૧૦. મચ્છરાજચરિયા

૮૩. ‘‘પુનાપરં યદા હોમિ, મચ્છરાજા મહાસરે;

ઉણ્હે સૂરિયસન્તાપે, સરે ઉદક ખીયથ.

૮૪. ‘‘તતો કાકા ચ ગિજ્ઝા ચ, કઙ્કા [બકા (સી.)] કુલલસેનકા;

ભક્ખયન્તિ દિવારત્તિં, મચ્છે ઉપનિસીદિય.

૮૫. ‘‘એવં ચિન્તેસહં તત્થ, સહ ઞાતીહિ પીળિતો;

‘કેન નુ ખો ઉપાયેન, ઞાતી દુક્ખા પમોચયે’.

૮૬. ‘‘વિચિન્તયિત્વા ધમ્મત્થં, સચ્ચં અદ્દસ પસ્સયં;

સચ્ચે ઠત્વા પમોચેસિં, ઞાતીનં તં અતિક્ખયં.

૮૭. ‘‘અનુસ્સરિત્વા સતં ધમ્મં, પરમત્થં વિચિન્તયં;

અકાસિ સચ્ચકિરિયં, યં લોકે ધુવસસ્સતં.

૮૮. ‘‘‘યતો સરામિ અત્તાનં, યતો પત્તોસ્મિ વિઞ્ઞુતં;

નાભિજાનામિ સઞ્ચિચ્ચ, એકપાણમ્પિ હિંસિતં.

૮૯. ‘‘‘એતેન સચ્ચવજ્જેન, પજ્જુન્નો અભિવસ્સતુ;

અભિત્થનય પજ્જુન્ન, નિધિં કાકસ્સ નાસય;

કાકં સોકાય રન્ધેહિ, મચ્છે સોકા પમોચય’.

૯૦. ‘‘સહકતે સચ્ચવરે, પજ્જુન્નો અભિગજ્જિય;

થલં નિન્નઞ્ચ પૂરેન્તો, ખણેન અભિવસ્સથ.

૯૧. ‘‘એવરૂપં સચ્ચવરં, કત્વા વીરિયમુત્તમં;

વસ્સાપેસિં મહામેઘં, સચ્ચતેજબલસ્સિતો;

સચ્ચેન મે સમો નત્થિ, એસા મે સચ્ચપારમી’’તિ.

મચ્છરાજચરિયં દસમં.