૪. સુન્દરીનન્દાથેરીગાથા

૮૨. ‘‘આતુરં અસુચિં પૂતિં, પસ્સ નન્દે સમુસ્સયં;

અસુભાય ચિત્તં ભાવેહિ, એકગ્ગં સુસમાહિતં.

૮૩. ‘‘યથા ઇદં તથા એતં, યથા એતં તથા ઇદં;

દુગ્ગન્ધં પૂતિકં વાતિ, બાલાનં અભિનન્દિતં.

૮૪. ‘‘એવમેતં અવેક્ખન્તી, રત્તિન્દિવમતન્દિતા;

તતો સકાય પઞ્ઞાય, અભિનિબ્બિજ્ઝ [અભિનિબ્બિજ્જ (સી. સ્યા.)] દક્ખિસં.

૮૫. ‘‘તસ્સા મે અપ્પમત્તાય, વિચિનન્તિયા યોનિસો;

યથાભૂતં અયં કાયો, દિટ્ઠો સન્તરબાહિરો.

૮૬. ‘‘અથ નિબ્બિન્દહં કાયે, અજ્ઝત્તઞ્ચ વિરજ્જહં;

અપ્પમત્તા વિસંયુત્તા, ઉપસન્તામ્હિ નિબ્બુતા’’તિ.

… સુન્દરીનન્દા થેરી….