૯. અમ્બપાલિવનસુત્તં

૯૦૭. એકં સમયં આયસ્મા ચ અનુરુદ્ધો આયસ્મા ચ સારિપુત્તો વેસાલિયં વિહરન્તિ અમ્બપાલિવને. અથ ખો આયસ્મા સારિપુત્તો સાયન્હસમયં પટિસલ્લાના વુટ્ઠિતો…પે… એકમન્તં નિસિન્નો ખો આયસ્મા સારિપુત્તો આયસ્મન્તં અનુરુદ્ધં એતદવોચ –

‘‘વિપ્પસન્નાનિ ખો તે, આવુસો અનુરુદ્ધ, ઇન્દ્રિયાનિ, પરિસુદ્ધો મુખવણ્ણો પરિયોદાતો. કતમેનાયસ્મા અનુરુદ્ધો વિહારેન એતરહિ બહુલં વિહરતી’’તિ? ‘‘ચતૂસુ ખ્વાહં, આવુસો, સતિપટ્ઠાનેસુ સુપ્પતિટ્ઠિતચિત્તો એતરહિ બહુલં વિહરામિ. કતમેસુ ચતૂસુ? ઇધાહં, આવુસો, કાયે કાયાનુપસ્સી વિહરામિ આતાપી સમ્પજાનો સતિમા, વિનેય્ય લોકે અભિજ્ઝાદોમનસ્સં; વેદનાસુ…પે… ચિત્તે…પે… ધમ્મેસુ ધમ્માનુપસ્સી વિહરામિ આતાપી સમ્પજાનો સતિમા, વિનેય્ય લોકે અભિજ્ઝાદોમનસ્સં – ઇમેસુ ખ્વાહં, આવુસો, ચતૂસુ સતિપટ્ઠાનેસુ સુપ્પતિટ્ઠિતચિત્તો એતરહિ બહુલં વિહરામિ. યો સો, આવુસો, ભિક્ખુ અરહં ખીણાસવો વુસિતવા કતકરણીયો ઓહિતભારો અનુપ્પત્તસદત્થો પરિક્ખીણભવસંયોજનો સમ્મદઞ્ઞા વિમુત્તો, સો ઇમેસુ ચતૂસુ સતિપટ્ઠાનેસુ સુપ્પતિટ્ઠિતચિત્તો બહુલં વિહરતી’’તિ.

‘‘લાભા વત નો, આવુસો, સુલદ્ધં વત નો, આવુસો! યે મયં આયસ્મતો અનુરુદ્ધસ્સ સમ્મુખાવ અસ્સુમ્હ આસભિં વાચં ભાસમાનસ્સા’’તિ. નવમં.