૭. પુનબ્બસુસુત્તં

૨૪૧. એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભગવા ભિક્ખૂ નિબ્બાનપટિસંયુત્તાય ધમ્મિયા કથાય સન્દસ્સેતિ સમાદપેતિ સમુત્તેજેતિ સમ્પહંસેતિ. તે ચ ભિક્ખૂ અટ્ઠિં કત્વા મનસિ કત્વા સબ્બચેતસા સમન્નાહરિત્વા ઓહિતસોતા ધમ્મં સુણન્તિ. અથ ખો પુનબ્બસુમાતા યક્ખિની પુત્તકે એવં તોસેસિ –

‘‘તુણ્હી ઉત્તરિકે હોહિ, તુણ્હી હોહિ પુનબ્બસુ;

યાવાહં બુદ્ધસેટ્ઠસ્સ, ધમ્મં સોસ્સામિ સત્થુનો.

‘‘નિબ્બાનં ભગવા આહ, સબ્બગન્થપ્પમોચનં;

અતિવેલા ચ મે હોતિ, અસ્મિં ધમ્મે પિયાયના.

‘‘પિયો લોકે સકો પુત્તો, પિયો લોકે સકો પતિ;

તતો પિયતરા મય્હં, અસ્સ ધમ્મસ્સ મગ્ગના.

‘‘ન હિ પુત્તો પતિ વાપિ, પિયો દુક્ખા પમોચયે;

યથા સદ્ધમ્મસ્સવનં, દુક્ખા મોચેતિ પાણિનં.

‘‘લોકે દુક્ખપરેતસ્મિં, જરામરણસંયુતે;

જરામરણમોક્ખાય, યં ધમ્મં અભિસમ્બુધં;

તં ધમ્મં સોતુમિચ્છામિ, તુણ્હી હોહિ પુનબ્બસૂ’’તિ.

‘‘અમ્મા ન બ્યાહરિસ્સામિ, તુણ્હીભૂતાયમુત્તરા;

ધમ્મમેવ નિસામેહિ, સદ્ધમ્મસ્સવનં સુખં;

સદ્ધમ્મસ્સ અનઞ્ઞાય, અમ્મા દુક્ખં ચરામસે.

‘‘એસ દેવમનુસ્સાનં, સમ્મૂળ્હાનં પભઙ્કરો;

બુદ્ધો અન્તિમસારીરો, ધમ્મં દેસેતિ ચક્ખુમા’’તિ.

‘‘સાધુ ખો પણ્ડિતો નામ, પુત્તો જાતો ઉરેસયો;

પુત્તો મે બુદ્ધસેટ્ઠસ્સ, ધમ્મં સુદ્ધં પિયાયતિ.

‘‘પુનબ્બસુ સુખી હોહિ, અજ્જાહમ્હિ સમુગ્ગતા;

દિટ્ઠાનિ અરિયસચ્ચાનિ, ઉત્તરાપિ સુણાતુ મે’’તિ.