૧૦. પારિચ્છત્તકવિમાનવત્થુ

૬૮૦. ‘‘પારિચ્છત્તકે કોવિળારે, રમણીયે મનોરમે;

દિબ્બમાલં ગન્થમાના, ગાયન્તી સમ્પમોદસિ.

૬૮૧. ‘‘તસ્સા તે નચ્ચમાનાય, અઙ્ગમઙ્ગેહિ સબ્બસો;

દિબ્બા સદ્દા નિચ્છરન્તિ, સવનીયા મનોરમા.

૬૮૨. ‘‘તસ્સા તે નચ્ચમાનાય, અઙ્ગમઙ્ગેહિ સબ્બસો;

દિબ્બા ગન્ધા પવાયન્તિ, સુચિગન્ધા મનોરમા.

૬૮૩. ‘‘વિવત્તમાના કાયેન, યા વેણીસુ પિળન્ધના.

તેસં સુય્યતિ નિગ્ઘોસો, તૂરિયે પઞ્ચઙ્ગિકે યથા.

૬૮૪. ‘‘વટંસકા વાતધુતા [વાતધૂતા (સી. સ્યા.)], વાતેન સમ્પકમ્પિતા;

તેસં સુય્યતિ નિગ્ઘોસો, તૂરિયે પઞ્ચઙ્ગિકે યથા.

૬૮૫. ‘‘યાપિ તે સિરસ્મિં માલા, સુચિગન્ધા મનોરમા;

વાતિ ગન્ધો દિસા સબ્બા, રુક્ખો મઞ્જૂસકો યથા.

૬૮૬. ‘‘ઘાયસે તં સુચિગન્ધં [સુચિં ગન્ધં (સી.)], રૂપં પસ્સસિ અમાનુસં [માનુસં (પી.)];

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૬૮૭. ‘‘પભસ્સરં અચ્ચિમન્તં, વણ્ણગન્ધેન સંયુતં;

અસોકપુપ્ફમાલાહં, બુદ્ધસ્સ ઉપનામયિં.

૬૮૮. ‘‘તાહં કમ્મં કરિત્વાન, કુસલં બુદ્ધવણ્ણિતં;

અપેતસોકા સુખિતા, સમ્પમોદામનામયા’’તિ.

પારિચ્છત્તકવિમાનં દસમં.

પારિચ્છત્તકવગ્ગો તતિયો નિટ્ઠિતો.

તસ્સુદ્દાનં –

ઉળારો ઉચ્છુ પલ્લઙ્કો, લતા ચ ગુત્તિલેન ચ;

દદ્દલ્લપેસમલ્લિકા, વિસાલક્ખિ પારિચ્છત્તકો;

વગ્ગો તેન પવુચ્ચતીતિ.