૧. કતાધિકારસફલપઞ્હો

૧. અથ ખો મિલિન્દો રાજા કતાવકાસો નિપચ્ચ ગરુનો પાદે સિરસિ અઞ્જલિં કત્વા એતદવોચ ‘‘ભન્તે નાગસેન, ઇમે તિત્થિયા એવં ભણન્તિ [વઞ્ચો ભવતિ અફલો (સી. પી. ક.)] ‘યદિ બુદ્ધો પૂજં સાદિયતિ, ન પરિનિબ્બુતો બુદ્ધો સંયુત્તો લોકેન અન્તોભવિકો લોકસ્મિં લોકસાધારણો, તસ્મા તસ્સ કતો અધિકારો અવઞ્ઝો ભવતિ સફલો. યદિ પરિનિબ્બુતો વિસંયુત્તો લોકેન નિસ્સટો સબ્બભવેહિ, તસ્સ પૂજા નુપ્પજ્જતિ, પરિનિબ્બુતો ન કિઞ્ચિ સાદિયતિ, અસાદિયન્તસ્સ કતો અધિકારો વઞ્ઝો ભવતિ અફલો’તિ ઉભતો કોટિકો એસો પઞ્હો, નેસો વિસયો અપ્પત્તમાનસાનં, મહન્તાનં યેવેસો વિસયો, ભિન્દેતં દિટ્ઠિજાલં એકંસે ઠપય, તવેસો પઞ્હો અનુપ્પત્તો, અનાગતાનં જિનપુત્તાનં ચક્ખું દેહિ પરવાદનિગ્ગહાયા’’તિ.

થેરો આહ ‘‘પરિનિબ્બુતો, મહારાજ, ભગવા, ન ચ ભગવા પૂજં સાદિયતિ, બોધિમૂલે યેવ તથાગતસ્સ સાદિયના પહીના, કિં પન અનુપાદિસેસાય નિબ્બાનધાતુયા પરિનિબ્બુતસ્સ. ભાસિતમ્પેતં, મહારાજ, થેરેન સારિપુત્તેન ધમ્મસેનાપતિના –

‘‘‘પૂજિયન્તા [પૂજિતા (સ્યા.)] અસમસમા, સદેવમાનુસેહિ તે;

ન સાદિયન્તિ સક્કારં, બુદ્ધાનં એસ ધમ્મતા’’’તિ.

રાજા આહ ‘‘ભન્તે નાગસેન, પુત્તો વા પિતુનો વણ્ણં ભાસતિ, પિતા વા પુત્તસ્સ વણ્ણં ભાસતિ, ન ચેતં કારણં પરવાદાનં નિગ્ગહાય, પસાદપ્પકાસનં નામેતં, ઇઙ્ઘ મે ત્વં તત્થ કારણં સમ્મા બ્રૂહિ સકવાદસ્સ પતિટ્ઠાપનાય દિટ્ઠિજાલવિનિવેઠનાયા’’તિ.

થેરો આહ ‘‘પરિનિબ્બુતો, મહારાજ, ભગવા, ન ચ ભગવા પૂજં સાદિયતિ, અસાદિયન્તસ્સેવ તથાગતસ્સ દેવમનુસ્સા ધાતુરતનં વત્થું કરિત્વા તથાગતસ્સ ઞાણરતનારમ્મણેન સમ્માપટિપત્તિં સેવન્તા તિસ્સો સમ્પત્તિયો પટિલભન્તિ.

‘‘યથા, મહારાજ, મહતિમહાઅગ્ગિક્ખન્ધો પજ્જલિત્વા નિબ્બાયેય્ય, અપિ નુ ખો સો, મહારાજ, મહાઅગ્ગિક્ખન્ધો સાદિયતિ તિણકટ્ઠુપાદાન’’ન્તિ? ‘‘જલમાનોપિ સો, ભન્તે, મહાઅગ્ગિક્ખન્ધો તિણકટ્ઠુપાદાનં ન સાદિયતિ, કિં પન નિબ્બુતો ઉપસન્તો અચેતનો સાદિયતિ? ‘‘તસ્મિં પન, મહારાજ, અગ્ગિક્ખન્ધે ઉપરતે ઉપસન્તે લોકે અગ્ગિ સુઞ્ઞો હોતી’’તિ. ‘‘ન હિ, ભન્તે, કટ્ઠં અગ્ગિસ્સ વત્થુ હોતિ ઉપાદાનં, યે કેચિ મનુસ્સા અગ્ગિકામા, તે અત્તનો થામબલવીરિયેન પચ્ચત્તપુરિસકારેન કટ્ઠં મન્થયિત્વા [મદ્દિત્વા (ક.)] અગ્ગિં નિબ્બત્તેત્વા તેન અગ્ગિના અગ્ગિકરણીયાનિ કમ્માનિ કરોન્તી’’તિ. ‘‘તેન હિ, મહારાજ, તિત્થિયાનં વચનં મિચ્છા ભવતિ ‘અસાદિયન્તસ્સ કતો અધિકારો વઞ્ઝો ભવતિ અફલો’તિ.

‘‘યથા, મહારાજ, મહતિમહાઅગ્ગિક્ખન્ધો પજ્જલિ, એવમેવ ભગવા દસસહસ્સિયા [દસસહસ્સિમ્હિ (સી. પી. ક.)] લોકધાતુયા બુદ્ધસિરિયા પજ્જલિ. યથા, મહારાજ, મહતિમહાઅગ્ગિક્ખન્ધો પજ્જલિત્વા નિબ્બુતો, એવમેવ ભગવા દસસહસ્સિયા લોકધાતુયા બુદ્ધસિરિયા પજ્જલિત્વા અનુપાદિસેસાય નિબ્બાનધાતુયા પરિનિબ્બુતો. યથા, મહારાજ, નિબ્બુતો અગ્ગિક્ખન્ધો તિણકટ્ઠુપાદાનં ન સાદિયતિ, એવમેવ ખો લોકહિતસ્સ સાદિયના પહીના ઉપસન્તા. યથા, મહારાજ, મનુસ્સા નિબ્બુતે અગ્ગિક્ખન્ધે અનુપાદાને અત્તનો થામબલવીરિયેન પચ્ચત્તપુરિસકારેન કટ્ઠં મન્થયિત્વા અગ્ગિં નિબ્બત્તેત્વા તેન અગ્ગિના અગ્ગિકરણીયાનિ કમ્માનિ કરોન્તિ, એવમેવ ખો દેવમનુસ્સા તથાગતસ્સ પરિનિબ્બુતસ્સ અસાદિયન્તસ્સેવ ધાતુરતનં વત્થું કરિત્વા તથાગતસ્સ ઞાણરતનારમ્મણેન સમ્માપટિપત્તિં સેવન્તા તિસ્સો સમ્પત્તિયો પટિલભન્તિ, ઇમિનાપિ, મહારાજ, કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલો.

‘‘અપરમ્પિ, મહારાજ, ઉત્તરિં કારણં સુણોહિ યેન કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલો. યથા, મહારાજ, મહતિમહાવાતો વાયિત્વા ઉપરમેય્ય, અપિ નુ ખો સો, મહારાજ, ઉપરતો વાતો સાદિયતિ પુન નિબ્બત્તાપન’’ન્તિ? ‘‘ન હિ, ભન્તે, ઉપરતસ્સ વાતસ્સ આભોગો વા મનસિકારો વા પુન નિબ્બત્તાપનાય’’. ‘‘કિં કારણં’’? ‘‘અચેતના સા વાયોધાતૂ’’તિ. ‘‘અપિ નુ તસ્સ, મહારાજ, ઉપરતસ્સ વાતસ્સ વાતોતિ સમઞ્ઞા અપગચ્છતી’’તિ? ‘‘ન હિ, ભન્તે, તાલવણ્ટવિધૂપનાનિ વાતસ્સ ઉપ્પત્તિયા પચ્ચયા, યે કેચિ મનુસ્સા ઉણ્હાભિતત્તા પરિળાહપરિપીળિતા, તે તાલવણ્ટેન વા વિધૂપનેન વા અત્તનો થામબલવીરિયેન પચ્ચત્તપુરિસકારેન તં નિબ્બત્તેત્વા તેન વાતેન ઉણ્હં નિબ્બાપેન્તિ પરિળાહં વૂપસમેન્તી’’તિ. ‘‘તેન હિ, મહારાજ, તિત્થિયાનં વચનં મિચ્છા ભવતિ ‘અસાદિયન્તસ્સ કતો અધિકારો વઞ્ઝો ભવતિ અફલો’તિ.

‘‘યથા, મહારાજ, મહતિમહાવાતો વાયિ, એવમેવ ભગવા દસસહસ્સિયા લોકધાતુયા સીતલમધુરસન્તસુખુમમેત્તાવાતેન ઉપવાયિ. યથા, મહારાજ, મહતિમહાવાતો વાયિત્વા ઉપરતો, એવમેવ ભગવા સીતલમધુરસન્તસુખુમમેત્તાવાતેન ઉપવાયિત્વા અનુપાદિસેસાય નિબ્બાનધાતુયા પરિનિબ્બુતો. યથા, મહારાજ, ઉપરતો વાતો પુન નિબ્બત્તાપનં ન સાદિયતિ, એવમેવ લોકહિતસ્સ સાદિયના પહીના ઉપસન્તા. યથા, મહારાજ, તે મનુસ્સા ઉણ્હાભિતત્તા પરિળાહપરિપીળિતા, એવમેવ દેવમનુસ્સા તિવિધગ્ગિસન્તાપપરિળાહપરિપીળિતા. યથા તાલવણ્ટવિધૂપનાનિ વાતસ્સ નિબ્બત્તિયા પચ્ચયા હોન્તિ, એવમેવ તથાગતસ્સ ધાતુ ચ ઞાણરતનઞ્ચ પચ્ચયો હોતિ તિસ્સન્નં સમ્પત્તીનં પટિલાભાય. યથા મનુસ્સા ઉણ્હાભિતત્તા પરિળાહપરિપીળિતા તાલવણ્ટેન વા વિધૂપનેન વા વાતં નિબ્બત્તેત્વા ઉણ્હં નિબ્બાપેન્તિ પરિળાહં વૂપસમેન્તિ, એવમેવ દેવમનુસ્સા તથાગતસ્સ પરિનિબ્બુતસ્સ અસાદિયન્તસ્સેવ ધાતુઞ્ચ ઞાણરતનઞ્ચ પૂજેત્વા કુસલં નિબ્બત્તેત્વા તેન કુસલેન તિવિધગ્ગિસન્તાપપરિળાહં નિબ્બાપેન્તિ વૂપસમેન્તિ. ઇમિનાપિ, મહારાજ, કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલોતિ.

‘‘અપરમ્પિ, મહારાજ, ઉત્તરિં કારણં સુણોહિ પરવાદાનં નિગ્ગહાય. યથા, મહારાજ, પુરિસો ભેરિં આકોટેત્વા સદ્દં નિબ્બત્તેય્ય, યો સો ભેરિસદ્દો પુરિસેન નિબ્બત્તિતો, સો સદ્દો અન્તરધાયેય્ય, અપિ નુ ખો સો, મહારાજ, સદ્દો સાદિયતિ પુન નિબ્બત્તાપન’’ન્તિ? ‘‘ન હિ, ભન્તે, અન્તરહિતો સો સદ્દો, નત્થિ તસ્સ પુન ઉપ્પાદાય આભોગો વા મનસિકારો વા, સકિં નિબ્બત્તે ભેરિસદ્દે અન્તરહિતે સો ભેરિસદ્દો સમુચ્છિન્નો હોતિ. ભેરી પન, ભન્તે, પચ્ચયો હોતિ સદ્દસ્સ નિબ્બત્તિયા, અથ પુરિસો પચ્ચયે સતિ અત્તજેન વાયામેન ભેરિં અકોટેત્વા સદ્દં નિબ્બત્તેતી’’તિ. ‘‘એવમેવ ખો, મહારાજ, ભગવા સીલસમાધિપઞ્ઞાવિમુત્તિવિમુત્તિઞાણદસ્સનપરિભાવિતં ધાતુરતનઞ્ચ ધમ્મઞ્ચ વિનયઞ્ચ અનુસિટ્ઠઞ્ચ [અનુસત્થિઞ્ચ (સી. પી.)] સત્થારં ઠપયિત્વા સયં અનુપાદિસેસાય નિબ્બાનધાતુયા પરિનિબ્બુતો, ન ચ પરિનિબ્બુતે ભગવતિ સમ્પત્તિલાભો ઉપચ્છિન્નો હોતિ, ભવદુક્ખપટિપીળિતા સત્તા ધાતુરતનઞ્ચ ધમ્મઞ્ચ વિનયઞ્ચ અનુસિટ્ઠઞ્ચ પચ્ચયં કરિત્વા સમ્પત્તિકામા સમ્પત્તિયો પટિલભન્તિ, ઇમિનાપિ, મહારાજ, કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલોતિ.

‘‘દિટ્ઠઞ્ચેતં, મહારાજ, ભગવતા અનાગતમદ્ધાનં. કથિતઞ્ચ ભણિતઞ્ચ આચિક્ખિતઞ્ચ ‘સિયા ખો પનાનન્દ, તુમ્હાકં એવમસ્સ અતીતસત્થુકં પાવચનં નત્થિ નો સત્થાતિ, ન ખો પનેતં, આનન્દ, એવં દટ્ઠબ્બં, યો વો, આનન્દ, મયા ધમ્મો ચ વિનયો ચ દેસિતો પઞ્ઞત્તો, સો વો મમચ્ચયેન સત્થા’તિ. પરિનિબ્બુતસ્સ તથાગતસ્સ અસાદિયન્તસ્સ કતો અધિકારો વઞ્ઝો ભવતિ અફલોતિ, તં તેસં તિત્થિયાનં વચનં મિચ્છા અભૂતં વિતથં અલિકં વિરુદ્ધં વિપરીતં દુક્ખદાયકં દુક્ખવિપાકં અપાયગમનીયન્તિ.

‘‘અપરમ્પિ, મહારાજ, ઉત્તરિં કારણં સુણોહિ યેન કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલો. સાદિયતિ નુ ખો, મહારાજ, અયં મહાપથવી ‘સબ્બબીજાનિ મયિ સંવિરુહન્તૂ’’’તિ? ‘‘ન હિ, ભન્તે’’તિ. ‘‘કિસ્સ પન તાનિ, મહારાજ, બીજાનિ અસાદિયન્તિયા મહાપથવિયા સંવિરુહિત્વા દળ્હમૂલજટાપતિટ્ઠિતા ખન્ધસારસાખાપરિવિત્થિણ્ણા પુપ્ફફલધરા હોન્તી’’તિ? ‘‘અસાદિયન્તીપિ, ભન્તે, મહાપથવી તેસં બીજાનં વત્થું હોતિ પચ્ચયં દેતિ વિરુહનાય, તાનિ બીજાનિ તં વત્થું નિસ્સાય તેન પચ્ચયેન સંવિરુહિત્વા દળ્હમૂલજટાપતિટ્ઠિતા ખન્ધસારસાખાપરિવિત્થિણ્ણા પુપ્ફફલધરા હોન્તી’’તિ. ‘‘તેન હિ, મહારાજ, તિત્થિયા સકે વાદે નટ્ઠા હોન્તિ હતા વિરુદ્ધા, સચે તે ભણન્તિ ‘અસાદિયન્તસ્સ કતો અધિકારો વઞ્ઝો ભવતિ અફલો’ તિ.

‘‘યથા, મહારાજ, મહાપથવી, એવં તથાગતો અરહં સમ્માસમ્બુદ્ધો. યથા, મહારાજ, મહાપથવી ન કિઞ્ચિ સાદિયતિ, એવં તથાગતો ન કિઞ્ચિ સાદિયતિ. યથા, મહારાજ, તાનિ બીજાનિ પથવિં નિસ્સાય સંવિરુહિત્વા દળ્હમૂલજટાપતિટ્ઠિતા ખન્ધસારસાખાપરિવિત્થિણ્ણા પુપ્ફફલધરા હોન્તિ, એવં દેવમનુસ્સા તથાગતસ્સ પરિનિબ્બુતસ્સ અસાદિયન્તસ્સેવ ધાતુઞ્ચ ઞાણરતનઞ્ચ નિસ્સાય દળ્હકુસલમૂલપતિટ્ઠિતા સમાધિક્ખન્ધધમ્મસારસીલસાખાપરિવિત્થિણ્ણા વિમુત્તિપુપ્ફસામઞ્ઞફલધરા હોન્તિ, ઇમિનાપિ, મહારાજ, કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલોતિ.

‘‘અપરમ્પિ, મહારાજ, ઉત્તરિં કારણં સુણોહિ યેન કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલો. સાદિયન્તિ નુ ખો, મહારાજ, ઇમે ઓટ્ઠા ગોણા ગદ્રભા અજા પસૂ મનુસ્સા અન્તોકુચ્છિસ્મિં કિમિકુલાનં સમ્ભવ’’ન્તિ? ‘‘ન હિ, ભન્તે’’તિ. ‘‘કિસ્સ પન તે, મહારાજ, કિમયો તેસં અસાદિયન્તાનં અન્તોકુચ્છિસ્મિં સમ્ભવિત્વા બહુપુત્તનત્તા વેપુલ્લતં પાપુણન્તી’’તિ? ‘‘પાપસ્સ, ભન્તે, કમ્મસ્સ બલવતાય અસાદિયન્તાનં યેવ તેસં સત્તાનં અન્તોકુચ્છિસ્મિં કિમયો સમ્ભવિત્વા બહુપુત્તનત્તા વેપુલ્લતં પાપુણન્તી’’તિ. ‘‘એવમેવ ખો, મહારાજ, તથાગતસ્સ પરિનિબ્બુતસ્સ અસાદિયન્તસ્સેવ ધાતુસ્સ ચ ઞાણારમ્મણસ્સ ચ બલવતાય તથાગતે કતો અધિકારો અવઞ્ઝો ભવતિ સફલોતિ.

‘‘અપરમ્પિ, મહારાજ, ઉત્તરિં કારણં સુણોહિ યેન કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલો. સાદિયન્તિ નુ ખો, મહારાજ, ઇમે મનુસ્સા ઇમે અટ્ઠનવુતિ રોગા કાયે નિબ્બત્તન્તૂ’’તિ? ‘‘ન હિ, ભન્તે’’તિ. ‘‘કિસ્સ પન તે, મહારાજ, રોગા અસાદિયન્તાનં કાયે નિપતન્તી’’તિ? ‘‘પુબ્બે કતેન, ભન્તે, દુચ્ચરિતેના’’તિ. ‘‘યદિ, મહારાજ, પુબ્બે કતં અકુસલં ઇધ વેદનીયં હોતિ, તેન હિ, મહારાજ, પુબ્બે કતમ્પિ ઇધ કતમ્પિ કુસલાકુસલં કમ્મં અવઞ્ઝં ભવતિ સફલન્તિ. ઇમિનાપિ, મહારાજ, કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલોતિ.

‘‘સુતપુબ્બં પન તયા, મહારાજ, નન્દકો નામ યક્ખો થેરં સારિપુત્તં આસાદયિત્વા પથવિં પવિટ્ઠો’’તિ? ‘‘આમ, ભન્તે, સુય્યતિ, લોકે પાકટો એસો’’તિ. ‘‘અપિ નુ ખો, મહારાજ, થેરો સારિપુત્તો સાદિયિ નન્દકસ્સ યક્ખસ્સ મહાપથવિગિલન’’ન્તિ [પવત્તમાનેપિ (સ્યા.)]. ‘‘ઉબ્બત્તિયન્તેપિ, ભન્તે, સદેવકે લોકે પતમાનેપિ છમાયં ચન્દિમસૂરિયે વિકિરન્તેપિ સિનેરુપબ્બતરાજે થેરો સારિપુત્તો ન પરસ્સ દુક્ખં સાદિયેય્ય. તં કિસ્સ હેતુ? યેન હેતુના થેરો સારિપુત્તો કુજ્ઝેય્ય વા દુસ્સેય્ય વા, સો હેતુ થેરસ્સ સારિપુત્તસ્સ સમૂહતો સમુચ્છિન્નો, હેતુનો સમુગ્ઘાતિતત્તા, ભન્તે, થેરો સારિપુત્તો જીવિતહારકેપિ કોપં ન કરેય્યા’’તિ. ‘‘યદિ, મહારાજ, થેરો સારિપુત્તો નન્દકસ્સ યક્ખસ્સ પથવિગિલનં ન સાદિયિ, કિસ્સ પન નન્દકો યક્ખો પથવિં પવિટ્ઠો’’તિ? ‘‘અકુસલસ્સ, ભન્તે, કમ્મસ્સ બલવતાયા’’તિ. ‘‘યદિ, મહારાજ, અકુસલસ્સ કમ્મસ્સ બલવતાય નન્દકો યક્ખો પથવિં પવિટ્ઠો, અસાદિયન્તસ્સાપિ કતો અપરાધો અવઞ્ઝો ભવતિ સફલો. તેન હિ, મહારાજ, અકુસલસ્સપિ કમ્મસ્સ બલવતાય અસાદિયન્તસ્સ કતો અધિકારો અવઞ્ઝો ભવતિ સફલોતિ. ઇમિનાપિ, મહારાજ, કારણેન તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલોતિ.

‘‘કતિ નુ ખો તે, મહારાજ, મનુસ્સા, યે એતરહિ મહાપથવિં પવિટ્ઠા, અત્થિ તે તત્થ સવણ’’ન્તિ? ‘‘આમ, ભન્તે, સુય્યતી’’તિ. ‘‘ઇઙ્ઘ ત્વં, મહારાજ, સાવેહી’’તિ? ‘‘ચિઞ્ચમાણવિકા, ભન્તે, સુપ્પબુદ્ધો ચ સક્કો, દેવદત્તો ચ થેરો, નન્દકો ચ યક્ખો, નન્દો ચ માણવકોતિ. સુતમેતં, ભન્તે, ઇમે પઞ્ચ જના મહાપથવિં પવિટ્ઠા’’તિ. ‘‘કિસ્મિં તે, મહારાજ, અપરદ્ધા’’તિ? ‘‘ભગવતિ ચ, ભન્તે, સાવકેસુ ચા’’તિ. ‘‘અપિ નુ ખો, મહારાજ, ભગવા વા સાવકા વા સાદિયિંસુ ઇમેસં મહાપથવિપવિસન’’ન્તિ? ‘‘ન હિ ભન્તે’’તિ. ‘‘તેન હિ, મહારાજ, તથાગતસ્સ પરિનિબ્બુતસ્સ અસાદિયન્તસ્સેવ કતો અધિકારો અવઞ્ઝો ભવતિ સફલો’’તિ. ‘‘સુવિઞ્ઞાપિતો, ભન્તે નાગસેન, પઞ્હો ગમ્ભીરો ઉત્તાનીકતો, ગુય્હં વિદંસિતં, ગણ્ઠિ ભિન્નો, ગહનં અગહનં કતં, નટ્ઠા પરવાદા, ભગ્ગા કુદિટ્ઠી, નિપ્પભા જાતા કુતિત્થિયા, ત્વં ગણીવરપવરમાસજ્જા’’તિ.

કતાધિકારસફલપઞ્હો પઠમો.