૧૧. અસ્સાસપસ્સાસનિરોધપઞ્હો

૧૧. રાજા આહ ‘‘ભન્તે નાગસેન, તુમ્હે એવં ભણથ ‘સક્કા અસ્સાસપસ્સાસે નિરોધેતુ’’’ન્તિ? ‘‘આમ, મહારાજ, સક્કા અસ્સાસપસ્સાસે નિરોધેતુ’’ન્તિ. ‘‘કથં, ભન્તે નાગસેન, સક્કા અસ્સાસપસ્સાસે નિરોધેતુ’’ન્તિ. ‘‘તં કિં મઞ્ઞસિ, મહારાજ, સુતપુબ્બો તે કોચિ કાકચ્છમાનો’’તિ. ‘‘આમ, ભન્તે, સુતપુબ્બો’’તિ. ‘‘કિં નુ ખો, મહારાજ, સો સદ્દો કાયે નમિતે વિરમેય્યા’’તિ. ‘‘આમ, ભન્તે, વિરમેય્યા’’તિ. ‘‘સો હિ નામ, મહારાજ, સદ્દો અભાવિતકાયસ્સ અભાવિતસીલસ્સ અભાવિતચિત્તસ્સ અભાવિતપઞ્ઞસ્સ કાયે નમિતે વિરમિસ્સતિ, કિં પન ભાવિતકાયસ્સ ભાવિતસીલસ્સ ભાવિતચિત્તસ્સ ભાવિતપઞ્ઞસ્સ ચતુત્થજ્ઝાનં સમાપન્નસ્સ અસ્સાસપસ્સાસા ન નિરુજ્ઝિસ્સન્તી’’તિ.

‘‘કલ્લોસિ, ભન્તે નાગસેના’’તિ.

અસ્સાસપસ્સાસનિરોધપઞ્હો એકાદસમો.