૧૦. બાળ્હગિલાનસુત્તં

૯૦૮. એકં સમયં આયસ્મા અનુરુદ્ધો સાવત્થિયં વિહરતિ અન્ધવનસ્મિં આબાધિકો દુક્ખિતો બાળ્હગિલાનો. અથ ખો સમ્બહુલા ભિક્ખૂ યેનાયસ્મા અનુરુદ્ધો તેનુપસઙ્કમિંસુ; ઉપસઙ્કમિત્વા આયસ્મન્તં અનુરુદ્ધં એતદવોચું –

‘‘કતમેનાયસ્મતો અનુરુદ્ધસ્સ વિહારેન વિહરતો ઉપ્પન્ના સારીરિકા દુક્ખા વેદના ચિત્તં ન પરિયાદાય તિટ્ઠન્તી’’તિ? ‘‘ચતૂસુ ખો મે, આવુસો, સતિપટ્ઠાનેસુ સુપ્પતિટ્ઠિતચિત્તસ્સ વિહરતો ઉપ્પન્ના સારીરિકા દુક્ખા વેદના ચિત્તં ન પરિયાદાય તિટ્ઠન્તિ. કતમેસુ ચતૂસુ? ઇધાહં, આવુસો, કાયે કાયાનુપસ્સી વિહરામિ…પે… વેદનાસુ…પે… ચિત્તે…પે… ધમ્મેસુ ધમ્માનુપસ્સી વિહરામિ આતાપી સમ્પજાનો સતિમા, વિનેય્ય લોકે અભિજ્ઝાદોમનસ્સં – ઇમેસુ ખો મે, આવુસો, ચતૂસુ સતિપટ્ઠાનેસુ સુપ્પતિટ્ઠિતચિત્તસ્સ વિહરતો ઉપ્પન્ના સારીરિકા દુક્ખા વેદના ચિત્તં ન પરિયાદાય તિટ્ઠન્તી’’તિ. દસમં.

રહોગતવગ્ગો પઠમો.

તસ્સુદ્દાનં –

રહોગતેન દ્વે વુત્તા, સુતનુ કણ્ડકી તયો;

તણ્હક્ખયસલળાગારં, અમ્બપાલિ ચ ગિલાનન્તિ.