૭. સત્તકનિપાતો

૧. ઉત્તરાથેરીગાથા

૧૭૫. ‘‘‘મુસલાનિ ગહેત્વાન, ધઞ્ઞં કોટ્ટેન્તિ માણવા;

પુત્તદારાનિ પોસેન્તા, ધનં વિન્દન્તિ માણવા.

૧૭૬. ‘‘‘ઘટેથ બુદ્ધસાસને, યં કત્વા નાનુતપ્પતિ;

ખિપ્પં પાદાનિ ધોવિત્વા, એકમન્તં નિસીદથ.

૧૭૭. ‘‘‘ચિત્તં ઉપટ્ઠપેત્વાન, એકગ્ગં સુસમાહિતં;

પચ્ચવેક્ખથ સઙ્ખારે, પરતો નો ચ અત્તતો’.

૧૭૮. ‘‘તસ્સાહં વચનં સુત્વા, પટાચારાનુસાસનિં;

પાદે પક્ખાલયિત્વાન, એકમન્તે ઉપાવિસિં.

૧૭૯. ‘‘રત્તિયા પુરિમે યામે, પુબ્બજાતિમનુસ્સરિં;

રત્તિયા મજ્ઝિમે યામે, દિબ્બચક્ખું વિસોધયિં.

૧૮૦. ‘‘રત્તિયા પચ્છિમે યામે, તમોક્ખન્ધં પદાલયિં;

તેવિજ્જા અથ વુટ્ઠાસિં, કતા તે અનુસાસની.

૧૮૧. ‘‘સક્કંવ દેવા તિદસા, સઙ્ગામે અપરાજિતં;

પુરક્ખત્વા વિહસ્સામિ, તેવિજ્જામ્હિ અનાસવા’’.

… ઉત્તરા થેરી….

૨. ચાલાથેરીગાથા

૧૮૨. ‘‘સતિં ઉપટ્ઠપેત્વાન, ભિક્ખુની ભાવિતિન્દ્રિયા;

પટિવિજ્ઝિ પદં સન્તં, સઙ્ખારૂપસમં સુખં’’.

૧૮૩. ‘‘કં નુ ઉદ્દિસ્સ મુણ્ડાસિ, સમણી વિય દિસ્સસિ;

ન ચ રોચેસિ પાસણ્ડે, કિમિદં ચરસિ મોમુહા’’.

૧૮૪. ‘‘ઇતો બહિદ્ધા પાસણ્ડા, દિટ્ઠિયો ઉપનિસ્સિતા;

ન તે ધમ્મં વિજાનન્તિ, ન તે ધમ્મસ્સ કોવિદા.

૧૮૫. ‘‘અત્થિ સક્યકુલે જાતો, બુદ્ધો અપ્પટિપુગ્ગલો;

સો મે ધમ્મમદેસેસિ, દિટ્ઠીનં સમતિક્કમં.

૧૮૬. ‘‘દુક્ખં દુક્ખસમુપ્પાદં, દુક્ખસ્સ ચ અતિક્કમં;

અરિયં ચટ્ઠઙ્ગિકં મગ્ગં, દુક્ખૂપસમગામિનં.

૧૮૭. ‘‘તસ્સાહં વચનં સુત્વા, વિહરિં સાસને રતા;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૮૮. ‘‘સબ્બત્થ વિહતા નન્દી, તમોખન્ધો પદાલિતો;

એવં જાનાહિ પાપિમ, નિહતો ત્વમસિ અન્તક’’.

… ચાલા થેરી….

૩. ઉપચાલાથેરીગાથા

૧૮૯. ‘‘સતિમતી ચક્ખુમતી, ભિક્ખુની ભાવિતિન્દ્રિયા;

પટિવિજ્ઝિં પદં સન્તં, અકાપુરિસસેવિતં’’.

૧૯૦. ‘‘કિં નુ જાતિં ન રોચેસિ, જાતો કામાનિ ભુઞ્જતિ;

ભુઞ્જાહિ કામરતિયો, માહુ પચ્છાનુતાપિની’’.

૧૯૧. ‘‘જાતસ્સ મરણં હોતિ, હત્થપાદાન છેદનં;

વધબન્ધપરિક્લેસં, જાતો દુક્ખં નિગચ્છતિ.

૧૯૨. ‘‘અત્થિ સક્યકુલે જાતો, સમ્બુદ્ધો અપરાજિતો;

સો મે ધમ્મમદેસેસિ, જાતિયા સમતિક્કમં.

૧૯૩. ‘‘દુક્ખં દુક્ખસમુપ્પાદં, દુક્ખસ્સ ચ અતિક્કમં;

અરિયં ચટ્ઠઙ્ગિકં મગ્ગં, દુક્ખૂપસમગામિનં.

૧૯૪. ‘‘તસ્સાહં વચનં સુત્વા, વિહરિં સાસને રતા;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૧૯૫. ‘‘સબ્બત્થ વિહતા નન્દી, તમોખન્ધો પદાલિતો;

એવં જાનાહિ પાપિમ, નિહતો ત્વમસિ અન્તક’’.

… ઉપચાલા થેરી….

સત્તકનિપાતો નિટ્ઠિતો.