તેત્તિંસ ચાપરે.

૩૨૭. એવં બાવીસધા ભેદો, અનવજ્જેસુ સઙ્ગહો;

એકૂનસટ્ઠિચિત્તેસુ, અટ્ઠતિંસાનમીરિતો.

૩૨૮. વિરતી અપ્પમઞ્ઞા ચ, ગહેત્વા પન સબ્બસો;

એકમેકં ગહેત્વા ચ, પચ્ચક્ખાય ચ સબ્બથા.

૩૨૯. કામેસુ સત્તધા પુઞ્ઞે, ચતુધા ચ ક્રિયે તથા;

રૂપજ્ઝાનચતુક્કે ચ, કત્તબ્બોયમ્પિ સઙ્ગહો.

૩૩૦. ઇમિના પનુપાયેન, સમસત્તતિ ભેદતો;

અનવજ્જેસુ વિઞ્ઞેય્યો, ચિત્તુપ્પાદેસુ સઙ્ગહો.

૩૩૧. ઇતિ સબ્બપ્પકારેન, અનવજ્જવિનિચ્છયં;

ઞત્વા યોજેય્ય મેધાવી, સાવજ્જેસુ ચ સઙ્ગહં.

૩૩૨. સત્ત સાધારણા ચેવ, છ ધમ્મા ચ પકિણ્ણકા;

ચત્તારો પાપસામઞ્ઞા, ધમ્મા સત્તરસેવિમે.

૩૩૩. એકૂનવીસાસઙ્ખારે, પઠમે લોભદિટ્ઠિયા;

દુતિયે લોભમાનેન, યથાવુત્તા ચ તત્તકા.

૩૩૪. અટ્ઠારસ વિના પીતિં, તતિયે લોભદિટ્ઠિયા;

ચતુત્થેપિ વિના પીતિં, લોભમાનેન તત્તકા.

૩૩૫. પટિઘે ચ વિના પીતિં, અસઙ્ખારે તથેવ તે;

લબ્ભન્તિ દોસકુક્કુચ્ચ-મચ્છરિયાહિ વીસતિ.

૩૩૬. અસઙ્ખારેસુ વુત્તા ચ, સસઙ્ખારેસુ પઞ્ચધા;

થિનમિદ્ધેનેકવીસ, વીસ દ્વેવીસતિક્કમા.

૩૩૭. છન્દં પીતિઞ્ચ ઉદ્ધચ્ચે, હિત્વા પઞ્ચદસેવ તે;

હિત્વા વિમોક્ખં કઙ્ખઞ્ચ, ગહેત્વા કઙ્ખિતે તથા.

૩૩૮. સત્તવીસતિધમ્માનં, ઇતિ દ્વાદસ સઙ્ગહા;

દ્વાદસાપુઞ્ઞચિત્તેસુ, વિઞ્ઞાતબ્બા વિભાવિના.

૩૩૯. હિત્વા છાનિયતે ધમ્મે, ગહેત્વા ચ યથારહં;

ચતુત્તિંસાપિ વિઞ્ઞેય્યા, સઙ્ગહા તત્થ વિઞ્ઞુના.

૩૪૦. દ્વાદસાકુસલેસ્વેવ, ઞત્વા સઙ્ગહમુત્તરં;

ઞેય્યાહેતુકચિત્તેસુ, સઙ્ગહં કમતો કથં?

૩૪૧. સત્ત સાધારણા છન્દવજ્જિતા ચ પકિણ્ણકા;

હસિતુપ્પાદચિત્તમ્હિ, દ્વાદસેવ પકાસિતા.

૩૪૨. વોટ્ઠબ્બે ચ વિના પીતિં, વીરિયં સુખતીરણે;

એકાદસ યથાવુત્તા, ધમ્મા દ્વીસુપિ દેસિતા.

૩૪૩. મનોધાતુત્તિકે ચેવ, ઉપેક્ખાતીરણદ્વયે;

દસ હોન્તિ યથાવુત્તા, હિત્વા વીરિયપીતિયો.

૩૪૪. સત્ત સાધારણા એવ, પઞ્ચવિઞ્ઞાણસમ્ભવા;

ઇચ્ચાહેતુકચિત્તેસુ, પઞ્ચધા સઙ્ગહો ઠિતો.

૩૪૫. ઇતિ ચેતસિકે ધમ્મે, ચિત્તેસુ ગણિતે પુન;

ચિત્તેન સહ સઙ્ગય્હ, ગણેય્યાપિ ચ પણ્ડિતો.

૩૪૬. અટ્ઠતિંસાતિ યે વુત્તા, ચિત્તેન સહ તે પુન;

એકૂનચત્તાલીસેતિ, સબ્બત્થેકાધિકં નયે.

૩૪૭. બાવીસેવં દસ દ્વે ચ, પઞ્ચ ચેતિ યથારહં;

સઙ્ગહા સમ્પયુત્તાનં, તાલીસેકૂનકા કથા.

૩૪૮. વિતક્કો ચ વિચારો ચ, પીતિ પઞ્ઞા તથા પન;

અપ્પમઞ્ઞા વિરતીતિ, નવ ધમ્મા યથારહં.

૩૪૯. ગહેતબ્બાપનેતબ્બા, ભવન્તિ અનવજ્જકે;

પરિવત્તેતિ સબ્બત્થ, વેદના તુ યથારહં.

૩૫૦. છન્દાધિમોક્ખવીરિયા, સદ્ધાદેકૂનવીસતિ;

ફસ્સાદયો છળેવાતિ, ન ચલન્તટ્ઠવીસતિ.

૩૫૧. તેરસેવ તુ સાવજ્જે, છળેવાહેતુમાનસે;

ન ચલન્તિ દસ અઞ્ઞે, ચુદ્દસા છ ચ સમ્ભવાતિ.

ઇતિ ચેતસિકવિભાગે ચેતસિકસઙ્ગહકથા નિટ્ઠિતા.

નવમો પરિચ્છેદો.