૭. સુખપત્થનાસુત્તં

૭૬. વુત્તઞ્હેતં ભગવતા, વુત્તમરહતાતિ મે સુતં –

‘‘તીણિમાનિ, ભિક્ખવે, સુખાનિ પત્થયમાનો સીલં રક્ખેય્ય પણ્ડિતો. કતમાનિ તીણિ? પસંસા મે આગચ્છતૂતિ [આગચ્છન્તૂતિ (સ્યા.)] સીલં રક્ખેય્ય પણ્ડિતો, ભોગા મે ઉપ્પજ્જન્તૂતિ સીલં રક્ખેય્ય પણ્ડિતો, કાયસ્સ ભેદા પરં મરણા સુગતિં સગ્ગં લોકં ઉપપજ્જિસ્સામીતિ સીલં રક્ખેય્ય પણ્ડિતો. ઇમાનિ ખો, ભિક્ખવે, તીણિ સુખાનિ પત્થયમાનો સીલં રક્ખેય્ય પણ્ડિતો’’તિ. એતમત્થં ભગવા અવોચ. તત્થેતં ઇતિ વુચ્ચતિ –

‘‘સીલં રક્ખેય્ય મેધાવી, પત્થયાનો તયો સુખે;

પસંસં વિત્તલાભઞ્ચ, પેચ્ચ સગ્ગે પમોદનં.

‘‘અકરોન્તોપિ ચે પાપં, કરોન્તમુપસેવતિ;

સઙ્કિયો હોતિ પાપસ્મિં, અવણ્ણો ચસ્સ રૂહતિ.

‘‘યાદિસં કુરુતે મિત્તં, યાદિસં ચૂપસેવતિ;

સ વે તાદિસકો હોતિ, સહવાસો હિ [સહવાસોપિ (સી. ક.)] તાદિસો.

‘‘સેવમાનો સેવમાનં, સમ્ફુટ્ઠો સમ્ફુસં પરં;

સરો દિદ્ધો કલાપંવ, અલિત્તમુપલિમ્પતિ;

ઉપલેપભયા [ઉપલિમ્પભયા (ક.)] ધીરો, નેવ પાપસખા સિયા.

‘‘પૂતિમચ્છં કુસગ્ગેન, યો નરો ઉપનય્હતિ;

કુસાપિ પૂતિ વાયન્તિ, એવં બાલૂપસેવના.

‘‘તગરઞ્ચ પલાસેન, યો નરો ઉપનય્હતિ;

પત્તાપિ સુરભિ વાયન્તિ, એવં ધીરૂપસેવના.

‘‘તસ્મા પત્તપુટસ્સેવ [પલાસપુટસ્સેવ (પી. ક.)], ઞત્વા સમ્પાકમત્તનો;

અસન્તે નુપસેવેય્ય, સન્તે સેવેય્ય પણ્ડિતો;

અસન્તો નિરયં નેન્તિ, સન્તો પાપેન્તિ સુગ્ગતિ’’ન્તિ.

અયમ્પિ અત્થો વુત્તો ભગવતા, ઇતિ મે સુતન્તિ. સત્તમં.