૬. અવુટ્ઠિકસુત્તં

૭૫. વુત્તઞ્હેતં ભગવતા, વુત્તમરહતાતિ મે સુતં –

‘‘તયોમે, ભિક્ખવે, પુગ્ગલા સન્તો સંવિજ્જમાના લોકસ્મિં. કતમે તયો? અવુટ્ઠિકસમો, પદેસવસ્સી, સબ્બત્થાભિવસ્સી.

‘‘કથઞ્ચ, ભિક્ખવે, પુગ્ગલો અવુટ્ઠિકસમો હોતિ? ઇધ, ભિક્ખવે, એકચ્ચો પુગ્ગલો સબ્બેસઞ્ઞેવ ન દાતા હોતિ, સમણબ્રાહ્મણકપણદ્ધિકવનિબ્બકયાચકાનં [… વણિબ્બકયાચકાનં (સી.)] અન્નં પાનં વત્થં યાનં માલાગન્ધવિલેપનં સેય્યાવસથપદીપેય્યં. એવં ખો, ભિક્ખવે, પુગ્ગલો અવુટ્ઠિકસમો હોતિ.

‘‘કથઞ્ચ, ભિક્ખવે, પુગ્ગલો પદેસવસ્સી હોતિ? ઇધ, ભિક્ખવે, એકચ્ચો પુગ્ગલો એકચ્ચાનં દાતા (હોતિ) [( ) નત્થિ સ્યામપોત્થકે], એકચ્ચાનં ન દાતા હોતિ સમણબ્રાહ્મણકપણદ્ધિકવનિબ્બકયાચકાનં અન્નં પાનં વત્થં યાનં માલાગન્ધવિલેપનં સેય્યાવસથપદીપેય્યં. એવં ખો, ભિક્ખવે, પુગ્ગલો પદેસવસ્સી હોતિ.

‘‘કથઞ્ચ, ભિક્ખવે, પુગ્ગલો સબ્બત્થાભિવસ્સી હોતિ? ઇધ, ભિક્ખવે, એકચ્ચો પુગ્ગલો સબ્બેસંવ દેતિ, સમણબ્રાહ્મણકપણદ્ધિકવનિબ્બકયાચકાનં અન્નં પાનં વત્થં યાનં માલાગન્ધવિલેપનં સેય્યાવસથપદીપેય્યં. એવં ખો, ભિક્ખવે, પુગ્ગલો સબ્બત્થાભિવસ્સી હોતિ. ઇમે ખો, ભિક્ખવે, તયો પુગ્ગલા સન્તો સંવિજ્જમાના લોકસ્મિ’’ન્તિ. એતમત્થં ભગવા અવોચ. તત્થેતં ઇતિ વુચ્ચતિ –

‘‘ન સમણે ન બ્રાહ્મણે, ન કપણદ્ધિકવનિબ્બકે;

લદ્ધાન સંવિભાજેતિ, અન્નં પાનઞ્ચ ભોજનં;

તં વે અવુટ્ઠિકસમોતિ, આહુ નં પુરિસાધમં.

‘‘એકચ્ચાનં ન દદાતિ, એકચ્ચાનં પવેચ્છતિ;

તં વે પદેસવસ્સીતિ, આહુ મેધાવિનો જના.

‘‘સુભિક્ખવાચો પુરિસો, સબ્બભૂતાનુકમ્પકો;

આમોદમાનો પકિરેતિ, દેથ દેથાતિ ભાસતિ.

‘‘યથાપિ મેઘો થનયિત્વા, ગજ્જયિત્વા પવસ્સતિ;

થલં નિન્નઞ્ચ પૂરેતિ, અભિસન્દન્તોવ [અભિસન્દેન્તોવ (?)] વારિના.

‘‘એવમેવ ઇધેકચ્ચો, પુગ્ગલો હોતિ તાદિસો;

ધમ્મેન સંહરિત્વાન, ઉટ્ઠાનાધિગતં ધનં;

તપ્પેતિ અન્નપાનેન, સમ્મા પત્તે વનિબ્બકે’’તિ.

અયમ્પિ અત્થો વુત્તો ભગવતા, ઇતિ મે સુતન્તિ. છટ્ઠં.