૨. રાજકારામવગ્ગો

૧. સહસ્સભિક્ખુનિસઙ્ઘસુત્તં

૧૦૦૭. એકં સમયં ભગવા સાવત્થિયં વિહરતિ રાજકારામે. અથ ખો સહસ્સભિક્ખુનિસઙ્ઘો [સહસ્સો ભિક્ખુનિસંઘો (સી.)] યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતા ખો તા ભિક્ખુનિયો ભગવા એતદવોચ –

‘‘ચતૂહિ ખો, ભિક્ખુનિયો, ધમ્મેહિ સમન્નાગતો અરિયસાવકો સોતાપન્નો હોતિ અવિનિપાતધમ્મો નિયતો સમ્બોધિપરાયણો. કતમેહિ ચતૂહિ? ઇધ, ભિક્ખુનિયો, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે …પે… સઙ્ઘે…પે… અરિયકન્તેહિ સીલેહિ સમન્નાગતો હોતિ, અખણ્ડેહિ…પે… સમાધિસંવત્તનિકેહિ. ઇમેહિ ખો, ભિક્ખુનિયો, ચતૂહિ ધમ્મેહિ સમન્નાગતો અરિયસાવકો સોતાપન્નો હોતિ અવિનિપાતધમ્મો નિયતો સમ્બોધિપરાયણો’’તિ. પઠમં.

૨. બ્રાહ્મણસુત્તં

૧૦૦૮. સાવત્થિનિદાનં. ‘‘બ્રાહ્મણા, ભિક્ખવે, ઉદયગામિનિં નામ પટિપદં પઞ્ઞપેન્તિ. તે સાવકં એવં સમાદપેન્તિ – ‘એહિ ત્વં, અમ્ભો પુરિસ, કાલસ્સેવ ઉટ્ઠાય પાચીનમુખો યાહિ. સો ત્વં મા સોબ્ભં પરિવજ્જેહિ, મા પપાતં, મા ખાણું, મા કણ્ડકઠાનં [કણ્ડકં ઠાનં (પી. ક.)], મા ચન્દનિયં, મા ઓળિગલ્લં. યત્થ [યત્થેવ (સ્યા. કં.), યાનિ વા (સી.)] પપતેય્યાસિ તત્થેવ મરણં આગમેય્યાસિ. એવં ત્વં, અમ્ભો પુરિસ, કાયસ્સ ભેદા પરં મરણા સુગતિં સગ્ગં લોકં ઉપપજ્જિસ્સસી’’’તિ.

‘‘તં ખો પનેતં, ભિક્ખવે, બ્રાહ્મણાનં બાલગમનમેતં [બાલાનં ગમનમેતં (સી.)] મૂળ્હગમનમેતં ન નિબ્બિદાય ન વિરાગાય ન નિરોધાય ન ઉપસમાય ન અભિઞ્ઞાય ન સમ્બોધાય ન નિબ્બાનાય સંવત્તતિ. અહઞ્ચ ખો, ભિક્ખવે, અરિયસ્સ વિનયે ઉદયગામિનિં પટિપદં પઞ્ઞપેમિ; યા એકન્તનિબ્બિદાય વિરાગાય નિરોધાય ઉપસમાય અભિઞ્ઞાય સમ્બોધાય નિબ્બાનાય સંવત્તતિ.

‘‘કતમા ચ સા, ભિક્ખવે, ઉદયગામિની પટિપદા; યા એકન્તનિબ્બિદાય…પે… નિબ્બાનાય સંવત્તતિ? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા અરહં સમ્માસમ્બુદ્ધો…પે… સત્થા દેવમનુસ્સાનં બુદ્ધો ભગવાતિ; ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. અયં ખો સા, ભિક્ખવે, ઉદયગામિની પટિપદા એકન્તનિબ્બિદાય…પે… નિબ્બાનાય સંવત્તતી’’તિ. દુતિયં.

૩. આનન્દત્થેરસુત્તં

૧૦૦૯. એકં સમયં આયસ્મા ચ આનન્દો આયસ્મા ચ સારિપુત્તો સાવત્થિયં વિહરન્તિ જેતવને અનાથપિણ્ડિકસ્સ આરામે. અથ ખો આયસ્મા સારિપુત્તો સાયન્હસમયં પટિસલ્લાના વુટ્ઠિતો યેનાયસ્મા આનન્દો તેનુપસઙ્કમિ; ઉપસઙ્કમિત્વા આયસ્મતા આનન્દેન સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો આયસ્મા સારિપુત્તો આયસ્મન્તં આનન્દં એતદવોચ – ‘‘કતિનં ખો, આવુસો આનન્દ, ધમ્માનં પહાના, કતિનં ધમ્માનં સમન્નાગમનહેતુ, એવમયં પજા ભગવતા બ્યાકતા સોતાપન્ના અવિનિપાતધમ્મા નિયતા સમ્બોધિપરાયણા’’તિ? ‘‘ચતુન્નં ખો, આવુસો, ધમ્માનં પહાના, ચતુન્નં ધમ્માનં સમન્નાગમનહેતુ, એવમયં પજા ભગવતા બ્યાકતા સોતાપન્ના અવિનિપાતધમ્મા નિયતા સમ્બોધિપરાયણા’’તિ.

‘‘કતમેસં ચતુન્નં? યથારૂપેન ખો, આવુસો, બુદ્ધે અપ્પસાદેન સમન્નાગતો અસ્સુતવા પુથુજ્જનો કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ તથારૂપસ્સ બુદ્ધે અપ્પસાદો ન હોતિ. યથારૂપેન ચ ખો, આવુસો, બુદ્ધે અવેચ્ચપ્પસાદેન સમન્નાગતો સુતવા અરિયસાવકો કાયસ્સ ભેદા પરં મરણા સુગતિં સગ્ગં લોકં ઉપપજ્જતિ તથારૂપસ્સ બુદ્ધે અવેચ્ચપ્પસાદો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવા’’તિ.

‘‘યથારૂપેન ચ ખો, આવુસો, ધમ્મે અપ્પસાદેન સમન્નાગતો અસ્સુતવા પુથુજ્જનો કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ તથારૂપસ્સ ધમ્મે અપ્પસાદો ન હોતિ. યથારૂપેન ચ ખો, આવુસો, ધમ્મે અવેચ્ચપ્પસાદેન સમન્નાગતો સુતવા અરિયસાવકો કાયસ્સ ભેદા પરં મરણા સુગતિં સગ્ગં લોકં ઉપપજ્જતિ તથારૂપસ્સ ધમ્મે અવેચ્ચપ્પસાદો હોતિ – સ્વાક્ખાતો ભગવતા ધમ્મો…પે… વિઞ્ઞૂહીતિ.

‘‘યથારૂપેન ચ ખો, આવુસો, સઙ્ઘે અપ્પસાદેન સમન્નાગતો અસ્સુતવા પુથુજ્જનો કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ તથારૂપસ્સ સઙ્ઘે અપ્પસાદો ન હોતિ. યથારૂપેન ચ ખો, આવુસો, સઙ્ઘે અવેચ્ચપ્પસાદેન સમન્નાગતો સુતવા અરિયસાવકો કાયસ્સ ભેદા પરં મરણા સુગતિં સગ્ગં લોકં ઉપપજ્જતિ તથારૂપસ્સ સઙ્ઘે અવેચ્ચપ્પસાદો હોતિ – સુપ્પટિપન્નો ભગવતો સાવકસઙ્ઘો…પે… અનુત્તરં પુઞ્ઞક્ખેત્તં લોકસ્સાતિ.

‘‘યથારૂપેન ચ ખો, આવુસો, દુસ્સીલ્યેન સમન્નાગતો અસ્સુતવા પુથુજ્જનો કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ તથારૂપસ્સ દુસ્સીલ્યં ન હોતિ. યથારૂપેહિ ચ ખો, આવુસો, અરિયકન્તેહિ સીલેહિ સમન્નાગતો સુતવા અરિયસાવકો કાયસ્સ ભેદા પરં મરણા સુગતિં સગ્ગં લોકં ઉપપજ્જતિ તથારૂપાનિ અરિયકન્તાનિ સીલાનિ હોન્તિ અખણ્ડાનિ…પે… સમાધિસંવત્તનિકાનિ. ઇમેસં ખો, આવુસો, ચતુન્નં ધમ્માનં પહાના ઇમેસં ચતુન્નં ધમ્માનં સમન્નાગમનહેતુ એવમયં પજા ભગવતા બ્યાકતા સોતાપન્ના અવિનિપાતધમ્મા નિયતા સમ્બોધિપરાયણા’’તિ. તતિયં.

૪. દુગ્ગતિભયસુત્તં

૧૦૧૦. ‘‘ચતૂહિ, ભિક્ખવે, ધમ્મેહિ સમન્નાગતો અરિયસાવકો સબ્બદુગ્ગતિભયં સમતિક્કન્તો હોતિ. કતમેહિ ચતૂહિ? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. ઇમેહિ ખો, ભિક્ખવે, ચતૂહિ ધમ્મેહિ સમન્નાગતો અરિયસાવકો સબ્બદુગ્ગતિભયં સમતિક્કન્તો હોતી’’તિ. ચતુત્થં.

૫. દુગ્ગતિવિનિપાતભયસુત્તં

૧૦૧૧. ‘‘ચતૂહિ, ભિક્ખવે, ધમ્મેહિ સમન્નાગતો અરિયસાવકો સબ્બદુગ્ગતિવિનિપાતભયં સમતિક્કન્તો હોતિ. કતમેહિ ચતૂહિ? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. ઇમેહિ ખો, ભિક્ખવે, ચતૂહિ ધમ્મેહિ સમન્નાગતો અરિયસાવકો સબ્બદુગ્ગતિવિનિપાતભયં સમતિક્કન્તો હોતી’’તિ. પઞ્ચમં.

૬. પઠમમિત્તામચ્ચસુત્તં

૧૦૧૨. ‘‘યે તે, ભિક્ખવે, અનુકમ્પેય્યાથ, યે ચ સોતબ્બં મઞ્ઞેય્યું – મિત્તા વા અમચ્ચા વા ઞાતી વા સાલોહિતા વા – તે, ભિક્ખવે, ચતૂસુ સોતાપત્તિયઙ્ગેસુ સમાદપેતબ્બા, નિવેસેતબ્બા, પતિટ્ઠાપેતબ્બા. કતમેસુ ચતૂસુ? બુદ્ધે અવેચ્ચપ્પસાદે સમાદપેતબ્બા, નિવેસેતબ્બા, પતિટ્ઠાપેતબ્બા – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે…પે… સઙ્ઘે…પે… અરિયકન્તેસુ સીલેસુ સમાદપેતબ્બા, નિવેસેતબ્બા, પતિટ્ઠાપેતબ્બા અખણ્ડેસુ…પે… સમાધિસંવત્તનિકેસુ. યે તે, ભિક્ખવે, અનુકમ્પેય્યાથ, યે ચ સોતબ્બં મઞ્ઞેય્યું – મિત્તા વા અમચ્ચા વા ઞાતી વા સાલોહિતા વા – તે, ભિક્ખવે, ઇમેસુ ચતૂસુ સોતાપત્તિયઙ્ગેસુ સમાદપેતબ્બા, નિવેસેતબ્બા, પતિટ્ઠાપેતબ્બા’’તિ. છટ્ઠં.

૭. દુતિયમિત્તામચ્ચસુત્તં

૧૦૧૩. ‘‘યે તે, ભિક્ખવે, અનુકમ્પેય્યાથ, યે ચ સોતબ્બં મઞ્ઞેય્યું – મિત્તા વા અમચ્ચા વા ઞાતી વા સાલોહિતા વા – તે, ભિક્ખવે, ચતૂસુ સોતાપત્તિયઙ્ગેસુ સમાદપેતબ્બા, નિવેસેતબ્બા, પતિટ્ઠાપેતબ્બા. કતમેસુ ચતૂસુ? બુદ્ધે અવેચ્ચપ્પસાદે સમાદપેતબ્બા, નિવેસેતબ્બા, પતિટ્ઠાપેતબ્બા – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવા’’તિ.

‘‘સિયા, ભિક્ખવે, ચતુન્નં મહાભૂતાનં અઞ્ઞથત્તં – પથવીધાતુયા, આપોધાતુયા, તેજોધાતુયા, વાયોધાતુયા – ન ત્વેવ બુદ્ધે અવેચ્ચપ્પસાદેન સમન્નાગતસ્સ અરિયસાવકસ્સ સિયા અઞ્ઞથત્તં. તત્રિદં અઞ્ઞથત્તં – સો વત બુદ્ધે અવેચ્ચપ્પસાદેન સમન્નાગતો અરિયસાવકો નિરયં વા તિરચ્છાનયોનિં વા પેત્તિવિસયં વા ઉપપજ્જિસ્સતી’’તિ – નેતં ઠાનં વિજ્જતિ. ‘‘ધમ્મે…પે… સઙ્ઘે…પે… અરિયકન્તેસુ સીલેસુ સમાદપેતબ્બા, નિવેસેતબ્બા, પતિટ્ઠાપેતબ્બા અખણ્ડેસુ…પે… સમાધિસંવત્તનિકેસુ. સિયા, ભિક્ખવે, ચતુન્નં મહાભૂતાનં અઞ્ઞથત્તં – પથવીધાતુયા, આપોધાતુયા, તેજોધાતુયા, વાયોધાતુયા – ન ત્વેવ અરિયકન્તેહિ સીલેહિ સમન્નાગતસ્સ અરિયસાવકસ્સ સિયા અઞ્ઞથત્તં. તત્રિદં અઞ્ઞથત્તં – સો વત અરિયકન્તેહિ સીલેહિ સમન્નાગતો અરિયસાવકો નિરયં વા તિરચ્છાનયોનિં વા પેત્તિવિસયં વા ઉપપજ્જિસ્સતીતિ – નેતં ઠાનં વિજ્જતિ. યે તે, ભિક્ખવે, અનુકમ્પેય્યાથ, યે ચ સોતબ્બં મઞ્ઞેય્યું – મિત્તા વા અમચ્ચા વા ઞાતી વા સાલોહિતા વા – તે, ભિક્ખવે, ઇમેસુ ચતૂસુ સોતાપત્તિયઙ્ગેસુ સમાદપેતબ્બા, નિવેસેતબ્બા, પતિટ્ઠાપેતબ્બા’’તિ. સત્તમં.

૮. પઠમદેવચારિકસુત્તં

૧૦૧૪. સાવત્થિનિદાનં. અથ ખો આયસ્મા મહામોગ્ગલ્લાનો – સેય્યથાપિ નામ બલવા પુરિસો સમિઞ્જિતં વા બાહં પસારેય્ય, પસારિતં વા બાહં સમિઞ્જેય્ય, એવમેવ – જેતવને અન્તરહિતો દેવેસુ તાવતિંસેસુ પાતુરહોસિ. અથ ખો સમ્બહુલા તાવતિંસકાયિકા દેવતાયો યેનાયસ્મા મહામોગ્ગલ્લાનો તેનુપસઙ્કમિંસુ; ઉપસઙ્કમિત્વા આયસ્મન્તં મહામોગ્ગલ્લાનં અભિવાદેત્વા એકમન્તં અટ્ઠંસુ. એકમન્તં ઠિતા ખો તા દેવતાયો આયસ્મા મહામોગ્ગલ્લાનો એતદવોચ –

‘‘સાધુ ખો, આવુસો, બુદ્ધે અવેચ્ચપ્પસાદેન સમન્નાગમનં હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. બુદ્ધે અવેચ્ચપ્પસાદેન સમન્નાગમનહેતુ ખો, આવુસો, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તિ. સાધુ ખો, આવુસો, ધમ્મે…પે… સઙ્ઘે…પે… સાધુ ખો, આવુસો, અરિયકન્તેહિ સીલેહિ સમન્નાગમનં હોતિ અખણ્ડેહિ…પે… સમાધિસંવત્તનિકેહિ. અરિયકન્તેહિ સીલેહિ સમન્નાગમનહેતુ ખો, આવુસો, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ.

‘‘સાધુ ખો, મારિસ મોગ્ગલ્લાન, બુદ્ધે અવેચ્ચપ્પસાદેન સમન્નાગમનં હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. બુદ્ધે અવેચ્ચપ્પસાદેન સમન્નાગમનહેતુ ખો, મારિસ મોગ્ગલ્લાન, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તિ. સાધુ ખો, મારિસ મોગ્ગલ્લાન, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગમનં હોતિ અખણ્ડેહિ…પે… સમાધિસંવત્તનિકેહિ. અરિયકન્તેહિ સીલેહિ સમન્નાગમનહેતુ ખો, મારિસ મોગ્ગલ્લાન, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપજ્જન્તી’’તિ. અટ્ઠમં.

૯. દુતિયદેવચારિકસુત્તં

૧૦૧૫. સાવત્થિનિદાનં. અથ ખો આયસ્મા મહામોગ્ગલ્લાનો – સેય્યથાપિ નામ બલવા પુરિસો સમિઞ્જિતં વા બાહં પસારેય્ય, પસારિતં વા બાહં સમિઞ્જેય્ય, એવમેવ – જેતવને અન્તરહિતો દેવેસુ તાવતિંસેસુ પાતુરહોસિ. અથ ખો સમ્બહુલા તાવતિંસકાયિકા દેવતાયો યેનાયસ્મા મહામોગ્ગલ્લાનો તેનુપસઙ્કમિંસુ; ઉપસઙ્કમિત્વા આયસ્મન્તં મહામોગ્ગલ્લાનં અભિવાદેત્વા એકમન્તં અટ્ઠંસુ. એકમન્તં ઠિતા ખો તા દેવતાયો આયસ્મા મહામોગ્ગલ્લાનો એતદવોચ –

‘‘સાધુ ખો, આવુસો, બુદ્ધે અવેચ્ચપ્પસાદેન સમન્નાગમનં હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. બુદ્ધે અવેચ્ચપ્પસાદેન સમન્નાગમનહેતુ ખો, આવુસો, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપન્ના. સાધુ ખો, આવુસો, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગમનં હોતિ અખણ્ડેહિ…પે… સમાધિસંવત્તનિકેહિ. અરિયકન્તેહિ સીલેહિ સમન્નાગમનહેતુ ખો, આવુસો, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપન્ના’’તિ.

‘‘સાધુ ખો, મારિસ મોગ્ગલ્લાન, બુદ્ધે અવેચ્ચપ્પસાદેન સમન્નાગમનં હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. બુદ્ધે અવેચ્ચપ્પસાદેન સમન્નાગમનહેતુ ખો, મારિસ મોગ્ગલ્લાન, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપન્ના. સાધુ ખો, મારિસ મોગ્ગલ્લાન, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગમનં હોતિ અખણ્ડેહિ…પે… સમાધિસંવત્તનિકેહિ. અરિયકન્તેહિ સીલેહિ સમન્નાગમનહેતુ ખો, મારિસ મોગ્ગલ્લાન, એવમિધેકચ્ચે સત્તા કાયસ્સ ભેદા પરં મરણા સુગતિં સગ્ગં લોકં ઉપપન્ના’’તિ. નવમં.

૧૦. તતિયદેવચારિકસુત્તં

૧૦૧૬. અથ ખો ભગવા – સેય્યથાપિ નામ બલવા પુરિસો સમિઞ્જિતં વા બાહં પસારેય્ય, પસારિતં વા બાહં સમિઞ્જેય્ય, એવમેવ – જેતવને અન્તરહિતો દેવેસુ તાવતિંસેસુ પાતુરહોસિ. અથ ખો સમ્બહુલા તાવતિંસકાયિકા દેવતાયો યેન ભગવા તેનુપસઙ્કમિંસુ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠંસુ. એકમન્તં ઠિતા ખો તા દેવતાયો ભગવા એતદવોચ –

‘‘સાધુ ખો, આવુસો, બુદ્ધે અવેચ્ચપ્પસાદેન સમન્નાગમનં હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. બુદ્ધે અવેચ્ચપ્પસાદેન સમન્નાગમનહેતુ ખો, આવુસો, એવમિધેકચ્ચે સત્તા સોતાપન્ના અવિનિપાતધમ્મા નિયતા સમ્બોધિપરાયણા. સાધુ ખો, આવુસો, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગમનં હોતિ અખણ્ડેહિ…પે… સમાધિસંવત્તનિકેહિ. અરિયકન્તેહિ સીલેહિ સમન્નાગમનહેતુ ખો, આવુસો, એવમિધેકચ્ચે સત્તા સોતાપન્ના અવિનિપાતધમ્મા નિયતા સમ્બોધિપરાયણા’’તિ.

‘‘સાધુ ખો, મારિસ, બુદ્ધે અવેચ્ચપ્પસાદેન સમન્નાગમનં હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. બુદ્ધે અવેચ્ચપ્પસાદેન સમન્નાગમનહેતુ ખો, મારિસ, એવમયં પજા સોતાપન્ના અવિનિપાતધમ્મા નિયતા સમ્બોધિપરાયણા. સાધુ ખો, મારિસ, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગમનં હોતિ અખણ્ડેહિ…પે… સમાધિસંવત્તનિકેહિ. અરિયકન્તેહિ સીલેહિ સમન્નાગમનહેતુ ખો, મારિસ, એવમયં પજા સોતાપન્ના અવિનિપાતધમ્મા નિયતા સમ્બોધિપરાયણા’’તિ. દસમં.

રાજકારામવગ્ગો દુતિયો.

તસ્સુદ્દાનં –

સહસ્સબ્રાહ્મણાનન્દ, દુગ્ગતિ અપરે દુવે;

મિત્તામચ્ચા દુવે વુત્તા, તયો ચ દેવચારિકાતિ.