૬. દુતિયમહાપથવીસુત્તં

૧૧૨૬. ‘‘સેય્યથાપિ, ભિક્ખવે, મહાપથવી પરિક્ખયં પરિયાદાનં ગચ્છેય્ય ઠપેત્વા સત્ત કોલટ્ઠિમત્તિયો ગુળિકા. તં કિં મઞ્ઞથ, ભિક્ખવે, કતમં નુ ખો બહુતરં – યં વા મહાપથવિયા પરિક્ખીણં પરિયાદિન્નં, યા વા સત્ત કોલટ્ઠિમત્તિયો ગુળિકા અવસિટ્ઠા’’તિ? ‘‘એતદેવ, ભન્તે, બહુતરં મહાપથવિયા યદિદં પરિક્ખીણં પરિયાદિન્નં; અપ્પમત્તિકા સત્ત કોલટ્ઠિમત્તિયો ગુળિકા અવસિટ્ઠા. સઙ્ખમ્પિ ન ઉપેન્તિ, ઉપનિધમ્પિ ન ઉપેન્તિ, કલભાગમ્પિ ન ઉપેન્તિ મહાપથવિયા પરિક્ખીણં પરિયાદિન્નં ઉપનિધાય સત્ત કોલટ્ઠિમત્તિયો ગુળિકા અવસિટ્ઠા’’તિ. ‘‘એવમેવ ખો, ભિક્ખવે, અરિયસાવકસ્સ…પે… યોગો કરણીયો’’તિ. છટ્ઠં.