૩. પઠમકુલપુત્તસુત્તં

૧૦૭૩. ‘‘યે હિ કેચિ, ભિક્ખવે, અતીતમદ્ધાનં કુલપુત્તા સમ્મા અગારસ્મા અનગારિયં પબ્બજિંસુ, સબ્બે તે ચતુન્નં અરિયસચ્ચાનં યથાભૂતં અભિસમયાય. યે હિ કેચિ, ભિક્ખવે, અનાગતમદ્ધાનં કુલપુત્તા સમ્મા અગારસ્મા અનગારિયં પબ્બજિસ્સન્તિ, સબ્બે તે ચતુન્નં અરિયસચ્ચાનં યથાભૂતં અભિસમયાય. યે હિ કેચિ, ભિક્ખવે, એતરહિ કુલપુત્તા સમ્મા અગારસ્મા અનગારિયં પબ્બજન્તિ, સબ્બે તે ચતુન્નં અરિયસચ્ચાનં યથાભૂતં અભિસમયાય.

‘‘કતમેસં ચતુન્નં? દુક્ખસ્સ અરિયસચ્ચસ્સ દુક્ખસમુદયસ્સ અરિયસચ્ચસ્સ દુક્ખનિરોધસ્સ અરિયસચ્ચસ્સ દુક્ખનિરોધગામિનિયા પટિપદાય અરિયસચ્ચસ્સ. યે હિ કેચિ, ભિક્ખવે, અતીતમદ્ધાનં કુલપુત્તા સમ્મા અગારસ્મા અનગારિયં પબ્બજિંસુ…પે… પબ્બજિસ્સન્તિ…પે… પબ્બજન્તિ, સબ્બે તે ઇમેસંયેવ ચતુન્નં અરિયસચ્ચાનં યથાભૂતં અભિસમયાય.

‘‘તસ્માતિહ, ભિક્ખવે, ‘ઇદં દુક્ખ’ન્તિ યોગો કરણીયો, ‘અયં દુક્ખસમુદયો’તિ યોગો કરણીયો, ‘અયં દુક્ખનિરોધો’તિ યોગો કરણીયો, ‘અયં દુક્ખનિરોધગામિની પટિપદા’તિ યોગો કરણીયો’’તિ. તતિયં.