૧૦. સમુદ્દકસુત્તં

૨૫૬. સાવત્થિયં. ‘‘ભૂતપુબ્બં, ભિક્ખવે, સમ્બહુલા ઇસયો સીલવન્તો કલ્યાણધમ્મા સમુદ્દતીરે પણ્ણકુટીસુ સમ્મન્તિ. તેન ખો પન સમયેન દેવાસુરસઙ્ગામો સમુપબ્યૂળ્હો અહોસિ. અથ ખો, ભિક્ખવે, તેસં ઇસીનં સીલવન્તાનં કલ્યાણધમ્માનં એતદહોસિ – ‘ધમ્મિકા ખો દેવા, અધમ્મિકા અસુરા. સિયાપિ નો અસુરતો ભયં. યંનૂન મયં સમ્બરં અસુરિન્દં ઉપસઙ્કમિત્વા અભયદક્ખિણં યાચેય્યામા’’’તિ. ‘‘અથ ખો, ભિક્ખવે, તે ઇસયો સીલવન્તો કલ્યાણધમ્મા – સેય્યથાપિ નામ બલવા પુરિસો સમિઞ્જિતં વા બાહં પસારેય્ય, પસારિતં વા બાહં સમિઞ્જેય્ય એવમેવ – સમુદ્દતીરે પણ્ણકુટીસુ અન્તરહિતા સમ્બરસ્સ અસુરિન્દસ્સ સમ્મુખે પાતુરહેસું. અથ ખો, ભિક્ખવે, તે ઇસયો સીલવન્તો કલ્યાણધમ્મા સમ્બરં અસુરિન્દં ગાથાય અજ્ઝભાસિંસુ –

‘‘ઇસયો સમ્બરં પત્તા, યાચન્તિ અભયદક્ખિણં;

કામંકરો હિ તે દાતું, ભયસ્સ અભયસ્સ વા’’તિ.

‘‘ઇસીનં અભયં નત્થિ, દુટ્ઠાનં સક્કસેવિનં;

અભયં યાચમાનાનં, ભયમેવ દદામિ વો’’તિ.

‘‘અભયં યાચમાનાનં, ભયમેવ દદાસિ નો;

પટિગ્ગણ્હામ તે એતં, અક્ખયં હોતુ તે ભયં.

‘‘યાદિસં વપતે બીજં, તાદિસં હરતે ફલં;

કલ્યાણકારી કલ્યાણં, પાપકારી ચ પાપકં;

પવુત્તં તાત તે બીજં, ફલં પચ્ચનુભોસ્સસી’’તિ.

‘‘અથ ખો, ભિક્ખવે, તે ઇસયો સીલવન્તો કલ્યાણધમ્મા સમ્બરં અસુરિન્દં અભિસપિત્વા – સેય્યથાપિ નામ બલવા પુરિસો સમિઞ્જિતં વા બાહં પસારેય્ય, પસારિતં વા બાહં સમિઞ્જેય્ય એવમેવ – સમ્બરસ્સ અસુરિન્દસ્સ સમ્મુખે અન્તરહિતા સમુદ્દતીરે પણ્ણકુટીસુ પાતુરહેસું. અથ ખો, ભિક્ખવે, સમ્બરો અસુરિન્દો તેહિ ઇસીહિ સીલવન્તેહિ કલ્યાણધમ્મેહિ અભિસપિતો રત્તિયા સુદં તિક્ખત્તું ઉબ્બિજ્જી’’તિ.

પઠમો વગ્ગો.

તસ્સુદ્દાનં –

સુવીરં સુસીમઞ્ચેવ, ધજગ્ગં વેપચિત્તિનો;

સુભાસિતં જયઞ્ચેવ, કુલાવકં નદુબ્ભિયં;

વેરોચન અસુરિન્દો, ઇસયો અરઞ્ઞકઞ્ચેવ;

ઇસયો ચ સમુદ્દકાતિ.