૪. ચતુત્થવગ્ગો

૧. મિગસિરત્થેરગાથા

૧૮૧. ‘‘યતો અહં પબ્બજિતો, સમ્માસમ્બુદ્ધસાસને;

વિમુચ્ચમાનો ઉગ્ગચ્છિં, કામધાતું ઉપચ્ચગં.

૧૮૨. ‘‘બ્રહ્મુનો પેક્ખમાનસ્સ, તતો ચિત્તં વિમુચ્ચિ મે;

અકુપ્પા મે વિમુત્તીતિ, સબ્બસંયોજનક્ખયા’’તિ.

… મિગસિરો થેરો….

૨. સિવકત્થેરગાથા

૧૮૩. ‘‘અનિચ્ચાનિ ગહકાનિ, તત્થ તત્થ પુનપ્પુનં;

ગહકારં [ગહકારકં (સી. પી.)] ગવેસન્તો, દુક્ખા જાતિ પુનપ્પુનં.

૧૮૪. ‘‘ગહકારક દિટ્ઠોસિ, પુન ગેહં ન કાહસિ;

સબ્બા તે ફાસુકા ભગ્ગા, થૂણિકા [થૂણિરા (પી. ક.), ધુણિરા (સ્યા.)] ચ વિદાલિતા [પદાલિતા (સી. સ્યા.)];

વિમરિયાદિકતં ચિત્તં, ઇધેવ વિધમિસ્સતી’’તિ.

… સિવકો [સીવકો (સી.)] થેરો….

૩. ઉપવાણત્થેરગાથા

૧૮૫. ‘‘અરહં સુગતો લોકે, વાતેહાબાધિતો [… બાધિતો (ક.)] મુનિ;

સચે ઉણ્હોદકં અત્થિ, મુનિનો દેહિ બ્રાહ્મણ.

૧૮૬. ‘‘પૂજિતો પૂજનેય્યાનં [પૂજનીયાનં (સી.)], સક્કરેય્યાન સક્કતો;

અપચિતોપચેય્યાનં [અપચનીયાનં (સી.), અપચિનેય્યાનં (સ્યા.)], તસ્સ ઇચ્છામિ હાતવે’’તિ.

… ઉપવાણો થેરો….

૪. ઇસિદિન્નત્થેરગાથા

૧૮૭. ‘‘દિટ્ઠા મયા ધમ્મધરા ઉપાસકા, કામા અનિચ્ચા ઇતિ ભાસમાના;

સારત્તરત્તા મણિકુણ્ડલેસુ, પુત્તેસુ દારેસુ ચ તે અપેક્ખા.

૧૮૮. ‘‘અદ્ધા ન જાનન્તિ યતોધ ધમ્મં, કામા અનિચ્ચા ઇતિ ચાપિ આહુ;

રાગઞ્ચ તેસં ન બલત્થિ છેત્તું, તસ્મા સિતા પુત્તદારં ધનઞ્ચા’’તિ.

… ઇસિદિન્નો થેરો….

૫. સમ્બુલકચ્ચાનત્થેરગાથા

૧૮૯. ‘‘દેવો ચ વસ્સતિ દેવો ચ ગળગળાયતિ,

એકકો ચાહં ભેરવે બિલે વિહરામિ;

તસ્સ મય્હં એકકસ્સ ભેરવે બિલે વિહરતો,

નત્થિ ભયં વા છમ્ભિતત્તં વા લોમહંસો વા.

૧૯૦. ‘‘ધમ્મતા મમસા યસ્સ મે, એકકસ્સ ભેરવે બિલે;

વિહરતો નત્થિ ભયં વા, છમ્ભિતત્તં વા લોમહંસો વા’’તિ.

… સમ્બુલકચ્ચાનો [સમ્બહુલકચ્ચાનો (ક.)] થેરો….

૬. નિતકત્થેરગાથા

૧૯૧. [ઉદા. ૩૪ ઉદાનેપિ] ‘‘કસ્સ સેલૂપમં ચિત્તં, ઠિતં નાનુપકમ્પતિ;

વિરત્તં રજનીયેસુ, કુપ્પનીયે ન કુપ્પતિ;

યસ્સેવં ભાવિતં ચિત્તં, કુતો તં દુક્ખમેસ્સતિ.

૧૯૨. ‘‘મમ સેલૂપમં ચિત્તં, ઠિતં નાનુપકમ્પતિ;

વિરત્તં રજનીયેસુ, કુપ્પનીયે ન કુપ્પતિ;

મમેવં ભાવિતં ચિત્તં, કુતો મં દુક્ખમેસ્સતી’’તિ.

… નિતકો [ખિતકો (સી. સ્યા.)] થેરો….

૭. સોણપોટિરિયત્થેરગાથા

૧૯૩. ‘‘ન તાવ સુપિતું હોતિ, રત્તિ નક્ખત્તમાલિની;

પટિજગ્ગિતુમેવેસા, રત્તિ હોતિ વિજાનતા.

૧૯૪. ‘‘હત્થિક્ખન્ધાવપતિતં, કુઞ્જરો ચે અનુક્કમે;

સઙ્ગામે મે મતં સેય્યો, યઞ્ચે જીવે પરાજિતો’’તિ.

… સોણો પોટિરિયો [સેલિસ્સરિયો (સી.), પોટ્ટિરિયપુત્તો (સ્યા.)] થેરો ….

૮. નિસભત્થેરગાથા

૧૯૫. ‘‘પઞ્ચ કામગુણે હિત્વા, પિયરૂપે મનોરમે;

સદ્ધાય ઘરા નિક્ખમ્મ, દુક્ખસ્સન્તકરો ભવે.

૧૯૬. ‘‘નાભિનન્દામિ મરણં, નાભિનન્દામિ જીવિતં;

કાલઞ્ચ પટિકઙ્ખામિ, સમ્પજાનો પતિસ્સતો’’તિ.

… નિસભો થેરો….

૯. ઉસભત્થેરગાથા

૧૯૭. ‘‘અમ્બપલ્લવસઙ્કાસં, અંસે કત્વાન ચીવરં;

નિસિન્નો હત્થિગીવાયં, ગામં પિણ્ડાય પાવિસિં.

૧૯૮. ‘‘હત્થિક્ખન્ધતો ઓરુય્હ, સંવેગં અલભિં તદા;

સોહં દિત્તો તદા સન્તો, પત્તો મે આસવક્ખયો’’તિ.

… ઉસભો થેરો….

૧૦. કપ્પટકુરત્થેરગાથા

૧૯૯. ‘‘અયમિતિ કપ્પટો કપ્પટકુરો, અચ્છાય અતિભરિતાય [અતિભરિયાય (સી. ક.), અચ્ચં ભરાય (સ્યા.)];

અમતઘટિકાયં ધમ્મકટમત્તો [ધમ્મકટપત્તો (સ્યા. ક. અટ્ઠ.), ધમ્મકટમગ્ગો (સી. અટ્ઠ.)], કતપદં ઝાનાનિ ઓચેતું.

૨૦૦. ‘‘મા ખો ત્વં કપ્પટ પચાલેસિ, મા ત્વં ઉપકણ્ણમ્હિ તાળેસ્સં;

ન હિ [ન વા (ક.)] ત્વં કપ્પટ મત્તમઞ્ઞાસિ, સઙ્ઘમજ્ઝમ્હિ પચલાયમાનોતિ.

… કપ્પટકુરો થેરો….

વગ્ગો ચતુત્થો નિટ્ઠિતો.

તસ્સુદ્દાનં –

મિગસિરો સિવકો ચ, ઉપવાનો ચ પણ્ડિતો;

ઇસિદિન્નો ચ કચ્ચાનો, નિતકો ચ મહાવસી;

પોટિરિયપુત્તો નિસભો, ઉસભો કપ્પટકુરોતિ.