૨. પદુમઙ્ગપઞ્હો

૨. ‘‘ભન્તે નાગસેન, ‘પદુમસ્સ તીણિ અઙ્ગાનિ ગહેતબ્બાની’તિ યં વદેસિ, કતમાનિ તાનિ તીણિ અઙ્ગાનિ ગહેતબ્બાની’’તિ? ‘‘યથા, મહારાજ, પદુમં ઉદકે જાતં ઉદકે સંવદ્ધં અનુપલિત્તં ઉદકેન, એવમેવ ખો, મહારાજ, યોગિના યોગાવચરેન કુલે ગણે લાભે યસે સક્કારે સમ્માનનાય પરિભોગપચ્ચયેસુ ચ સબ્બત્થ અનુપલિત્તેન ભવિતબ્બં. ઇદં, મહારાજ, પદુમસ્સ પઠમં અઙ્ગં ગહેતબ્બં.

‘‘પુન ચપરં, મહારાજ, પદુમં ઉદકા અચ્ચુગ્ગમ્મ ઠાતિ. એવમેવ ખો, મહારાજ, યોગિના યોગાવચરેન સબ્બલોકં અભિભવિત્વા અચ્ચુગ્ગમ્મ લોકુત્તરધમ્મે ઠાતબ્બં. ઇદં, મહારાજ, પદુમસ્સ દુતિયં અઙ્ગં ગહેતબ્બં.

‘‘પુન ચપરં, મહારાજ, પદુમં અપ્પમત્તકેનપિ અનિલેન એરિતં ચલતિ. એવમેવ ખો, મહારાજ, યોગિના યોગાવચરેન અપ્પમત્તકેસુપિ કિલેસેસુ સંયમો કરણીયો, ભયદસ્સાવિના વિહરિતબ્બં. ઇદં, મહારાજ, પદુમસ્સ તતિયં અઙ્ગં ગહેતબ્બં. ભાસિતમ્પેતં, મહારાજ, ભગવતા દેવાતિદેવેન ‘અણુમત્તેસુ વજ્જેસુ ભયદસ્સાવી સમાદાય સિક્ખતિ સિક્ખાપદેસૂ’તિ.

પદુમઙ્ગપઞ્હો દુતિયો.