૬. છક્કનિપાતો

૧. પઞ્ચસતમત્તાથેરીગાથા

૧૨૭. ‘‘યસ્સ મગ્ગં ન જાનાસિ, આગતસ્સ ગતસ્સ વા;

તં કુતો ચાગતં સત્તં [સન્તં (સી.), પુત્તં (સ્યા.)], ‘મમ પુત્તો’તિ રોદસિ.

૧૨૮. ‘‘મગ્ગઞ્ચ ખોસ્સ [ખો’થ (સ્યા. ક.)] જાનાસિ, આગતસ્સ ગતસ્સ વા;

ન નં સમનુસોચેસિ, એવંધમ્મા હિ પાણિનો.

૧૨૯. ‘‘અયાચિતો તતાગચ્છિ, નાનુઞ્ઞાતો [અનનુઞ્ઞાતો (સી. સ્યા.)] ઇતો ગતો;

કુતોચિ નૂન આગન્ત્વા, વસિત્વા કતિપાહકં;

ઇતોપિ અઞ્ઞેન ગતો, તતોપઞ્ઞેન ગચ્છતિ.

૧૩૦. ‘‘પેતો મનુસ્સરૂપેન, સંસરન્તો ગમિસ્સતિ;

યથાગતો તથા ગતો, કા તત્થ પરિદેવના’’.

૧૩૧. ‘‘અબ્બહી [અબ્બુય્હં (સ્યા.)] વત મે સલ્લં, દુદ્દસં હદયસ્સિતં;

યા મે સોકપરેતાય, પુત્તસોકં બ્યપાનુદિ.

૧૩૨. ‘‘સાજ્જ અબ્બૂળ્હસલ્લાહં, નિચ્છાતા પરિનિબ્બુતા;

બુદ્ધં ધમ્મઞ્ચ સઙ્ઘઞ્ચ, ઉપેમિ સરણં મુનિં’’.

ઇત્થં સુદં પઞ્ચસતમત્તા થેરી ભિક્ખુનિયો…પે….

૨. વાસેટ્ઠીથેરીગાથા

૧૩૩. ‘‘પુત્તસોકેનહં અટ્ટા, ખિત્તચિત્તા વિસઞ્ઞિની;

નગ્ગા પકિણ્ણકેસી ચ, તેન તેન વિચારિહં.

૧૩૪. ‘‘વીથિ [વસિં (સી.)] સઙ્કારકૂટેસુ, સુસાને રથિયાસુ ચ;

અચરિં તીણિ વસ્સાનિ, ખુપ્પિપાસાસમપ્પિતા.

૧૩૫. ‘‘અથદ્દસાસિં સુગતં, નગરં મિથિલં પતિ [ગતં (ક.)];

અદન્તાનં દમેતારં, સમ્બુદ્ધમકુતોભયં.

૧૩૬. ‘‘સચિત્તં પટિલદ્ધાન, વન્દિત્વાન ઉપાવિસિં;

સો મે ધમ્મમદેસેસિ, અનુકમ્પાય ગોતમો.

૧૩૭. ‘‘તસ્સ ધમ્મં સુણિત્વાન, પબ્બજિં અનગારિયં;

યુઞ્જન્તી સત્થુવચને, સચ્છાકાસિં પદં સિવં.

૧૩૮. ‘‘સબ્બે સોકા સમુચ્છિન્ના, પહીના એતદન્તિકા;

પરિઞ્ઞાતા હિ મે વત્થૂ, યતો સોકાન સમ્ભવો’’તિ.

… વાસેટ્ઠી થેરી….

૩. ખેમાથેરીગાથા

૧૩૯. ‘‘દહરા ત્વં રૂપવતી, અહમ્પિ દહરો યુવા;

પઞ્ચઙ્ગિકેન તુરિયેન [તૂરેન (ક.)], એહિ ખેમે રમામસે’’.

૧૪૦. ‘‘ઇમિના પૂતિકાયેન, આતુરેન પભઙ્ગુના;

અટ્ટિયામિ હરાયામિ, કામતણ્હા સમૂહતા.

૧૪૧. ‘‘સત્તિસૂલૂપમા કામા, ખન્ધાસં અધિકુટ્ટના;

યં ‘ત્વં કામરતિં’ બ્રૂસિ, ‘અરતી’ દાનિ સા મમ.

૧૪૨. ‘‘સબ્બત્થ વિહતા નન્દી, તમોખન્ધો પદાલિતો;

એવં જાનાહિ પાપિમ, નિહતો ત્વમસિ અન્તક.

૧૪૩. ‘‘નક્ખત્તાનિ નમસ્સન્તા, અગ્ગિં પરિચરં વને;

યથાભુચ્ચમજાનન્તા, બાલા સુદ્ધિમમઞ્ઞથ.

૧૪૪. ‘‘અહઞ્ચ ખો નમસ્સન્તી, સમ્બુદ્ધં પુરિસુત્તમં;

પમુત્તા [પરિમુત્તા (સી. સ્યા.)] સબ્બદુક્ખેહિ, સત્થુસાસનકારિકા’’તિ.

… ખેમા થેરી….

૪. સુજાતાથેરીગાથા

૧૪૫. ‘‘અલઙ્કતા સુવસના, માલિની ચન્દનોક્ખિતા;

સબ્બાભરણસઞ્છન્ના, દાસીગણપુરક્ખતા.

૧૪૬. ‘‘અન્નં પાનઞ્ચ આદાય, ખજ્જં ભોજ્જં અનપ્પકં;

ગેહતો નિક્ખમિત્વાન, ઉય્યાનમભિહારયિં.

૧૪૭. ‘‘તત્થ રમિત્વા કીળિત્વા, આગચ્છન્તી સકં ઘરં;

વિહારં દટ્ઠું પાવિસિં, સાકેતે અઞ્જનં વનં.

૧૪૮. ‘‘દિસ્વાન લોકપજ્જોતં, વન્દિત્વાન ઉપાવિસિં;

સો મે ધમ્મમદેસેસિ, અનુકમ્પાય ચક્ખુમા.

૧૪૯. ‘‘સુત્વા ચ ખો મહેસિસ્સ, સચ્ચં સમ્પટિવિજ્ઝહં;

તત્થેવ વિરજં ધમ્મં, ફુસયિં અમતં પદં.

૧૫૦. ‘‘તતો વિઞ્ઞાતસદ્ધમ્મા, પબ્બજિં અનગારિયં;

તિસ્સો વિજ્જા અનુપ્પત્તા, અમોઘં બુદ્ધસાસન’’ન્તિ.

… સુજાતા થેરી….

૫. અનોપમાથેરીગાથા

૧૫૧. ‘‘ઉચ્ચે કુલે અહં જાતા, બહુવિત્તે મહદ્ધને;

વણ્ણરૂપેન સમ્પન્ના, ધીતા મજ્ઝસ્સ [મેઘસ્સ (સી.), મેઘિસ્સ (સ્યા.)] અત્રજા.

૧૫૨. ‘‘પત્થિતા રાજપુત્તેહિ, સેટ્ઠિપુત્તેહિ ગિજ્ઝિતા [સેટ્ઠિપુત્તેહિ ભિજ્ઝિતા (સી.)];

પિતુ મે પેસયી દૂતં, દેથ મય્હં અનોપમં.

૧૫૩. ‘‘યત્તકં તુલિતા એસા, તુય્હં ધીતા અનોપમા;

તતો અટ્ઠગુણં દસ્સં, હિરઞ્ઞં રતનાનિ ચ.

૧૫૪. ‘‘સાહં દિસ્વાન સમ્બુદ્ધં, લોકજેટ્ઠં અનુત્તરં;

તસ્સ પાદાનિ વન્દિત્વા, એકમન્તં ઉપાવિસિં.

૧૫૫. ‘‘સો મે ધમ્મમદેસેસિ, અનુકમ્પાય ગોતમો;

નિસિન્ના આસને તસ્મિં, ફુસયિં તતિયં ફલં.

૧૫૬. ‘‘તતો કેસાનિ છેત્વાન, પબ્બજિં અનગારિયં;

અજ્જ મે સત્તમી રત્તિ, યતો તણ્હા વિસોસિતા’’તિ.

… અનોપમા થેરી….

૬. મહાપજાપતિગોતમીથેરીગાથા

૧૫૭. ‘‘બુદ્ધ વીર નમો ત્યત્થુ, સબ્બસત્તાનમુત્તમ;

યો મં દુક્ખા પમોચેસિ, અઞ્ઞઞ્ચ બહુકં જનં.

૧૫૮. ‘‘સબ્બદુક્ખં પરિઞ્ઞાતં, હેતુતણ્હા વિસોસિતા;

ભાવિતો અટ્ઠઙ્ગિકો [અરિયટ્ઠઙ્ગિકો (સી. ક.), ભાવિતટ્ઠઙ્ગિકો (સ્યા.)] મગ્ગો, નિરોધો ફુસિતો મયા.

૧૫૯. ‘‘માતા પુત્તો પિતા ભાતા, અય્યકા ચ પુરે અહું;

યથાભુચ્ચમજાનન્તી, સંસરિંહં અનિબ્બિસં.

૧૬૦. ‘‘દિટ્ઠો હિ મે સો ભગવા, અન્તિમોયં સમુસ્સયો;

વિક્ખીણો જાતિસંસારો, નત્થિ દાનિ પુનબ્ભવો.

૧૬૧. ‘‘આરદ્ધવીરિયે પહિતત્તે, નિચ્ચં દળ્હપરક્કમે;

સમગ્ગે સાવકે પસ્સે, એસા બુદ્ધાન વન્દના.

૧૬૨. ‘‘બહૂનં [બહુન્નં (સી. સ્યા.)] વત અત્થાય, માયા જનયિ ગોતમં;

બ્યાધિમરણતુન્નાનં, દુક્ખક્ખન્ધં બ્યપાનુદી’’તિ.

… મહાપજાપતિગોતમી થેરી….

૭. ગુત્તાથેરીગાથા

૧૬૩. ‘‘ગુત્તે યદત્થં પબ્બજ્જા, હિત્વા પુત્તં વસું પિયં;

તમેવ અનુબ્રૂહેહિ, મા ચિત્તસ્સ વસં ગમિ.

૧૬૪. ‘‘ચિત્તેન વઞ્ચિતા સત્તા, મારસ્સ વિસયે રતા;

અનેકજાતિસંસારં, સન્ધાવન્તિ અવિદ્દસૂ.

૧૬૫. ‘‘કામચ્છન્દઞ્ચ બ્યાપાદં, સક્કાયદિટ્ઠિમેવ ચ;

સીલબ્બતપરામાસં, વિચિકિચ્છઞ્ચ પઞ્ચમં.

૧૬૬. ‘‘સંયોજનાનિ એતાનિ, પજહિત્વાન ભિક્ખુની;

ઓરમ્ભાગમનીયાનિ, નયિદં પુનરેહિસિ.

૧૬૭. ‘‘રાગં માનં અવિજ્જઞ્ચ, ઉદ્ધચ્ચઞ્ચ વિવજ્જિય;

સંયોજનાનિ છેત્વાન, દુક્ખસ્સન્તં કરિસ્સસિ.

૧૬૮. ‘‘ખેપેત્વા જાતિસંસારં, પરિઞ્ઞાય પુનબ્ભવં;

દિટ્ઠેવ ધમ્મે નિચ્છાતા, ઉપસન્તા ચરિસ્સતી’’તિ.

… ગુત્તા થેરી….

૮. વિજયાથેરીગાથા

૧૬૯. ‘‘ચતુક્ખત્તું પઞ્ચક્ખત્તું, વિહારા ઉપનિક્ખમિં;

અલદ્ધા ચેતસો સન્તિં, ચિત્તે અવસવત્તિની.

૧૭૦. ‘‘ભિક્ખુનિં ઉપસઙ્કમ્મ, સક્કચ્ચં પરિપુચ્છહં;

સા મે ધમ્મમદેસેસિ, ધાતુઆયતનાનિ ચ.

૧૭૧. ‘‘ચત્તારિ અરિયસચ્ચાનિ, ઇન્દ્રિયાનિ બલાનિ ચ;

બોજ્ઝઙ્ગટ્ઠઙ્ગિકં મગ્ગં, ઉત્તમત્થસ્સ પત્તિયા.

૧૭૨. ‘‘તસ્સાહં વચનં સુત્વા, કરોન્તી અનુસાસનિં;

રત્તિયા પુરિમે યામે, પુબ્બજાતિમનુસ્સરિં.

૧૭૩. ‘‘રત્તિયા મજ્ઝિમે યામે, દિબ્બચક્ખું વિસોધયિં;

રત્તિયા પચ્છિમે યામે, તમોખન્ધં પદાલયિં.

૧૭૪. ‘‘પીતિસુખેન ચ કાયં, ફરિત્વા વિહરિં તદા;

સત્તમિયા પાદે પસારેસિં, તમોખન્ધં પદાલિયા’’તિ.

… વિજયા થેરી….

છક્કનિપાતો નિટ્ઠિતો.