૯. વટ્ટપોતકચરિયા

૭૨. ‘‘પુનાપરં યદા હોમિ, મગધે વટ્ટપોતકો;

અજાતપક્ખો તરુણો, મંસપેસિ કુલાવકે.

૭૩. ‘‘મુખતુણ્ડકેનાહરિત્વા [મુખતુણ્ડેનાહરિત્વા (સી.)], માતા પોસયતી મમં;

તસ્સા ફસ્સેન જીવામિ, નત્થિ મે કાયિકં બલં.

૭૪. ‘‘સંવચ્છરે ગિમ્હસમયે, દવડાહો [વનદાહો (ક.)] પદિપ્પતિ;

ઉપગચ્છતિ અમ્હાકં, પાવકો કણ્હવત્તની.

૭૫. ‘‘ધમધમા ઇતિએવં, સદ્દાયન્તો મહાસિખી;

અનુપુબ્બેન ઝાપેન્તો, અગ્ગિ મમમુપાગમિ.

૭૬. ‘‘અગ્ગિવેગભયાતીતા, તસિતા માતાપિતા મમ;

કુલાવકે મં છડ્ડેત્વા, અત્તાનં પરિમોચયું.

૭૭. ‘‘પાદે પક્ખે પજહામિ, નત્થિ મે કાયિકં બલં;

સોહં અગતિકો તત્થ, એવં ચિન્તેસહં તદા.

૭૮. ‘‘‘યેસાહં ઉપધાવેય્યં, ભીતો તસિતવેધિતો;

તે મં ઓહાય પક્કન્તા, કથં મે અજ્જ કાતવે.

૭૯. ‘‘‘અત્થિ લોકે સીલગુણો, સચ્ચં સોચેય્યનુદ્દયા;

તેન સચ્ચેન કાહામિ, સચ્ચકિરિયમુત્તમં.

૮૦. ‘‘‘આવેજ્જેત્વા ધમ્મબલં, સરિત્વા પુબ્બકે જિને;

સચ્ચબલમવસ્સાય, સચ્ચકિરિયમકાસહં.

૮૧. ‘‘‘સન્તિ પક્ખા અપતના, સન્તિ પાદા અવઞ્ચના;

માતાપિતા ચ નિક્ખન્તા, જાતવેદ પટિક્કમ’.

૮૨. ‘‘સહસચ્ચે કતે મય્હં, મહાપજ્જલિતો સિખી;

વજ્જેસિ સોળસકરીસાનિ, ઉદકં પત્વા યથા સિખી;

સચ્ચેન મે સમો નત્થિ, એસા મે સચ્ચપારમી’’તિ.

વટ્ટપોતકચરિયં નવમં.