૬. દદ્દલ્લવિમાનવત્થુ

૬૧૯. ‘‘દદ્દલ્લમાના [દદ્દળ્હમાના (ક.)] વણ્ણેન, યસસા ચ યસસ્સિની;

સબ્બે દેવે તાવતિંસે, વણ્ણેન અતિરોચસિ.

૬૨૦. ‘‘દસ્સનં નાભિજાનામિ, ઇદં પઠમદસ્સનં;

કસ્મા કાયા નુ આગમ્મ, નામેન ભાસસે મમ’’ન્તિ.

૬૨૧. ‘‘અહં ભદ્દે સુભદ્દાસિં, પુબ્બે માનુસકે ભવે;

સહભરિયા ચ તે આસિં, ભગિની ચ કનિટ્ઠિકા.

૬૨૨. ‘‘સા અહં કાયસ્સ ભેદા, વિપ્પમુત્તા તતો ચુતા;

નિમ્માનરતીનં દેવાનં, ઉપપન્ના સહબ્યત’’ન્તિ.

૬૨૩. ‘‘પહૂતકતકલ્યાણા, તે દેવે યન્તિ પાણિનો;

યેસં ત્વં કિત્તયિસ્સસિ, સુભદ્દે જાતિમત્તનો.

૬૨૪. ‘‘અથ [કથં (સી. સ્યા.)] ત્વં કેન વણ્ણેન, કેન વા અનુસાસિતા;

કીદિસેનેવ દાનેન, સુબ્બતેન યસસ્સિની.

૬૨૫. ‘‘યસં એતાદિસં પત્તા, વિસેસં વિપુલમજ્ઝગા;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૬૨૬. ‘‘અટ્ઠેવ પિણ્ડપાતાનિ, યં દાનં અદદં પુરે;

દક્ખિણેય્યસ્સ સઙ્ઘસ્સ, પસન્ના સેહિ પાણિભિ.

૬૨૭. ‘‘તેન મેતાદિસો વણ્ણો…પે…વણ્ણો ચ મે સબ્બદિસા પભાસતી’’તિ.

૬૨૯. ‘‘અહં તયા બહુતરે ભિક્ખૂ, સઞ્ઞતે બ્રહ્મચારયો [બ્રહ્મચરિનો (સ્યા.), બ્રહ્મચારિયે (પી. ક.)];

તપ્પેસિં અન્નપાનેન, પસન્ના સેહિ પાણિભિ.

૬૩૦. ‘‘તયા બહુતરં દત્વા, હીનકાયૂપગા અહં [અહું (ક. સી.)];

કથં ત્વં અપ્પતરં દત્વા, વિસેસં વિપુલમજ્ઝગા;

દેવતે પુચ્છિતાચિક્ખ, કિસ્સ કમ્મસ્સિદં ફલ’’ન્તિ.

૬૩૧. ‘‘મનોભાવનીયો ભિક્ખુ, સન્દિટ્ઠો મે પુરે અહુ;

તાહં ભત્તેન [ભદ્દે (ક.)] નિમન્તેસિં, રેવતં અત્તનટ્ઠમં.

૬૩૨. ‘‘સો મે અત્થપુરેક્ખારો, અનુકમ્પાય રેવતો;

સઙ્ઘે દેહીતિ મંવોચ, તસ્સાહં વચનં કરિં.

૬૩૩. ‘‘સા દક્ખિણા સઙ્ઘગતા, અપ્પમેય્યે પતિટ્ઠિતા;

પુગ્ગલેસુ તયા દિન્નં, ન તં તવ મહપ્ફલ’’ન્તિ.

૬૩૪. ‘‘ઇદાનેવાહં જાનામિ, સઙ્ઘે દિન્નં મહપ્ફલં;

સાહં ગન્ત્વા મનુસ્સત્તં, વદઞ્ઞૂ વીતમચ્છરા;

સઙ્ઘે દાનાનિ દસ્સામિ [સઙ્ઘે દાનં દસ્સામિહં (સ્યા.)], અપ્પમત્તા પુનપ્પુન’’ન્તિ.

૬૩૫. ‘‘કા એસા દેવતા ભદ્દે, તયા મન્તયતે સહ;

સબ્બે દેવે તાવતિંસે, વણ્ણેન અતિરોચતી’’તિ.

૬૩૬. ‘‘મનુસ્સભૂતા દેવિન્દ, પુબ્બે માનુસકે ભવે;

સહભરિયા ચ મે આસિ, ભગિની ચ કનિટ્ઠિકા;

સઙ્ઘે દાનાનિ દત્વાન, કતપુઞ્ઞા વિરોચતી’’તિ.

૬૩૭. ‘‘ધમ્મેન પુબ્બે ભગિની, તયા ભદ્દે વિરોચતિ;

યં સઙ્ઘમ્હિ અપ્પમેય્યે, પતિટ્ઠાપેસિ દક્ખિણં.

૬૩૮. ‘‘પુચ્છિતો હિ મયા બુદ્ધો, ગિજ્ઝકૂટમ્હિ પબ્બતે;

વિપાકં સંવિભાગસ્સ, યત્થ દિન્નં મહપ્ફલં.

૬૩૯. ‘‘યજમાનાનં મનુસ્સાનં, પુઞ્ઞપેક્ખાન પાણિનં;

કરોતં ઓપધિકં પુઞ્ઞં, યત્થ દિન્નં મહપ્ફલં.

૬૪૦. ‘‘તં મે બુદ્ધો વિયાકાસિ, જાનં કમ્મફલં સકં;

વિપાકં સંવિભાગસ્સ, યત્થ દિન્નં મહપ્ફલં.

૬૪૧. [વિ. વ. ૭૫૦; કથા. ૭૯૮] ‘‘ચત્તારો ચ પટિપન્ના, ચત્તારો ચ ફલે ઠિતા;

એસ સઙ્ઘો ઉજુભૂતો, પઞ્ઞાસીલસમાહિતો.

૬૪૨. [વિ. વ. ૭૫૧; કથા. ૭૯૮] ‘‘યજમાનાનં મનુસ્સાનં, પુઞ્ઞપેક્ખાન પાણિનં;

કરોતં ઓપધિકં પુઞ્ઞં, સઙ્ઘે દિન્નં મહપ્ફલં.

૬૪૩. [વિ. વ. ૭૫૨; કથા. ૭૯૮] ‘‘એસો હિ સઙ્ઘો વિપુલો મહગ્ગતો, એસપ્પમેય્યો ઉદધીવ સાગરો;

એતે હિ સેટ્ઠા નરવીરસાવકા, પભઙ્કરા ધમ્મમુદીરયન્તિ [ધમ્મકથં ઉદીરયન્તિ (સ્યા.)].

૬૪૪. [વિ. વ. ૭૫૩; કથા. ૭૯૮] ‘‘તેસં સુદિન્નં સુહુતં સુયિટ્ઠં, યે સઙ્ઘમુદ્દિસ્સ દદન્તિ દાનં;

સા દક્ખિણા સઙ્ઘગતા પતિટ્ઠિતા, મહપ્ફલા લોકવિદૂન [લોકવિદૂહિ (સ્યા. ક.)] વણ્ણિતા.

૬૪૫. [વિ. વ. ૭૫૪; કથા. ૭૯૮] ‘‘એતાદિસં યઞ્ઞમનુસ્સરન્તા [પુઞ્ઞમનુસ્સરન્તા (સ્યા. ક.)], યે વેદજાતા વિચરન્તિ લોકે;

વિનેય્ય મચ્છેરમલં સમૂલં, અનિન્દિતા સગ્ગમુપેન્તિ ઠાન’’ન્તિ.

દદ્દલ્લવિમાનં [દદ્દળ્હવિમાનં (ક.)] છટ્ઠં.