૨. દુકનિપાતો

૧. પઠમવગ્ગો

૧. ઉત્તરત્થેરગાથા

૧૨૧. ‘‘નત્થિ કોચિ ભવો નિચ્ચો, સઙ્ખારા વાપિ સસ્સતા;

ઉપ્પજ્જન્તિ ચ તે ખન્ધા, ચવન્તિ અપરાપરં.

૧૨૨. ‘‘એતમાદીનં ઞત્વા, ભવેનમ્હિ અનત્થિકો;

નિસ્સટો સબ્બકામેહિ, પત્તો મે આસવક્ખયો’’તિ.

ઇત્થં સુદં આયસ્મા ઉત્તરો થેરો ગાથાયો અભાસિત્થાતિ.

૨. પિણ્ડોલભારદ્વાજત્થેરગાથા

૧૨૩. ‘‘નયિદં અનયેન જીવિતં, નાહારો હદયસ્સ સન્તિકો;

આહારટ્ઠિતિકો સમુસ્સયો, ઇતિ દિસ્વાન ચરામિ એસનં.

૧૨૪. ‘‘પઙ્કોતિ હિ નં પવેદયું, યાયં વન્દનપૂજના કુલેસુ;

સુખુમં સલ્લં દુરુબ્બહં, સક્કારો કાપુરિસેન દુજ્જહો’’તિ.

ઇત્થં સુદં આયસ્મા પિણ્ડોલભારદ્વાજો થેરો ગાથાયો અભાસિત્થાતિ.

૩. વલ્લિયત્થેરગાથા

૧૨૫. ‘‘મક્કટો પઞ્ચદ્વારાયં, કુટિકાયં પસક્કિય;

દ્વારેન અનુપરિયેતિ, ઘટ્ટયન્તો મુહું મુહું.

૧૨૬. ‘‘તિટ્ઠ મક્કટ મા ધાવિ, ન હિ તે તં યથા પુરે;

નિગ્ગહીતોસિ પઞ્ઞાય, નેવ દૂરં ગમિસ્સતી’’તિ.

… વલ્લિયો થેરો….

૪. ગઙ્ગાતીરિયત્થેરગાથા

૧૨૭. ‘‘તિણ્ણં મે તાલપત્તાનં, ગઙ્ગાતીરે કુટી કતા;

છવસિત્તોવ મે પત્તો, પંસુકૂલઞ્ચ ચીવરં.

૧૨૮. ‘‘દ્વિન્નં અન્તરવસ્સાનં, એકા વાચા મે ભાસિતા;

તતિયે અન્તરવસ્સમ્હિ, તમોખન્ધો [તમોક્ખન્ધો (સી. સ્યા.)] પદાલિતો’’તિ.

… ગઙ્ગાતીરિયો થેરો….

૫. અજિનત્થેરગાથા

૧૨૯. ‘‘અપિ ચે હોતિ તેવિજ્જો, મચ્ચુહાયી અનાસવો;

અપ્પઞ્ઞાતોતિ નં બાલા, અવજાનન્તિ અજાનતા.

૧૩૦. ‘‘યો ચ ખો અન્નપાનસ્સ, લાભી હોતીધ પુગ્ગલો;

પાપધમ્મોપિ ચે હોતિ, સો નેસં હોતિ સક્કતો’’તિ.

… અજિનો થેરો….

૬. મેળજિનત્થેરગાથા

૧૩૧. ‘‘યદાહં ધમ્મમસ્સોસિં, ભાસમાનસ્સ સત્થુનો;

ન કઙ્ખમભિજાનામિ, સબ્બઞ્ઞૂઅપરાજિતે.

૧૩૨. ‘‘સત્થવાહે મહાવીરે, સારથીનં વરુત્તમે;

મગ્ગે પટિપદાયં વા, કઙ્ખા મય્હં ન વિજ્જતી’’તિ.

… મેળજિનો થેરો….

૭. રાધત્થેરગાથા

૧૩૩. [ધ. પ. ૧૩ ધમ્મપદે] ‘‘યથા અગારં દુચ્છન્નં, વુટ્ઠી સમતિવિજ્ઝતિ;

એવં અભાવિતં ચિત્તં, રાગો સમતિવિજ્ઝતિ.

૧૩૪. [ધ. પ. ૧૪ ધમ્મપદે] ‘‘યથા અગારં સુચ્છન્નં, વુડ્ઢી ન સમતિવિજ્ઝતિ;

એવં સુભાવિતં ચિત્તં, રાગો ન સમતિવિજ્ઝતી’’તિ.

… રાધો થેરો….

૮. સુરાધત્થેરગાથા

૧૩૫. ‘‘ખીણા હિ મય્હં જાતિ, વુસિતં જિનસાસનં;

પહીનો જાલસઙ્ખાતો, ભવનેત્તિ સમૂહતા.

૧૩૬. ‘‘યસ્સત્થાય પબ્બજિતો, અગારસ્માનગારિયં;

સો મે અત્થો અનુપ્પત્તો, સબ્બસંયોજનક્ખયો’’તિ.

… સુરાધો થેરો….

૯. ગોતમત્થેરગાથા

૧૩૭. ‘‘સુખં સુપન્તિ મુનયો, યે ઇત્થીસુ ન બજ્ઝરે;

સદા વે રક્ખિતબ્બાસુ, યાસુ સચ્ચં સુદુલ્લભં.

૧૩૮. ‘‘વધં ચરિમ્હ તે કામ, અનણા દાનિ તે મયં;

ગચ્છામ દાનિ નિબ્બાનં, યત્થ ગન્ત્વા ન સોચતી’’તિ.

… ગોતમો થેરો….

૧૦. વસભત્થેરગાથા

૧૩૯. ‘‘પુબ્બે હનતિ અત્તાનં, પચ્છા હનતિ સો પરે;

સુહતં હન્તિ અત્તાનં, વીતંસેનેવ પક્ખિમા.

૧૪૦. ‘‘ન બ્રાહ્મણો બહિવણ્ણો, અન્તો વણ્ણો હિ બ્રાહ્મણો;

યસ્મિં પાપાનિ કમ્માનિ, સ વે કણ્હો સુજમ્પતી’’તિ.

… વસભો થેરો….

વગ્ગો પઠમો નિટ્ઠિતો.

તસ્સુદ્દાનં –

ઉત્તરો ચેવ પિણ્ડોલો, વલ્લિયો તીરિયો ઇસિ;

અજિનો ચ મેળજિનો, રાધો સુરાધો ગોતમો;

વસભેન ઇમે હોન્તિ, દસ થેરા મહિદ્ધિકાતિ.

૨. દુતિયવગ્ગો

૧. મહાચુન્દત્થેરગાથા

૧૪૧. ‘‘સુસ્સૂસા સુતવદ્ધની, સુતં પઞ્ઞાય વદ્ધનં;

પઞ્ઞાય અત્થં જાનાતિ, ઞાતો અત્થો સુખાવહો.

૧૪૨. ‘‘સેવેથ પન્તાનિ સેનાસનાનિ, ચરેય્ય સંયોજનવિપ્પમોક્ખં;

સચે રતિં નાધિગચ્છેય્ય તત્થ, સઙ્ઘે વસે રક્ખિતત્તો સતિમા’’તિ.

… મહાચુન્દો થેરો….

૨. જોતિદાસત્થેરગાથા

૧૪૩. ‘‘યે ખો તે વેઠમિસ્સેન [વેઘમિસ્સેન (સી. સ્યા.), વે ગમિસ્સેન, વેખમિસ્સેન (ક.)], નાનત્તેન ચ કમ્મુના;

મનુસ્સે ઉપરુન્ધન્તિ, ફરુસૂપક્કમા જના;

તેપિ તત્થેવ કીરન્તિ, ન હિ કમ્મં પનસ્સતિ.

૧૪૪. ‘‘યં કરોતિ નરો કમ્મં, કલ્યાણં યદિ પાપકં;

તસ્સ તસ્સેવ દાયાદો, યં યં કમ્મં પકુબ્બતી’’તિ.

… જોતિદાસો થેરો….

૩. હેરઞ્ઞકાનિત્થેરગાથા

૧૪૫. ‘‘અચ્ચયન્તિ અહોરત્તા, જીવિતં ઉપરુજ્ઝતિ;

આયુ ખીયતિ મચ્ચાનં, કુન્નદીનંવ ઓદકં.

૧૪૬. ‘‘અથ પાપાનિ કમ્માનિ, કરં બાલો ન બુજ્ઝતિ;

પચ્છાસ્સ કટુકં હોતિ, વિપાકો હિસ્સ પાપકો’’તિ.

… હેરઞ્ઞકાનિત્થેરો….

૪. સોમમિત્તત્થેરગાથા

૧૪૭. ‘‘પરિત્તં દારુમારુય્હ, યથા સીદે મહણ્ણવે;

એવં કુસીતમાગમ્મ, સાધુજીવીપિ સીદતિ;

તસ્મા તં પરિવજ્જેય્ય, કુસીતં હીનવીરિયં.

૧૪૮. ‘‘પવિવિત્તેહિ અરિયેહિ, પહિતત્તેહિ ઝાયિભિ;

નિચ્ચં આરદ્ધવીરિયેહિ, પણ્ડિતેહિ સહાવસે’’તિ.

… સોમમિત્તો થેરો….

૫. સબ્બમિત્તત્થેરગાથા

૧૪૯. ‘‘જનો જનમ્હિ સમ્બદ્ધો [સમ્બદ્ધો (સ્યા. ક.)], જનમેવસ્સિતો જનો;

જનો જનેન હેઠીયતિ, હેઠેતિ ચ [બોધિયતિ, બાધેતિ ચ (ક.)] જનો જનં.

૧૫૦. ‘‘કો હિ તસ્સ જનેનત્થો, જનેન જનિતેન વા;

જનં ઓહાય ગચ્છં તં, હેઠયિત્વા [બાધયિત્વા (ક.)] બહું જન’’ન્તિ.

… સબ્બમિત્તો થેરો….

૬. મહાકાળત્થેરગાથા

૧૫૧. ‘‘કાળી ઇત્થી બ્રહતી ધઙ્કરૂપા, સત્થિઞ્ચ ભેત્વા અપરઞ્ચ સત્થિં;

બાહઞ્ચ ભેત્વા અપરઞ્ચ બાહં, સીસઞ્ચ ભેત્વા દધિથાલકંવ;

એસા નિસિન્ના અભિસન્દહિત્વા.

૧૫૨. ‘‘યો વે અવિદ્વા ઉપધિં કરોતિ, પુનપ્પુનં દુક્ખમુપેતિ મન્દો;

તસ્મા પજાનં ઉપધિં ન કયિરા, માહં પુન ભિન્નસિરો સયિસ્સ’’ન્તિ [પસ્સિસ્સન્તિ (ક.)].

… મહાકાળો થેરો….

૭. તિસ્સત્થેરગાથા

૧૫૩. ‘‘બહૂ સપત્તે લભતિ, મુણ્ડો સઙ્ઘાટિપારુતો;

લાભી અન્નસ્સ પાનસ્સ, વત્થસ્સ સયનસ્સ ચ.

૧૫૪. ‘‘એતમાદીનવં ઞત્વા, સક્કારેસુ મહબ્ભયં;

અપ્પલાભો અનવસ્સુતો, સતો ભિક્ખુ પરિબ્બજે’’તિ.

… તિસ્સો થેરો….

૮. કિમિલત્થેરગાથા

૧૫૫. ‘‘પાચીનવંસદાયમ્હિ, સક્યપુત્તા સહાયકા;

પહાયાનપ્પકે ભોગે, ઉઞ્છાપત્તાગતે રતા.

૧૫૬. ‘‘આરદ્ધવીરિયા પહિતત્તા, નિચ્ચં દળ્હપરક્કમા;

રમન્તિ ધમ્મરતિયા, હિત્વાન લોકિયં રતિ’’ન્તિ.

… કિમિલો [કિમ્બિલો (સી. સ્યા. પી.)] થેરો….

૯. નન્દત્થેરગાથા

૧૫૭. ‘‘અયોનિસો મનસિકારા, મણ્ડનં અનુયુઞ્જિસં;

ઉદ્ધતો ચપલો ચાસિં, કામરાગેન અટ્ટિતો.

૧૫૮. ‘‘ઉપાયકુસલેનાહં, બુદ્ધેનાદિચ્ચબન્ધુના;

યોનિસો પટિપજ્જિત્વા, ભવે ચિત્તં ઉદબ્બહિ’’ન્તિ.

… નન્દો થેરો….

૧૦. સિરિમત્થેરગાથા

૧૫૯. ‘‘પરે ચ નં પસંસન્તિ, અત્તા ચે અસમાહિતો;

મોઘં પરે પસંસન્તિ, અત્તા હિ અસમાહિતો.

૧૬૦. ‘‘પરે ચ નં ગરહન્તિ, અત્તા ચે સુસમાહિતો;

મોઘં પરે ગરહન્તિ, અત્તા હિ સુસમાહિતો’’તિ.

… સિરિમા થેરો….

વગ્ગો દુતિયો નિટ્ઠિતો.

તસ્સુદ્દાનં –

ચુન્દો ચ જોતિદાસો ચ, થેરો હેરઞ્ઞકાનિ ચ;

સોમમિત્તો સબ્બમિત્તો, કાલો તિસ્સો ચ કિમિલો [કિમ્બિલો (સી. સ્યા. પી.), છન્દલક્ખણાનુલોમં];

નન્દો ચ સિરિમા ચેવ, દસ થેરા મહિદ્ધિકાતિ.

૩. તતિયવગ્ગો

૧. ઉત્તરત્થેરગાથા

૧૬૧. ‘‘ખન્ધા મયા પરિઞ્ઞાતા, તણ્હા મે સુસમૂહતા;

ભાવિતા મમ બોજ્ઝઙ્ગા, પત્તો મે આસવક્ખયો.

૧૬૨. ‘‘સોહં ખન્ધે પરિઞ્ઞાય, અબ્બહિત્વાન [અબ્બુહિત્વાન (ક.)] જાલિનિં;

ભાવયિત્વાન બોજ્ઝઙ્ગે, નિબ્બાયિસ્સં અનાસવો’’તિ.

… ઉત્તરો થેરો….

૨. ભદ્દજિત્થેરગાથા

૧૬૩. ‘‘પનાદો નામ સો રાજા, યસ્સ યૂપો સુવણ્ણયો;

તિરિયં સોળસુબ્બેધો [સોળસપબ્બેધો (સી. અટ્ઠ.), સોળસબ્બાણો (?)], ઉબ્ભમાહુ [ઉદ્ધમાહુ (સી.), ઉચ્ચમાહુ (સ્યા.)] સહસ્સધા.

૧૬૪. ‘‘સહસ્સકણ્ડો સતગેણ્ડુ, ધજાલુ હરિતામયો;

અનચ્ચું તત્થ ગન્ધબ્બા, છસહસ્સાનિ સત્તધા’’તિ.

… ભદ્દજિત્થેરો….

૩. સોભિતત્થેરગાથા