૩. તતિયવગ્ગો

૧. ઉત્તરત્થેરગાથા

૧૬૧. ‘‘ખન્ધા મયા પરિઞ્ઞાતા, તણ્હા મે સુસમૂહતા;

ભાવિતા મમ બોજ્ઝઙ્ગા, પત્તો મે આસવક્ખયો.

૧૬૨. ‘‘સોહં ખન્ધે પરિઞ્ઞાય, અબ્બહિત્વાન [અબ્બુહિત્વાન (ક.)] જાલિનિં;

ભાવયિત્વાન બોજ્ઝઙ્ગે, નિબ્બાયિસ્સં અનાસવો’’તિ.

… ઉત્તરો થેરો….

૨. ભદ્દજિત્થેરગાથા

૧૬૩. ‘‘પનાદો નામ સો રાજા, યસ્સ યૂપો સુવણ્ણયો;

તિરિયં સોળસુબ્બેધો [સોળસપબ્બેધો (સી. અટ્ઠ.), સોળસબ્બાણો (?)], ઉબ્ભમાહુ [ઉદ્ધમાહુ (સી.), ઉચ્ચમાહુ (સ્યા.)] સહસ્સધા.

૧૬૪. ‘‘સહસ્સકણ્ડો સતગેણ્ડુ, ધજાલુ હરિતામયો;

અનચ્ચું તત્થ ગન્ધબ્બા, છસહસ્સાનિ સત્તધા’’તિ.

… ભદ્દજિત્થેરો….

૩. સોભિતત્થેરગાથા

૧૬૫. ‘‘સતિમા પઞ્ઞવા ભિક્ખુ, આરદ્ધબલવીરિયો;

પઞ્ચ કપ્પસતાનાહં, એકરત્તિં અનુસ્સરિં.

૧૬૬. ‘‘ચત્તારો સતિપટ્ઠાને, સત્ત અટ્ઠ ચ ભાવયં;

પઞ્ચ કપ્પસતાનાહં, એકરત્તિં અનુસ્સરિ’’ન્તિ.

… સોભિતો થેરો….

૪. વલ્લિયત્થેરગાથા

૧૬૭. ‘‘યં કિચ્ચં દળ્હવીરિયેન, યં કિચ્ચં બોદ્ધુમિચ્છતા;

કરિસ્સં નાવરજ્ઝિસ્સં [નાવરુજ્ઝિસ્સં (ક. સી. ક.)], પસ્સ વીરિયં પરક્કમ.

૧૬૮. ‘‘ત્વઞ્ચ મે મગ્ગમક્ખાહિ, અઞ્જસં અમતોગધં;

અહં મોનેન મોનિસ્સં, ગઙ્ગાસોતોવ સાગર’’ન્તિ.

… વલ્લિયો થેરો….

૫. વીતસોકત્થેરગાથા

૧૬૯. ‘‘કેસે મે ઓલિખિસ્સન્તિ, કપ્પકો ઉપસઙ્કમિ;

તતો આદાસમાદાય, સરીરં પચ્ચવેક્ખિસં.

૧૭૦. ‘‘તુચ્છો કાયો અદિસ્સિત્થ, અન્ધકારો તમો બ્યગા;

સબ્બે ચોળા સમુચ્છિન્ના, નત્થિ દાનિ પુનબ્ભવો’’તિ.

… વીતસોકો થેરો….

૬. પુણ્ણમાસત્થેરગાથા

૧૭૧. ‘‘પઞ્ચ નીવરણે હિત્વા, યોગક્ખેમસ્સ પત્તિયા;

ધમ્માદાસં ગહેત્વાન, ઞાણદસ્સનમત્તનો.

૧૭૨. ‘‘પચ્ચવેક્ખિં ઇમં કાયં, સબ્બં સન્તરબાહિરં;

અજ્ઝત્તઞ્ચ બહિદ્ધા ચ, તુચ્છો કાયો અદિસ્સથા’’તિ.

… પુણ્ણમાસો થેરો….

૭. નન્દકત્થેરગાથા

૧૭૩. ‘‘યથાપિ ભદ્દો આજઞ્ઞો, ખલિત્વા પતિતિટ્ઠતિ;

ભિય્યો લદ્દાન સંવેગં, અદીનો વહતે ધુરં.

૧૭૪. ‘‘એવં દસ્સનસમ્પન્નં, સમ્માસમ્બુદ્ધસાવકં;

આજાનીયં મં ધારેથ, પુત્તં બુદ્ધસ્સ ઓરસ’’ન્તિ.

… નન્દકો થેરો….

૮. ભરતત્થેરગાથા

૧૭૫. ‘‘એહિ નન્દક ગચ્છામ, ઉપજ્ઝાયસ્સ સન્તિકં;

સીહનાદં નદિસ્સામ, બુદ્ધસેટ્ઠસ્સ સમ્મુખા.

૧૭૬. ‘‘યાય નો અનુકમ્પાય, અમ્હે પબ્બાજયી મુનિ;

સો નો અત્થો અનુપ્પત્તો, સબ્બસંયોજનક્ખયો’’તિ.

… ભરતો થેરો….

૯. ભારદ્વાજત્થેરગાથા

૧૭૭. ‘‘નદન્તિ એવં સપ્પઞ્ઞા, સીહાવ ગિરિગબ્ભરે;

વીરા વિજિતસઙ્ગામા, જેત્વા મારં સવાહનિં [સવાહનં (બહૂસુ)].

૧૭૮. ‘‘સત્થા ચ પરિચિણ્ણો મે, ધમ્મો સઙ્ઘો ચ પૂજિતો;

અહઞ્ચ વિત્તો સુમનો, પુત્તં દિસ્વા અનાસવ’’ન્તિ.

… ભારદ્વાજો થેરો….

૧૦. કણ્હદિન્નત્થેરગાથા

૧૭૯. ‘‘ઉપાસિતા સપ્પુરિસા, સુતા ધમ્મા અભિણ્હસો;

સુત્વાન પટિપજ્જિસ્સં, અઞ્જસં અમતોગધં.

૧૮૦. ‘‘ભવરાગહતસ્સ મે સતો, ભવરાગો પુન મે ન વિજ્જતિ;

ન ચાહુ ન ચ મે ભવિસ્સતિ, ન ચ મે એતરહિ વિજ્જતી’’તિ.

… કણ્હદિન્નો થેરો….

વગ્ગો તતિયો નિટ્ઠિતો.

તસ્સુદ્દાનં –

ઉત્તરો ભદ્દજિત્થેરો, સોભિતો વલ્લિયો ઇસિ;

વીતસોકો ચ યો થેરો, પુણ્ણમાસો ચ નન્દકો;

ભરતો ભારદ્વાજો ચ, કણ્હદિન્નો મહામુનીતિ.