૭. પેસવતીવિમાનવત્થુ

૬૪૬. ‘‘ફલિકરજતહેમજાલછન્નં, વિવિધચિત્રતલમદ્દસં સુરમ્મં;

બ્યમ્હં સુનિમ્મિતં તોરણૂપપન્નં, રુચકુપકિણ્ણમિદં સુભં વિમાનં.

૬૪૭. ‘‘ભાતિ ચ દસ દિસા નભેવ સુરિયો, સરદે તમોનુદો સહસ્સરંસી;

તથા તપતિમિદં તવ વિમાનં, જલમિવ ધૂમસિખો નિસે નભગ્ગે.

૬૪૮. ‘‘મુસતીવ નયનં સતેરતાવ [સતેરિતાવ (સ્યા. ક.)], આકાસે ઠપિતમિદં મનુઞ્ઞં;

વીણામુરજસમ્મતાળઘુટ્ઠં, ઇદ્ધં ઇન્દપુરં યથા તવેદં.

૬૪૯. ‘‘પદુમકુમુદુપ્પલકુવલયં, યોધિક [યૂધિક (સી.)] બન્ધુકનોજકા [યોથિકા ભણ્ડિકા નોજકા (સ્યા.)] ચ સન્તિ;

સાલકુસુમિતપુપ્ફિતા અસોકા, વિવિધદુમગ્ગસુગન્ધસેવિતમિદં.

૬૫૦. ‘‘સળલલબુજભુજક [સુજક (સી. સ્યા.)] સંયુત્તા [સઞ્ઞતા (સી.)], કુસકસુફુલ્લિતલતાવલમ્બિનીહિ;

મણિજાલસદિસા યસસ્સિની, રમ્મા પોક્ખરણી ઉપટ્ઠિતા તે.

૬૫૧. ‘‘ઉદકરુહા ચ યેત્થિ પુપ્ફજાતા, થલજા યે ચ સન્તિ રુક્ખજાતા;

માનુસકામાનુસ્સકા ચ દિબ્બા, સબ્બે તુય્હં નિવેસનમ્હિ જાતા.

૬૫૨. ‘‘કિસ્સ સંયમદમસ્સયં વિપાકો, કેનાસિ કમ્મફલેનિધૂપપન્ના;

યથા ચ તે અધિગતમિદં વિમાનં, તદનુપદં અવચાસિળારપમ્હે’’તિ [પખુમેતિ (સી.)].

૬૫૩. ‘‘યથા ચ મે અધિગતમિદં વિમાનં, કોઞ્ચમયૂરચકોર [ચઙ્કોર (ક.)] સઙ્ઘચરિતં;

દિબ્ય [દિબ્બ (સી. પી.)] પિલવહંસરાજચિણ્ણં, દિજકારણ્ડવકોકિલાભિનદિતં.

૬૫૪. ‘‘નાનાસન્તાનકપુપ્ફરુક્ખવિવિધા, પાટલિજમ્બુઅસોકરુક્ખવન્તં;

યથા ચ મે અધિગતમિદં વિમાનં, તં તે પવેદયામિ [પવદિસ્સામિ (સી.), પવેદિસ્સામિ (પી.)] સુણોહિ ભન્તે.

૬૫૫. ‘‘મગધવરપુરત્થિમેન, નાળકગામો નામ અત્થિ ભન્તે;

તત્થ અહોસિં પુરે સુણિસા, પેસવતીતિ [સેસવતીતિ (સી. સ્યા.)] તત્થ જાનિંસુ મમં.

૬૫૬. ‘‘સાહમપચિતત્થધમ્મકુસલં, દેવમનુસ્સપૂજિતં મહન્તં;

ઉપતિસ્સં નિબ્બુતમપ્પમેય્યં, મુદિતમના કુસુમેહિ અબ્ભુકિરિં [અબ્ભોકિરિં (સી. સ્યા. પી. ક.)].

૬૫૭. ‘‘પરમગતિગતઞ્ચ પૂજયિત્વા, અન્તિમદેહધરં ઇસિં ઉળારં;

પહાય માનુસકં સમુસ્સયં, તિદસગતા ઇધ માવસામિ ઠાન’’ન્તિ.

પેસવતીવિમાનં સત્તમં.