૪. દુતિયસંયોજનસુત્તં

૫૪. સાવત્થિયં વિહરતિ …પે… ‘‘સેય્યથાપિ, ભિક્ખવે, તેલઞ્ચ પટિચ્ચ વટ્ટિઞ્ચ પટિચ્ચ તેલપ્પદીપો ઝાયેય્ય. તત્ર પુરિસો કાલેન કાલં તેલં આસિઞ્ચેય્ય વટ્ટિં ઉપસંહરેય્ય. એવઞ્હિ સો, ભિક્ખવે, તેલપ્પદીપો તદાહારો તદુપાદાનો ચિરં દીઘમદ્ધાનં જલેય્ય. એવમેવ ખો, ભિક્ખવે, સંયોજનિયેસુ ધમ્મેસુ અસ્સાદાનુપસ્સિનો વિહરતો તણ્હા પવડ્ઢતિ. તણ્હાપચ્ચયા ઉપાદાનં…પે… એવમેતસ્સ કેવલસ્સ દુક્ખક્ખન્ધસ્સ સમુદયો હોતિ’’.

‘‘સેય્યથાપિ, ભિક્ખવે, તેલઞ્ચ પટિચ્ચ વટ્ટિઞ્ચ પટિચ્ચ તેલપ્પદીપો ઝાયેય્ય. તત્ર પુરિસો ન કાલેન કાલં તેલં આસિઞ્ચેય્ય ન વટ્ટિં ઉપસંહરેય્ય. એવઞ્હિ સો, ભિક્ખવે, તેલપ્પદીપો પુરિમસ્સ ચ ઉપાદાનસ્સ પરિયાદાના અઞ્ઞસ્સ ચ અનુપહારા અનાહારો નિબ્બાયેય્ય. એવમેવ ખો, ભિક્ખવે, સંયોજનિયેસુ ધમ્મેસુ આદીનવાનુપસ્સિનો વિહરતો તણ્હા નિરુજ્ઝતિ. તણ્હાનિરોધા ઉપાદાનનિરોધો…પે… એવમેતસ્સ કેવલસ્સ દુક્ખક્ખન્ધસ્સ નિરોધો હોતી’’તિ. ચતુત્થં.