૭. યક્ખપઞ્હો

૭. ‘‘ભન્તે નાગસેન, અત્થિ લોકે યક્ખા નામા’’તિ? ‘‘આમ, મહારાજ, અત્થિ લોકે યક્ખા નામા’’તિ. ‘‘ચવન્તિ પન તે, ભન્તે, યક્ખા તમ્હા યોનિયા’’તિ? ‘‘આમ, મહારાજ, ચવન્તિ તે યક્ખા તમ્હા યોનિયા’’તિ. ‘‘કિસ્સ પન, ભન્તે નાગસેન, તેસં મતાનં યક્ખાનં સરીરં ન દિસ્સતિ, કુણપગન્ધોપિ ન વાયતી’’તિ? ‘‘દિસ્સતિ, મહારાજ, મતાનં યક્ખાનં સરીરં, કુણપગન્ધોપિ તેસં વાયતિ, મતાનં, મહારાજ, યક્ખાનં સરીરં કીટવણ્ણેન વા દિસ્સતિ, કિમિવણ્ણેન વા દિસ્સતિ, કિપિલ્લિકવણ્ણેન વા દિસ્સતિ, પટઙ્ગવણ્ણેન વા દિસ્સતિ, અહિવણ્ણેન વા દિસ્સતિ, વિચ્છિકવણ્ણેન વા દિસ્સતિ, સતપદિવણ્ણેન વા દિસ્સતિ, દિજવણ્ણેન વા દિસ્સતિ, મિગવણ્ણેન વા દિસ્સતી’’તિ. ‘‘કો હિ, ભન્તે નાગસેન, અઞ્ઞો ઇદં પઞ્હં પુટ્ઠો વિસજ્જેય્ય અઞ્ઞત્ર તવાદિસેન બુદ્ધિમતા’’તિ.

યક્ખપઞ્હો સત્તમો.