૯. મચ્છરિસુત્તં

૪૯. ‘‘યેધ મચ્છરિનો લોકે, કદરિયા પરિભાસકા;

અઞ્ઞેસં દદમાનાનં, અન્તરાયકરા નરા.

‘‘કીદિસો તેસં વિપાકો, સમ્પરાયો ચ કીદિસો;

ભગવન્તં પુટ્ઠુમાગમ્મ, કથં જાનેમુ તં મય’’ન્તિ.

‘‘યેધ મચ્છરિનો લોકે, કદરિયા પરિભાસકા;

અઞ્ઞેસં દદમાનાનં, અન્તરાયકરા નરા.

‘‘નિરયં તિરચ્છાનયોનિં, યમલોકં ઉપપજ્જરે;

સચે એન્તિ મનુસ્સત્તં, દલિદ્દે જાયરે કુલે.

‘‘ચોળં પિણ્ડો રતી ખિડ્ડા, યત્થ કિચ્છેન લબ્ભતિ;

પરતો આસીસરે [આસિંસરે (સી. સ્યા. કં. પી.)] બાલા, તમ્પિ તેસં ન લબ્ભતિ;

દિટ્ઠે ધમ્મેસ વિપાકો, સમ્પરાયે [સમ્પરાયો (સ્યા. કં. પી.)] ચ દુગ્ગતી’’તિ.

‘‘ઇતિહેતં વિજાનામ, અઞ્ઞં પુચ્છામ ગોતમ;

યેધ લદ્ધા મનુસ્સત્તં, વદઞ્ઞૂ વીતમચ્છરા.

‘‘બુદ્ધે પસન્ના ધમ્મે ચ, સઙ્ઘે ચ તિબ્બગારવા;

કીદિસો તેસં વિપાકો, સમ્પરાયો ચ કીદિસો;

ભગવન્તં પુટ્ઠુમાગમ્મ, કથં જાનેમુ તં મય’’ન્તિ.

‘‘યેધ લદ્ધા મનુસ્સત્તં, વદઞ્ઞૂ વીતમચ્છરા;

બુદ્ધે પસન્ના ધમ્મે ચ, સઙ્ઘે ચ તિબ્બગારવા;

એતે સગ્ગા [સગ્ગે (સી. સ્યા. કં.)] પકાસન્તિ, યત્થ તે ઉપપજ્જરે.

‘‘સચે એન્તિ મનુસ્સત્તં, અડ્ઢે આજાયરે કુલે;

ચોળં પિણ્ડો રતી ખિડ્ડા, યત્થાકિચ્છેન લબ્ભતિ.

‘‘પરસમ્ભતેસુ ભોગેસુ, વસવત્તીવ મોદરે;

દિટ્ઠે ધમ્મેસ વિપાકો, સમ્પરાયે ચ સુગ્ગતી’’તિ.