૪૧૪. જાગરજાતકં (૭-૨-૯)

૧૩૫. કોધ જાગરતં સુત્તો, કોધ સુત્તેસુ જાગરો;

કો મમેતં વિજાનાતિ, કો તં પટિભણાતિ મે.

૧૩૬. અહં જાગરતં સુત્તો, અહં સુત્તેસુ જાગરો;

અહમેતં વિજાનામિ, અહં પટિભણામિ તે.

૧૩૭. કથં જાગરતં સુત્તો, કથં સુત્તેસુ જાગરો;

કથં એતં વિજાનાસિ, કથં પટિભણાસિ મે.

૧૩૮. યે ધમ્મં નપ્પજાનન્તિ, સંયમોતિ દમોતિ ચ;

તેસુ સુપ્પમાનેસુ, અહં જગ્ગામિ દેવતે.

૧૩૯. યેસં રાગો ચ દોસો ચ, અવિજ્જા ચ વિરાજિતા;

તેસુ જાગરમાનેસુ, અહં સુત્તોસ્મિ દેવતે.

૧૪૦. એવં જાગરતં સુત્તો, એવં સુત્તેસુ જાગરો;

એવમેતં વિજાનામિ, એવં પટિભણામિ તે.

૧૪૧. સાધુ જાગરતં સુત્તો, સાધુ સુત્તેસુ જાગરો;

સાધુમેતં વિજાનાસિ, સાધુ પટિભણાસિ મેતિ.

જાગરજાતકં નવમં.