૩. આનન્દત્થેરગાથા

૧૦૧૭. ‘‘પિસુણેન ચ કોધનેન ચ, મચ્છરિના ચ વિભૂતનન્દિના;

સખિતં ન કરેય્ય પણ્ડિતો, પાપો કાપુરિસેન સઙ્ગમો.

૧૦૧૮. ‘‘સદ્ધેન ચ પેસલેન ચ, પઞ્ઞવતા બહુસ્સુતેન ચ;

સખિતં કરેય્ય પણ્ડિતો, ભદ્દો સપ્પુરિસેન સઙ્ગમો.

૧૦૧૯. ‘‘પસ્સ ચિત્તકતં બિમ્બં…પે… યસ્સ નત્થિ ધુવં ઠિતિ.

૧૦૨૦. ‘‘પસ્સ ચિત્તકતં બિમ્બં…પે… વત્થેહિ સોભતિ.

૧૦૨૧. ‘‘અલત્તકકતા …પે… નો ચ પારગવેસિનો.

૧૦૨૨. ‘‘અટ્ઠપદકતા…પે… નો ચ પારગવેસિનો.

૧૦૨૩. ‘‘અઞ્જનીવ નવા…પે… નો ચ પારગવેસિનો.

૧૦૨૪. ‘‘બહુસ્સુતો ચિત્તકથી, બુદ્ધસ્સ પરિચારકો;

પન્નભારો વિસઞ્ઞુત્તો, સેય્યં કપ્પેતિ ગોતમો.

૧૦૨૫. ‘‘ખીણાસવો વિસઞ્ઞુત્તો, સઙ્ગાતીતો સુનિબ્બુતો;

ધારેતિ અન્તિમં દેહં, જાતિમરણપારગૂ.

૧૦૨૬. ‘‘યસ્મિં પતિટ્ઠિતા ધમ્મા, બુદ્ધસ્સાદિચ્ચબન્ધુનો;

નિબ્બાનગમને મગ્ગે, સોયં તિટ્ઠતિ ગોતમો.

૧૦૨૭. ‘‘દ્વાસીતિ બુદ્ધતો ગણ્હિં, દ્વે સહસ્સાનિ ભિક્ખુતો;

ચતુરાસીતિસહસ્સાનિ, યે મે ધમ્મા પવત્તિનો.

૧૦૨૮. ‘‘અપ્પસ્સુતાયં પુરિસો, બલિબદ્દોવ જીરતિ;

મંસાનિ તસ્સ વડ્ઢન્તિ, પઞ્ઞા તસ્સ ન વડ્ઢતિ.

૧૦૨૯. ‘‘બહુસ્સુતો અપ્પસ્સુતં, યો સુતેનાતિમઞ્ઞતિ;

અન્ધો પદીપધારોવ, તથેવ પટિભાતિ મં.

૧૦૩૦. ‘‘બહુસ્સુતં ઉપાસેય્ય, સુતઞ્ચ ન વિનાસયે;

તં મૂલં બ્રહ્મચરિયસ્સ, તસ્મા ધમ્મધરો સિયા.

૧૦૩૧. ‘‘પુબ્બાપરઞ્ઞૂ અત્થઞ્ઞૂ, નિરુત્તિપદકોવિદો;

સુગ્ગહીતઞ્ચ ગણ્હાતિ, અત્થઞ્ચોપપરિક્ખતિ.

૧૦૩૨. ‘‘ખન્ત્યા છન્દિકતો [ખન્તિયા છન્દિતો (?)] હોતિ, ઉસ્સહિત્વા તુલેતિ તં;

સમયે સો પદહતિ, અજ્ઝત્તં સુસમાહિતો.

૧૦૩૩. ‘‘બહુસ્સુતં ધમ્મધરં, સપ્પઞ્ઞં બુદ્ધસાવકં;

ધમ્મવિઞ્ઞાણમાકઙ્ખં, તં ભજેથ તથાવિધં.

૧૦૩૪. ‘‘બહુસ્સુતો ધમ્મધરો, કોસારક્ખો મહેસિનો;

ચક્ખુ સબ્બસ્સ લોકસ્સ, પૂજનીયો બહુસ્સુતો.

૧૦૩૫. ‘‘ધમ્મારામો ધમ્મરતો, ધમ્મં અનુવિચિન્તયં;

ધમ્મં અનુસ્સરં ભિક્ખુ, સદ્ધમ્મા ન પરિહાયતિ.

૧૦૩૬. ‘‘કાયમચ્છેરગરુનો [ગરુકો (સી.)], હિય્યમાને [હિય્યમાનો (સી.)] અનુટ્ઠહે;

સરીરસુખગિદ્ધસ્સ, કુતો સમણફાસુતા.

૧૦૩૭. ‘‘ન પક્ખન્તિ દિસા સબ્બા, ધમ્મા ન પટિભન્તિ મં;

ગતે કલ્યાણમિત્તમ્હિ, અન્ધકારંવ ખાયતિ.

૧૦૩૮. ‘‘અબ્ભતીતસહાયસ્સ, અતીતગતસત્થુનો;

નત્થિ એતાદિસં મિત્તં, યથા કાયગતા સતિ.

૧૦૩૯. ‘‘યે પુરાણા અતીતા તે, નવેહિ ન સમેતિ મે;

સ્વજ્જ એકોવ ઝાયામિ, વસ્સુપેતોવ પક્ખિમા.

૧૦૪૦. ‘‘દસ્સનાય અભિક્કન્તે, નાનાવેરજ્જકે બહૂ;

મા વારયિત્થ સોતારો, પસ્સન્તુ સમયો મમં.

૧૦૪૧. ‘‘દસ્સનાય અભિક્કન્તે, નાનાવેરજ્જકે પુથુ;

કરોતિ સત્થા ઓકાસં, ન નિવારેતિ ચક્ખુમા.

૧૦૪૨. ‘‘પણ્ણવીસતિવસ્સાનિ, સેખભૂતસ્સ મે સતો;

ન કામસઞ્ઞા ઉપ્પજ્જિ, પસ્સ ધમ્મસુધમ્મતં.

૧૦૪૩. ‘‘પણ્ણવીસતિવસ્સાનિ, સેખભૂતસ્સ મે સતો;

ન દોસસઞ્ઞા ઉપ્પજ્જિ, પસ્સ ધમ્મસુધમ્મતં.

૧૦૪૪. ‘‘પણ્ણવીસતિવસ્સાનિ, ભગવન્તં ઉપટ્ઠહિં;

મેત્તેન કાયકમ્મેન, છાયાવ અનપાયિની [અનુપાયિની (સ્યા. ક.)].

૧૦૪૫. ‘‘પણ્ણવીસતિવસ્સાનિ, ભગવન્તં ઉપટ્ઠહિં;

મેત્તેન વચીકમ્મેન, છાયાવ અનપાયિની.

૧૦૪૬. ‘‘પણ્ણવીસતિવસ્સાનિ, ભગવન્તં ઉપટ્ઠહિં;

મેત્તેન મનોકમ્મેન, છાયાવ અનપાયિની.

૧૦૪૭. ‘‘બુદ્ધસ્સ ચઙ્કમન્તસ્સ, પિટ્ઠિતો અનુચઙ્કમિં;

ધમ્મે દેસિયમાનમ્હિ, ઞાણં મે ઉદપજ્જથ.

૧૦૪૮. ‘‘અહં સકરણીયોમ્હિ, સેખો અપ્પત્તમાનસો;

સત્થુ ચ પરિનિબ્બાનં, યો અમ્હં અનુકમ્પકો.

૧૦૪૯. ‘‘તદાસિ યં ભિંસનકં, તદાસિ લોમહંસનં;

સબ્બાકારવરૂપેતે, સમ્બુદ્ધે પરિનિબ્બુતે.

૧૦૫૦. ‘‘બહુસ્સુતો ધમ્મધરો, કોસારક્ખો મહેસિનો;

ચક્ખુ સબ્બસ્સ લોકસ્સ, આનન્દો પરિનિબ્બુતો.

૧૦૫૧. ‘‘બહુસ્સુતો ધમ્મધરો, કોસારક્ખો મહેસિનો;

ચક્ખુ સબ્બસ્સ લોકસ્સ, અન્ધકારે તમોનુદો.

૧૦૫૨. ‘‘ગતિમન્તો સતિમન્તો, ધિતિમન્તો ચ યો ઇસિ;

સદ્ધમ્મધારકો થેરો, આનન્દો રતનાકરો.

૧૦૫૩. ‘‘પરિચિણ્ણો મયા સત્થા, કતં બુદ્ધસ્સ સાસનં;

ઓહિતો ગરુકો ભારો, નત્થિ દાનિ પુનબ્ભવો’’તિ.

… આનન્દો થેરો….

તિંસનિપાતો નિટ્ઠિતો.