૪૧૫. કુમ્માસપિણ્ડિજાતકં (૭-૨-૧૦)

૧૪૨. ન કિરત્થિ અનોમદસ્સિસુ, પારિચરિયા બુદ્ધેસુ અપ્પિકા [અપ્પકા (ક.)];

સુક્ખાય અલોણિકાય ચ, પસ્સફલં કુમ્માસપિણ્ડિયા.

૧૪૩. હત્થિગવસ્સા ચિમે બહૂ [હત્થિગવાસ્સા ચ મે બહૂ (સી.), હત્થી ગવાસ્સા ચિમે બહૂ (સ્યા.), હત્થી ગવાસ્સા ચ મે બહૂ (પી.)], ધનધઞ્ઞં પથવી ચ કેવલા;

નારિયો ચિમા અચ્છરૂપમા, પસ્સફલં કુમ્માસપિણ્ડિયા.

૧૪૪. અભિક્ખણં રાજકુઞ્જર, ગાથા ભાસસિ કોસલાધિપ;

પુચ્છામિ તં રટ્ઠવડ્ઢન, બાળ્હં પીતિમનો પભાસસિ.

૧૪૫. ઇમસ્મિઞ્ઞેવ નગરે, કુલે અઞ્ઞતરે અહું;

પરકમ્મકરો આસિં, ભતકો સીલસંવુતો.

૧૪૬. કમ્માય નિક્ખમન્તોહં, ચતુરો સમણેદ્દસં;

આચારસીલસમ્પન્ને, સીતિભૂતે અનાસવે.

૧૪૭. તેસુ ચિત્તં પસાદેત્વા, નિસીદેત્વા [નિસાદેત્વા (?)] પણ્ણસન્થતે;

અદં બુદ્ધાન કુમ્માસં, પસન્નો સેહિ પાણિભિ.

૧૪૮. તસ્સ કમ્મસ્સ કુસલસ્સ, ઇદં મે એદિસં ફલં;

અનુભોમિ ઇદં રજ્જં, ફીતં ધરણિમુત્તમં.

૧૪૯. દદં ભુઞ્જ મા ચ પમાદો [દદ ભુઞ્જ ચ મા ચ પમાદો (સી. પી.)], ચક્કં વત્તય કોસલાધિપ;

મા રાજ અધમ્મિકો અહુ, ધમ્મં પાલય કોસલાધિપ.

૧૫૦. સોહં તદેવ પુનપ્પુનં, વટુમં આચરિસ્સામિ સોભને;

અરિયાચરિતં સુકોસલે, અરહન્તો મે મનાપાવ પસ્સિતું.

૧૫૧. દેવી વિય અચ્છરૂપમા, મજ્ઝે નારિગણસ્સ સોભસિ;

કિં કમ્મમકાસિ ભદ્દકં, કેનાસિ વણ્ણવતી સુકોસલે.

૧૫૨. અમ્બટ્ઠકુલસ્સ ખત્તિય, દાસ્યાહં પરપેસિયા અહું;

સઞ્ઞતા ચ [સઞ્ઞતા (સી. પી.)] ધમ્મજીવિની, સીલવતી ચ અપાપદસ્સના.

૧૫૩. ઉદ્ધટભત્તં અહં તદા, ચરમાનસ્સ અદાસિ ભિક્ખુનો;

વિત્તા સુમના સયં અહં, તસ્સ કમ્મસ્સ ફલં મમેદિસન્તિ.

કુમ્માસપિણ્ડિજાતકં દસમં.