૧૨. ચન્દાથેરીગાથા

૧૨૨. ‘‘દુગ્ગતાહં પુરે આસિં, વિધવા ચ અપુત્તિકા;

વિના મિત્તેહિ ઞાતીહિ, ભત્તચોળસ્સ નાધિગં.

૧૨૩. ‘‘પત્તં દણ્ડઞ્ચ ગણ્હિત્વા, ભિક્ખમાના કુલા કુલં;

સીતુણ્હેન ચ ડય્હન્તી, સત્ત વસ્સાનિ ચારિહં.

૧૨૪. ‘‘ભિક્ખુનિં પુન દિસ્વાન, અન્નપાનસ્સ લાભિનિં;

ઉપસઙ્કમ્મ અવોચં [અવોચિં (ક.)], ‘પબ્બજ્જં અનગારિયં’.

૧૨૫. ‘‘સા ચ મં અનુકમ્પાય, પબ્બાજેસિ પટાચારા;

તતો મં ઓવદિત્વાન, પરમત્થે નિયોજયિ.

૧૨૬. ‘‘તસ્સાહં વચનં સુત્વા, અકાસિં અનુસાસનિં;

અમોઘો અય્યાયોવાદો, તેવિજ્જામ્હિ અનાસવા’’તિ.

… ચન્દા થેરી….

પઞ્ચકનિપાતો નિટ્ઠિતો.