૫. પઞ્ચમવગ્ગો

૧. કુમારકસ્સપત્થેરગાથા

૨૦૧. ‘‘અહો બુદ્ધા અહો ધમ્મા, અહો નો સત્થુ સમ્પદા;

યત્થ એતાદિસં ધમ્મં, સાવકો સચ્છિકાહિ’’તિ.

૨૦૨. ‘‘અસઙ્ખેય્યેસુ કપ્પેસુ, સક્કાયાધિગતા અહૂ;

તેસમયં પચ્છિમકો, ચરિમોયં સમુસ્સયો;

જાતિમરણસંસારો, નત્થિ દાનિ પુનબ્ભવો’’તિ.

… કુમારકસ્સપો થેરો….

૨. ધમ્મપાલત્થેરગાથા

૨૦૩. ‘‘યો હવે દહરો ભિક્ખુ, યુઞ્જતિ બુદ્ધસાસને;

જાગરો સ હિ સુત્તેસુ [પતિસુત્તેસુ (સી. ક.)], અમોઘં તસ્સ જીવિતં.

૨૦૪. ‘‘તસ્મા સદ્ધઞ્ચ સીલઞ્ચ, પસાદં ધમ્મદસ્સનં;

અનુયુઞ્જેથ મેધાવી, સરં બુદ્ધાન સાસન’’ન્તિ.

… ધમ્મપાલો થેરો….

૩. બ્રહ્માલિત્થેરગાથા

૨૦૫. ‘‘કસ્સિન્દ્રિયાનિ સમથઙ્ગતાનિ, અસ્સા યથા સારથિના સુદન્તા;

પહીનમાનસ્સ અનાસવસ્સ, દેવાપિ કસ્સ [તસ્સ (બહૂસુ)] પિહયન્તિ તાદિનો’’તિ.

૨૦૬. [ધ. પ. ૯૪ ધમ્મપદેપિ] ‘‘મય્હિન્દ્રિયાનિ સમથઙ્ગતાનિ, અસ્સા યથા સારથિના સુદન્તા;

પહીનમાનસ્સ અનાસવસ્સ, દેવાપિ મય્હં પિહયન્તિ તાદિનો’’તિ.

… બ્રહ્માલિ થેરો….

૪. મોઘરાજત્થેરગાથા

૨૦૭. ‘‘છવિપાપક ચિત્તભદ્દક, મોઘરાજ સતતં સમાહિતો;

હેમન્તિકસીતકાલરત્તિયો [હેમન્તિકકાલરત્તિયો (ક.)], ભિક્ખુ ત્વંસિ કથં કરિસ્સસિ’’.

૨૦૮. ‘‘સમ્પન્નસસ્સા મગધા, કેવલા ઇતિ મે સુતં;

પલાલચ્છન્નકો સેય્યં, યથઞ્ઞે સુખજીવિનો’’તિ.

… મોઘરાજા થેરો….

૫. વિસાખપઞ્ચાલપુત્તત્થેરગાથા

૨૦૯. ‘‘ન ઉક્ખિપે નો ચ પરિક્ખિપે પરે, ઓક્ખિપે પારગતં ન એરયે;

ન ચત્તવણ્ણં પરિસાસુ બ્યાહરે, અનુદ્ધતો સમ્મિતભાણિ સુબ્બતો.

૨૧૦. ‘‘સુસુખુમનિપુણત્થદસ્સિના, મતિકુસલેન નિવાતવુત્તિના;

સંસેવિતવુદ્ધસીલિના, નિબ્બાનં ન હિ તેન દુલ્લભ’’ન્તિ.

… વિસાખો પઞ્ચાલપુત્તો થેરો ….

૬. ચૂળકત્થેરગાથા

૨૧૧. ‘‘નદન્તિ મોરા સુસિખા સુપેખુણા, સુનીલગીવા સુમુખા સુગજ્જિનો;

સુસદ્દલા ચાપિ મહામહી અયં, સુબ્યાપિતમ્બુ સુવલાહકં નભં.

૨૧૨. ‘‘સુકલ્લરૂપો સુમનસ્સ ઝાયતં [ઝાયિતં (સ્યા. ક.)], સુનિક્કમો સાધુ સુબુદ્ધસાસને;

સુસુક્કસુક્કં નિપુણં સુદુદ્દસં, ફુસાહિ તં ઉત્તમમચ્ચુતં પદ’’ન્તિ.

… ચૂળકો [ચૂલકો (સી. અટ્ઠ.)] થેરો….

૭. અનૂપમત્થેરગાથા

૨૧૩. ‘‘નન્દમાનાગતં ચિત્તં, સૂલમારોપમાનકં;

તેન તેનેવ વજસિ, યેન સૂલં કલિઙ્ગરં.

૨૧૪. ‘‘તાહં ચિત્તકલિં બ્રૂમિ, તં બ્રૂમિ ચિત્તદુબ્ભકં;

સત્થા તે દુલ્લભો લદ્ધો, માનત્થે મં નિયોજયી’’તિ.

… અનૂપમો થેરો….

૮. વજ્જિતત્થેરગાથા

૨૧૫. ‘‘સંસરં દીઘમદ્ધાનં, ગતીસુ પરિવત્તિસં;

અપસ્સં અરિયસચ્ચાનિ, અન્ધભૂતો [અન્ધીભૂતો (ક.)] પુથુજ્જનો.

૨૧૬. ‘‘તસ્સ મે અપ્પમત્તસ્સ, સંસારા વિનળીકતા;

સબ્બા ગતી સમુચ્છિન્ના, નત્થિ દાનિ પુનબ્ભવો’’તિ.

… વજ્જિતો થેરો….

૯. સન્ધિતત્થેરગાથા

૨૧૭. ‘‘અસ્સત્થે હરિતોભાસે, સંવિરૂળ્હમ્હિ પાદપે;

એકં બુદ્ધગતં સઞ્ઞં, અલભિત્થં [અલભિં હં (ક.)] પતિસ્સતો.

૨૧૮. ‘‘એકતિંસે ઇતો કપ્પે, યં સઞ્ઞમલભિં તદા;

તસ્સા સઞ્ઞાય વાહસા, પત્તો મે આસવક્ખયો’’તિ.

… સન્ધિતો થેરો….

વગ્ગો પઞ્ચમો નિટ્ઠિતો.

તસ્સુદ્દાનં –

કુમારકસ્સપો થેરો, ધમ્મપાલો ચ બ્રહ્માલિ;

મોઘરાજા વિસાખો ચ, ચૂળકો ચ અનૂપમો;

વજ્જિતો સન્ધિતો થેરો, કિલેસરજવાહનોતિ.

દુકનિપાતો નિટ્ઠિતો.