૯. વિસાલક્ખિવિમાનવત્થુ

૬૬૬. ‘‘કા નામ ત્વં વિસાલક્ખિ [વિસાલક્ખી (સ્યા.)], રમ્મે ચિત્તલતાવને;

સમન્તા અનુપરિયાસિ, નારીગણપુરક્ખતા [પુરક્ખિતા (સ્યા. ક.)].

૬૬૭. ‘‘યદા દેવા તાવતિંસા, પવિસન્તિ ઇમં વનં;

સયોગ્ગા સરથા સબ્બે, ચિત્રા હોન્તિ ઇધાગતા.

૬૬૮. ‘‘તુય્હઞ્ચ ઇધ પત્તાય, ઉય્યાને વિચરન્તિયા;

કાયે ન દિસ્સતી ચિત્તં, કેન રૂપં તવેદિસં;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૬૬૯. ‘‘યેન કમ્મેન દેવિન્દ, રૂપં મય્હં ગતી ચ મે;

ઇદ્ધિ ચ આનુભાવો ચ, તં સુણોહિ પુરિન્દદ.

૬૭૦. ‘‘અહં રાજગહે રમ્મે, સુનન્દા નામુપાસિકા;

સદ્ધા સીલેન સમ્પન્ના, સંવિભાગરતા સદા.

૬૭૧. ‘‘અચ્છાદનઞ્ચ ભત્તઞ્ચ, સેનાસનં પદીપિયં;

અદાસિં ઉજુભૂતેસુ, વિપ્પસન્નેન ચેતસા.

૬૭૨. ‘‘ચાતુદ્દસિં [ચતુદ્દસિં (પી. ક.)] પઞ્ચદસિં, યા ચ પક્ખસ્સ અટ્ઠમી;

પાટિહારિયપક્ખઞ્ચ, અટ્ઠઙ્ગસુસમાગતં.

૬૭૩. ‘‘ઉપોસથં ઉપવસિસ્સં, સદા સીલેસુ સંવુતા;

સઞ્ઞમા સંવિભાગા ચ, વિમાનં આવસામહં.

૬૭૪. ‘‘પાણાતિપાતા વિરતા, મુસાવાદા ચ સઞ્ઞતા;

થેય્યા ચ અતિચારા ચ, મજ્જપાના ચ આરકા.

૬૭૫. ‘‘પઞ્ચસિક્ખાપદે રતા, અરિયસચ્ચાન કોવિદા;

ઉપાસિકા ચક્ખુમતો, ગોતમસ્સ યસસ્સિનો.

૬૭૬. ‘‘તસ્સા મે ઞાતિકુલા દાસી [ઞાતિકુલં આસી (સ્યા. ક.)], સદા માલાભિહારતિ;

તાહં ભગવતો થૂપે, સબ્બમેવાભિરોપયિં.

૬૭૭. ‘‘ઉપોસથે ચહં ગન્ત્વા, માલાગન્ધવિલેપનં;

થૂપસ્મિં અભિરોપેસિં, પસન્ના સેહિ પાણિભિ.

૬૭૮. ‘‘તેન કમ્મેન દેવિન્દ, રૂપં મય્હં ગતી ચ મે;

ઇદ્ધી ચ આનુભાવો ચ, યં માલં અભિરોપયિં.

૬૭૯. ‘‘યઞ્ચ સીલવતી આસિં, ન તં તાવ વિપચ્ચતિ;

આસા ચ પન મે દેવિન્દ, સકદાગામિની સિય’’ન્તિ.

વિસાલક્ખિવિમાનં નવમં.