૪૧૬. પરન્તપજાતકં (૭-૨-૧૧)

૧૫૪. આગમિસ્સતિ મે પાપં, આગમિસ્સતિ મે ભયં;

તદા હિ ચલિતા સાખા, મનુસ્સેન મિગેન વા.

૧૫૫. ભીરુયા નૂન મે કામો, અવિદૂરે વસન્તિયા;

કરિસ્સતિ કિસં પણ્ડું, સાવ સાખા પરન્તપં.

૧૫૬. સોચયિસ્સતિ મં કન્તા, ગામે વસમનિન્દિતા;

કરિસ્સતિ કિસં પણ્ડું, સાવ સાખા પરન્તપં.

૧૫૭. તયા મં અસિતાપઙ્ગિ [હસિતાપઙ્ગિ (સી. સ્યા. પી.)], સિતાનિ [મિહિતાનિ (સી. સ્યા. પી.)] ભણિતાનિ ચ;

કિસં પણ્ડું કરિસ્સન્તિ, સાવ સાખા પરન્તપં.

૧૫૮. અગમા નૂન સો સદ્દો, અસંસિ નૂન સો તવ;

અક્ખાતં નૂન તં તેન, યો તં સાખમકમ્પયિ.

૧૫૯. ઇદં ખો તં સમાગમ્મ, મમ બાલસ્સ ચિન્તિતં;

તદા હિ ચલિતા સાખા, મનુસ્સેન મિગેન વા.

૧૬૦. તથેવ ત્વં અવેદેસિ, અવઞ્ચિ [અવજ્ઝિ (ક.)] પિતરં મમ;

હન્ત્વા સાખાહિ છાદેન્તો, આગમિસ્સતિ મે [તે (સ્યા. ક.)] ભયન્તિ.

પરન્તપજાતકં એકાદસમં.

ગન્ધારવગ્ગો દુતિયો.

તસ્સુદ્દાનં –

વરગામ મહાકપિ ભગ્ગવ ચ, દળ્હધમ્મ સકુઞ્જર કેસવરો;

ઉરગો વિધુરો પુન જાગરતં, અથ કોસલાધિપ પરન્તપ ચાતિ.

અથ વગ્ગુદ્દાનં –

અથ સત્તનિપાતમ્હિ, વગ્ગં મે ભણતો સુણ;

કુક્કુ ચ પુન ગન્ધારો, દ્વેવ ગુત્તા મહેસિનાતિ.

સત્તકનિપાતં નિટ્ઠિતં.