૨. ગન્ધારવગ્ગો

૪૦૬. ગન્ધારજાતકં (૭-૨-૧)

૭૬. હિત્વા ગામસહસ્સાનિ, પરિપુણ્ણાનિ સોળસ;

કોટ્ઠાગારાનિ ફીતાનિ, સન્નિધિં દાનિ કુબ્બસિ.

૭૭. હિત્વા ગન્ધારવિસયં, પહૂતધનધારિયં [ધાનિયં (સી. પી.), ધઞ્ઞન્તિ અત્થો];

પસાસનતો [પસાસનિતો (સી. સ્યા.), પસાસનાતો (પી.)] નિક્ખન્તો, ઇધ દાનિ પસાસસિ.

૭૮. ધમ્મં ભણામિ વેદેહ, અધમ્મો મે ન રુચ્ચતિ;

ધમ્મં મે ભણમાનસ્સ, ન પાપમુપલિમ્પતિ.

૭૯. યેન કેનચિ વણ્ણેન, પરો લભતિ રુપ્પનં;

મહત્થિયમ્પિ ચે વાચં, ન તં ભાસેય્ય પણ્ડિતો.

૮૦. કામં રુપ્પતુ વા મા વા, ભુસંવ વિકિરીયતુ;

ધમ્મં મે ભણમાનસ્સ, ન પાપમુપલિમ્પતિ.

૮૧. નો ચે અસ્સ સકા બુદ્ધિ, વિનયો વા સુસિક્ખિતો;

વને અન્ધમહિંસોવ [અન્ધમહિસોવ (સી. પી.)] ચરેય્ય બહુકો જનો.

૮૨. યસ્મા ચ પનિધેકચ્ચે, આચેરમ્હિ [આચારમ્હિ (સી. પી.)] સુસિક્ખિતા;

તસ્મા વિનીતવિનયા, ચરન્તિ સુસમાહિતાતિ.

ગન્ધારજાતકં પઠમં.

૪૦૭. મહાકપિજાતકં (૭-૨-૨)

૮૩. અત્તાનં સઙ્કમં કત્વા, યો સોત્થિં સમતારયિ;

કિં ત્વં તેસં કિમે [કિમો (સી. પી.), કિં મે (સ્યા.)] તુય્હં, હોન્તિ એતે [હેતે (સ્યા.), સો તે (ક.)] મહાકપિ.

૮૪. રાજાહં ઇસ્સરો તેસં, યૂથસ્સ પરિહારકો;

તેસં સોકપરેતાનં, ભીતાનં તે અરિન્દમ.

૮૫. ઉલ્લઙ્ઘયિત્વા [સ લઙ્ઘયિત્વા (પી.), સુલઙ્ઘયિત્વા (ક.)] અત્તાનં, વિસ્સટ્ઠધનુનો સતં;

તતો અપરપાદેસુ, દળ્હં બન્ધં લતાગુણં.

૮૬. છિન્નબ્ભમિવ વાતેન, નુણ્ણો [નુન્નો (સી.)] રુક્ખં ઉપાગમિં;

સોહં અપ્પભવં તત્થ, સાખં હત્થેહિ અગ્ગહિં.

૮૭. તં મં વિયાયતં સન્તં, સાખાય ચ લતાય ચ;

સમનુક્કમન્તા પાદેહિ, સોત્થિં સાખામિગા ગતા.

૮૮. તં મં ન તપતે બન્ધો, મતો [વધો (સી. સ્યા. પી.)] મે ન તપેસ્સતિ;

સુખમાહરિતં તેસં, યેસં રજ્જમકારયિં.

૮૯. એસા તે ઉપમા રાજ, તં સુણોહિ અરિન્દમ [અત્થસન્દસ્સની કતા (પી.)];

રઞ્ઞા રટ્ઠસ્સ યોગ્ગસ્સ, બલસ્સ નિગમસ્સ ચ;

સબ્બેસં સુખમેટ્ઠબ્બં, ખત્તિયેન પજાનતાતિ.

મહાકપિજાતકં દુતિયં.

૪૦૮. કુમ્ભકારજાતકં (૭-૨-૩)

૯૦. અમ્બાહમદ્દં વનમન્તરસ્મિં, નીલોભાસં ફલિતં [ફલિનં (પી.)] સંવિરૂળ્હં;

તમદ્દસં ફલહેતુ વિભગ્ગં, તં દિસ્વા ભિક્ખાચરિયં ચરામિ.

૯૧. સેલં સુમટ્ઠં નરવીરનિટ્ઠિતં [નરવિદ્દુનિટ્ઠિતં (ક.)], નારી યુગં ધારયિ અપ્પસદ્દં;

દુતિયઞ્ચ આગમ્મ અહોસિ સદ્દો, તં દિસ્વા ભિક્ખાચરિયં ચરામિ.

૯૨. દિજા દિજં કુણપમાહરન્તં, એકં સમાનં બહુકા સમેચ્ચ;

આહારહેતૂ પરિપાતયિંસુ, તં દિસ્વા ભિક્ખાચરિયં ચરામિ.

૯૩. ઉસભાહમદ્દં યૂથસ્સ મજ્ઝે, ચલક્કકું વણ્ણબલૂપપન્નં;

તમદ્દસં કામહેતુ વિતુન્નં, તં દિસ્વા ભિક્ખાચરિયં ચરામિ.

૯૪. કરણ્ડકો [કરણ્ડુનામ (સી. પી.)] કલિઙ્ગાનં, ગન્ધારાનઞ્ચ નગ્ગજિ;

નિમિરાજા વિદેહાનં, પઞ્ચાલાનઞ્ચ દુમ્મુખો;

એતે રટ્ઠાનિ હિત્વાન, પબ્બજિંસુ અકિઞ્ચના.

૯૫. સબ્બેપિમે દેવસમા સમાગતા, અગ્ગી યથા પજ્જલિતો તથેવિમે;

અહમ્પિ એકો ચરિસ્સામિ ભગ્ગવિ, હિત્વાન કામાનિ યથોધિકાનિ.

૯૬. અયમેવ કાલો ન હિ અઞ્ઞો અત્થિ, અનુસાસિતા મે ન ભવેય્ય પચ્છા;

અહમ્પિ એકા ચરિસ્સામિ ભગ્ગવ, સકુણીવ મુત્તા પુરિસસ્સ હત્થા.

૯૭. આમં પક્કઞ્ચ જાનન્તિ, અથો લોણં અલોણકં;

તમહં દિસ્વાન પબ્બજિં, ચરેવ ત્વં ચરામહન્તિ.

કુમ્ભકારજાતકં તતિયં.

૪૦૯. દળ્હધમ્મજાતકં (૭-૨-૪)

૯૮. અહં ચે દળ્હધમ્મસ્સ [દળ્હધમ્માય (પી.)], વહન્તિ નાભિરાધયિં;

ધરન્તી ઉરસિ સલ્લં, યુદ્ધે વિક્કન્તચારિની.

૯૯. નૂન રાજા ન જાનાતિ [ન હ નૂન રાજા જાનાતિ (સી. પી.)], મમ વિક્કમપોરિસં;

સઙ્ગામે સુકતન્તાનિ, દૂતવિપ્પહિતાનિ ચ.

૧૦૦. સા નૂનાહં મરિસ્સામિ, અબન્ધુ અપરાયિની [અપરાયિણી (સી.), અપરાયણી (?)];

તદા હિ [તથા હિ (પી.)] કુમ્ભકારસ્સ, દિન્ના છકણહારિકા.

૧૦૧. યાવતાસીસતી પોસો, તાવદેવ પવીણતિ;

અત્થાપાયે જહન્તિ નં, ઓટ્ઠિબ્યાધિંવ ખત્તિયો.

૧૦૨. યો પુબ્બે કતકલ્યાણો, કતત્થો નાવબુજ્ઝતિ;

અત્થા તસ્સ પલુજ્જન્તિ, યે હોન્તિ અભિપત્થિતા.

૧૦૩. યો પુબ્બે કતકલ્યાણો, કતત્થો મનુબુજ્ઝતિ;

અત્થા તસ્સ પવડ્ઢન્તિ, યે હોન્તિ અભિપત્થિતા.

૧૦૪. તં વો વદામિ ભદ્દન્તે [ભદ્દં વો (સી. સ્યા. પી.)], યાવન્તેત્થ સમાગતા;

સબ્બે કતઞ્ઞુનો હોથ, ચિરં સગ્ગમ્હિ ઠસ્સથાતિ.

દળ્હધમ્મજાતકં ચતુત્થં.

૪૧૦. સોમદત્તજાતકં (૭-૨-૫)

૧૦૫. યો મં પુરે પચ્ચુડ્ડેતિ [પચ્ચુદેતિ (સી. સ્યા. પી.), પચ્ચુટ્ઠેતિ (ક.)], અરઞ્ઞે દૂરમાયતો;

સો ન દિસ્સતિ માતઙ્ગો, સોમદત્તો કુહિં ગતો.

૧૦૬. અયં વા સો મતો સેતિ, અલ્લસિઙ્ગંવ વચ્છિતો [અલ્લપિઙ્કવ છિજ્જિતો (સી. પી.), અલ્લપીતંવ વિચ્છિતો (સ્યા.)];

ભુમ્યા નિપતિતો સેતિ, અમરા વત કુઞ્જરો.

૧૦૭. અનગારિયુપેતસ્સ, વિપ્પમુત્તસ્સ તે સતો;

સમણસ્સ ન તં સાધુ, યં પેતમનુસોચસિ.

૧૦૮. સંવાસેન હવે સક્ક, મનુસ્સસ્સ મિગસ્સ વા;

હદયે જાયતે પેમં, તં ન સક્કા અસોચિતું.

૧૦૯. મતં મરિસ્સં રોદન્તિ, યે રુદન્તિ લપન્તિ ચ;

તસ્મા ત્વં ઇસિ મા રોદિ, રોદિતં મોઘમાહુ સન્તો.

૧૧૦. કન્દિતેન હવે બ્રહ્મે, મતો પેતો સમુટ્ઠહે;

સબ્બે સઙ્ગમ્મ રોદામ, અઞ્ઞમઞ્ઞસ્સ ઞાતકે.

૧૧૧. આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૧૧૨. અબ્બહી વત મે સલ્લં, યમાસિ હદયસ્સિતં;

યો મે સોકપરેતસ્સ, પુત્તસોકં અપાનુદિ.

૧૧૩. સોહં અબ્બૂળ્હસલ્લોસ્મિ, વીતસોકો અનાવિલો;

ન સોચામિ ન રોદામિ, તવ સુત્વાન વાસવાતિ.

સોમદત્તજાતકં પઞ્ચમં.

૪૧૧. સુસીમજાતકં (૭-૨-૬)

૧૧૪. કાળાનિ કેસાનિ પુરે અહેસું, જાતાનિ સીસમ્હિ યથાપદેસે;

તાનજ્જ સેતાનિ સુસીમ [સુસિમ (ક.)] દિસ્વા, ધમ્મં ચર બ્રહ્મચરિયસ્સ કાલો.

૧૧૫. મમેવ દેવ પલિતં ન તુય્હં, મમેવ સીસં મમ ઉત્તમઙ્ગં;

‘‘અત્થં કરિસ્સ’’ન્તિ મુસા અભાણિં [અભાસિં (ક.)], એકાપરાધં ખમ રાજસેટ્ઠ.

૧૧૬. દહરો તુવં દસ્સનિયોસિ રાજ, પઠમુગ્ગતો હોસિ [હોહિ (સી.), હોતિ (ક.)] યથા કળીરો;

રજ્જઞ્ચ કારેહિ મમઞ્ચ પસ્સ, મા કાલિકં અનુધાવી જનિન્દ.

૧૧૭. પસ્સામિ વોહં દહરિં કુમારિં, સામટ્ઠપસ્સં સુતનું સુમજ્ઝં;

કાળપ્પવાળાવ પવેલ્લમાના, પલોભયન્તીવ [સા લોભયન્તીવ (પી.)] નરેસુ ગચ્છતિ.

૧૧૮. તમેન પસ્સામિપરેન નારિં, આસીતિકં નાવુતિકં વ જચ્ચા;

દણ્ડં ગહેત્વાન પવેધમાનં, ગોપાનસીભોગ્ગસમં ચરન્તિં.

૧૧૯. સોહં તમેવાનુવિચિન્તયન્તો, એકો સયામિ [પસ્સામિ (ક.)] સયનસ્સ મજ્ઝે;

‘‘અહમ્પિ એવં’’ ઇતિ પેક્ખમાનો, ન ગહે રમે [ન ગેહે રમે (સી.), ગેહે ન રમે (સ્યા. ક.)] બ્રહ્મચરિયસ્સ કાલો.

૧૨૦. રજ્જુવાલમ્બની ચેસા, યા ગેહે વસતો રતિ;

એવમ્પિ છેત્વાન વજન્તિ ધીરા, અનપેક્ખિનો કામસુખં પહાયાતિ.

સુસીમજાતકં છટ્ઠં.

૪૧૨. કોટસિમ્બલિજાતકં (૭-૨-૭)

૧૨૧. અહં દસસતંબ્યામં, ઉરગમાદાય આગતો;

તઞ્ચ મઞ્ચ મહાકાયં, ધારયં નપ્પવેધસિ [ન પવેધયિ (ક.)].

૧૨૨. અથિમં ખુદ્દકં પક્ખિં, અપ્પમંસતરં મયા;

ધારયં બ્યથસિ [બ્યાધસે (સી.), બ્યધસે (પી.), બ્યાધસિ (ક.)] ભીતા [ભીતો (સી. સ્યા. પી.)], કમત્થં કોટસિમ્બલિ [કોટિસિમ્બલિ (સી. પી.)].

૧૨૩. મંસભક્ખો તુવં રાજ, ફલભક્ખો અયં દિજો;

અયં નિગ્રોધબીજાનિ, પિલક્ખુદુમ્બરાનિ ચ;

અસ્સત્થાનિ ચ ભક્ખિત્વા, ખન્ધે મે ઓહદિસ્સતિ.

૧૨૪. તે રુક્ખા સંવિરૂહન્તિ, મમ પસ્સે નિવાતજા;

તે મં પરિયોનન્ધિસ્સન્તિ, અરુક્ખં મં કરિસ્સરે.

૧૨૫. સન્તિ અઞ્ઞેપિ રુક્ખા સે, મૂલિનો ખન્ધિનો દુમા;

ઇમિના સકુણજાતેન, બીજમાહરિતા હતા.

૧૨૬. અજ્ઝારૂહાભિવડ્ઢન્તિ [અજ્ઝારૂળ્હાભિવડ્ઢન્તિ (સી. પી.)], બ્રહન્તમ્પિ વનપ્પતિં;

તસ્મા રાજ પવેધામિ, સમ્પસ્સંનાગતં ભયં.

૧૨૭. સઙ્કેય્ય સઙ્કિતબ્બાનિ, રક્ખેય્યાનાગતં ભયં;

અનાગતભયા ધીરો, ઉભો લોકે અવેક્ખતીતિ.

કોટસિમ્બલિજાતકં સત્તમં.

૪૧૩. ધૂમકારિજાતકં (૭-૨-૮)

૧૨૮. રાજા અપુચ્છિ વિધુરં, ધમ્મકામો યુધિટ્ઠિલો;

અપિ બ્રાહ્મણ જાનાસિ, કો એકો બહુ સોચતિ.

૧૨૯. બ્રાહ્મણો અજયૂથેન, પહૂતેધો [બહૂતેજો (પી. ક.), બહુતેન્દો (સ્યા.)] વને વસં;

ધૂમં અકાસિ વાસેટ્ઠો, રત્તિન્દિવમતન્દિતો.

૧૩૦. તસ્સ તં ધૂમગન્ધેન, સરભા મકસડ્ડિતા [મકસદ્દિતા (સી. સ્યા.), મકસટ્ટિતા (પી. ક.)];

વસ્સાવાસં ઉપાગચ્છું, ધૂમકારિસ્સ સન્તિકે.

૧૩૧. સરભેસુ મનં કત્વા, અજા સો નાવબુજ્ઝથ;

આગચ્છન્તી વજન્તી વા [આગચ્છન્તિ વજન્તિ વા (સ્યા. પી.), આગચ્છન્તિં વજન્તિં વા (ક.)], તસ્સ તા વિનસું [વિનસ્સું (સી.)] અજા.

૧૩૨. સરભા સરદે કાલે, પહીનમકસે વને;

પાવિસું ગિરિદુગ્ગાનિ, નદીનં પભવાનિ ચ.

૧૩૩. સરભે ચ ગતે દિસ્વા, અજા ચ વિભવં ગતા [અજે ચ વિભવં ગતે (ક.)];

કિસો ચ વિવણ્ણો ચાસિ, પણ્ડુરોગી ચ બ્રાહ્મણો.

૧૩૪. એવં યો સં નિરંકત્વા, આગન્તું કુરુતે પિયં;

સો એકો બહુ સોચતિ, ધૂમકારીવ બ્રાહ્મણોતિ.

ધૂમકારિજાતકં અટ્ઠમં.

૪૧૪. જાગરજાતકં (૭-૨-૯)

૧૩૫. કોધ જાગરતં સુત્તો, કોધ સુત્તેસુ જાગરો;

કો મમેતં વિજાનાતિ, કો તં પટિભણાતિ મે.

૧૩૬. અહં જાગરતં સુત્તો, અહં સુત્તેસુ જાગરો;

અહમેતં વિજાનામિ, અહં પટિભણામિ તે.

૧૩૭. કથં જાગરતં સુત્તો, કથં સુત્તેસુ જાગરો;

કથં એતં વિજાનાસિ, કથં પટિભણાસિ મે.

૧૩૮. યે ધમ્મં નપ્પજાનન્તિ, સંયમોતિ દમોતિ ચ;

તેસુ સુપ્પમાનેસુ, અહં જગ્ગામિ દેવતે.

૧૩૯. યેસં રાગો ચ દોસો ચ, અવિજ્જા ચ વિરાજિતા;

તેસુ જાગરમાનેસુ, અહં સુત્તોસ્મિ દેવતે.

૧૪૦. એવં જાગરતં સુત્તો, એવં સુત્તેસુ જાગરો;