૧૦. પારાપરિયત્થેરગાથા

૯૨૦. સમણસ્સ અહુ ચિન્તા, પુપ્ફિતમ્હિ મહાવને;

એકગ્ગસ્સ નિસિન્નસ્સ, પવિવિત્તસ્સ ઝાયિનો.

૯૨૧. ‘‘અઞ્ઞથા લોકનાથમ્હિ, તિટ્ઠન્તે પુરિસુત્તમે;

ઇરિયં આસિ ભિક્ખૂનં, અઞ્ઞથા દાનિ દિસ્સતિ.

૯૨૨. ‘‘સીતવાતપરિત્તાનં, હિરિકોપીનછાદનં;

મત્તટ્ઠિયં અભુઞ્જિંસુ, સન્તુટ્ઠા ઇતરીતરે.

૯૨૩. ‘‘પણીતં યદિ વા લૂખં, અપ્પં વા યદિ વા બહું;

યાપનત્થં અભુઞ્જિંસુ, અગિદ્ધા નાધિમુચ્છિતા.

૯૨૪. ‘‘જીવિતાનં પરિક્ખારે, ભેસજ્જે અથ પચ્ચયે;

ન બાળ્હં ઉસ્સુકા આસું, યથા તે આસવક્ખયે.

૯૨૫. ‘‘અરઞ્ઞે રુક્ખમૂલેસુ, કન્દરાસુ ગુહાસુ ચ;

વિવેકમનુબ્રૂહન્તા, વિહંસુ તપ્પરાયના.

૯૨૬. ‘‘નીચા નિવિટ્ઠા સુભરા, મુદૂ અત્થદ્ધમાનસા;

અબ્યાસેકા અમુખરા, અત્થચિન્તા વસાનુગા.

૯૨૭. ‘‘તતો પાસાદિકં આસિ, ગતં ભુત્તં નિસેવિતં;

સિનિદ્ધા તેલધારાવ, અહોસિ ઇરિયાપથો.

૯૨૮. ‘‘સબ્બાસવપરિક્ખીણા, મહાઝાયી મહાહિતા;

નિબ્બુતા દાનિ તે થેરા, પરિત્તા દાનિ તાદિસા.

૯૨૯. ‘‘કુસલાનઞ્ચ ધમ્માનં, પઞ્ઞાય ચ પરિક્ખયા;

સબ્બાકારવરૂપેતં, લુજ્જતે જિનસાસનં.

૯૩૦. ‘‘પાપકાનઞ્ચ ધમ્માનં, કિલેસાનઞ્ચ યો ઉતુ;

ઉપટ્ઠિતા વિવેકાય, યે ચ સદ્ધમ્મસેસકા.

૯૩૧. ‘‘તે કિલેસા પવડ્ઢન્તા, આવિસન્તિ બહું જનં;

કીળન્તિ મઞ્ઞે બાલેહિ, ઉમ્મત્તેહિવ રક્ખસા.

૯૩૨. ‘‘કિલેસેહાભિભૂતા તે, તેન તેન વિધાવિતા;

નરા કિલેસવત્થૂસુ, સસઙ્ગામેવ ઘોસિતે.

૯૩૩. ‘‘પરિચ્ચજિત્વા સદ્ધમ્મં, અઞ્ઞમઞ્ઞેહિ ભણ્ડરે;

દિટ્ઠિગતાનિ અન્વેન્તા, ઇદં સેય્યોતિ મઞ્ઞરે.

૯૩૪. ‘‘ધનઞ્ચ પુત્તં ભરિયઞ્ચ, છડ્ડયિત્વાન નિગ્ગતા;

કટચ્છુભિક્ખહેતૂપિ, અકિચ્છાનિ નિસેવરે.

૯૩૫. ‘‘ઉદરાવદેહકં ભુત્વા, સયન્તુત્તાનસેય્યકા;

કથં વત્તેન્તિ [કથા વડ્ઢેન્તિ (સી. ક.)] પટિબુદ્ધા, યા કથા સત્થુગરહિતા.

૯૩૬. ‘‘સબ્બકારુકસિપ્પાનિ, ચિત્તિં કત્વાન [ચિત્તીકત્વાન (સી.), ચિત્તં કત્વાન (સ્યા.)] સિક્ખરે;

અવૂપસન્તા અજ્ઝત્તં, સામઞ્ઞત્થોતિ અચ્છતિ [તિરિઞ્ચતિ (?)].

૯૩૭. ‘‘મત્તિકં તેલચુણ્ણઞ્ચ, ઉદકાસનભોજનં;

ગિહીનં ઉપનામેન્તિ, આકઙ્ખન્તા બહુત્તરં.

૯૩૮. ‘‘દન્તપોનં કપિત્થઞ્ચ, પુપ્ફં ખાદનિયાનિ ચ;

પિણ્ડપાતે ચ સમ્પન્ને, અમ્બે આમલકાનિ ચ.

૯૩૯. ‘‘ભેસજ્જેસુ યથા વેજ્જા, કિચ્ચાકિચ્ચે યથા ગિહી;

ગણિકાવ વિભૂસાયં, ઇસ્સરે ખત્તિયા યથા.

૯૪૦. ‘‘નેકતિકા વઞ્ચનિકા, કૂટસક્ખી અપાટુકા;

બહૂહિ પરિકપ્પેહિ, આમિસં પરિભુઞ્જરે.

૯૪૧. ‘‘લેસકપ્પે પરિયાયે, પરિકપ્પેનુધાવિતા;

જીવિકત્થા ઉપાયેન, સઙ્કડ્ઢન્તિ બહું ધનં.

૯૪૨. ‘‘ઉપટ્ઠાપેન્તિ પરિસં, કમ્મતો નો ચ ધમ્મતો;

ધમ્મં પરેસં દેસેન્તિ, લાભતો નો ચ અત્થતો.

૯૪૩. ‘‘સઙ્ઘલાભસ્સ ભણ્ડન્તિ, સઙ્ઘતો પરિબાહિરા;

પરલાભોપજીવન્તા, અહિરીકા ન લજ્જરે.

૯૪૪. ‘‘નાનુયુત્તા તથા એકે, મુણ્ડા સઙ્ઘાટિપારુતા;

સમ્ભાવનંયેવિચ્છન્તિ, લાભસક્કારમુચ્છિતા.

૯૪૫. ‘‘એવં નાનપ્પયાતમ્હિ, ન દાનિ સુકરં તથા;

અફુસિતં વા ફુસિતું, ફુસિતં વાનુરક્ખિતું.

૯૪૬. ‘‘યથા કણ્ટકટ્ઠાનમ્હિ, ચરેય્ય અનુપાહનો;

સતિં ઉપટ્ઠપેત્વાન, એવં ગામે મુની ચરે.

૯૪૭. ‘‘સરિત્વા પુબ્બકે યોગી, તેસં વત્તમનુસ્સરં;

કિઞ્ચાપિ પચ્છિમો કાલો, ફુસેય્ય અમતં પદં.

૯૪૮. ‘‘ઇદં વત્વા સાલવને, સમણો ભાવિતિન્દ્રિયો;

બ્રાહ્મણો પરિનિબ્બાયી, ઇસિ ખીણપુનબ્ભવો’’તિ.

… પારાપરિયો [પારાસરિયો (સ્યા.)] થેરો….

વીસતિનિપાતો નિટ્ઠિતો.